Hdră bhiăn lăn ala thŭn 2013 mâo leh lu klei bi mlih kñăm mjing djăp klei găl lehanăn đru kơ bruă ba yua lăn hŏng klei tŭ dưn: Mdei leh klei bhiăn nah gŭ plah wah knŭk kna hŏng dŭm tĭng djă yua lăn, bi djŏ tui si klei čuăl mkă kơ klei djă yua lăn, brei mưn lăn kñăm duah mnuih duh bi liê, jao lăn tui si klei bi lông mđĭ ênoh, čoh čuăn ênoh hŏng klei klă mngač êjai knŭk kna jao lăn, brei mưn lăn. Bruă mkăp hră lăn dưi ngă kñăm ba klei tŭ dưn kơ jih jang klei djă yua lăn.

Siămdah, hlăm dŭm boh phŭn ngă truh kơ klei duah bi mđĭ ênoh čhĭ lăn, kbiă hriê mơ̆ng dŭm anôk rŭ mkra bruă knuă, klei čuăl mkă ƀuôn prŏng, lehanăn klei kơ sang lăn ngă bruă amâo mâo klei klă mngač. Kơ bruă anei, pô truăn kơ bruă duh mkra, Nai prĭn Nguyễn Trí Hiếu lač:

Čiăng mđĭ kyar djŏ hlăm bruă djă yua lăn, klei kơ ênoh ênil năng bi tui hlue djŏ hŏng klei čiăng. Brei mâo klei bi lông mđĭ ênoh tui si klei čiăng. Hŏng klei klă mngač, amâo mâo klei mdăp ôh. Anei jing klei yuôm bhăn êdi, kyuadah hrue mmông leh êgao, klei bi lông mđĭ ênoh dôk ngă mtŭk mtŭl kơ klei djă yua lăn. Tal sa jing kyua mâo bruă sang čư̆ êa alŭ wăl mă bruă mbĭt, lehanăn tal dua jing phung duah klei tŭ dưn hjăn kơ pô hlăm anăn”.

   Boh sĭt lăn lŏ hma pla mjing ti ala čar ăt dôk jing klei duh mkra pla mjing hliê điêt tui si gŏ sang, klah klap: Klei bi mguôp dơ̆ng mơ̆ng pla mjing, mkra mjing boh mnga, lehanăn kăp hrui blei ka mâo klei hơĭt ôh, klei bi mguôp plah wah phung duh mkra, mnuih ngă lŏ hma lehanăn krĭng lŏ hma adôk kƀah. Tui si klei čiăng ară anei hŏng bruă bi mlih klei bhiăn djă yua lăn jing kruak čua bi klă mngač kñăm čiăng klei dư̆n yua lăn hŏng klei tŭ dưn hĭn, mđĭ hĭn klei tŭ mơ̆ng klei bi mnia blei lăn ala tui si bruă tŭ dưn kơ klei duh mkra. Bruă lŏ bi mlih klei bhiăn lăn ala tal anei čiăng bi mngač hĭn klei mbha gưl, mbha klei dưi, klei đua klam mơ̆ng dŭm anôk bruă knŭk kna kiă kriê, mơ̆ng gưl nah dlông hlŏng kơ alŭ wăl nah gŭ hŏng jih jang bruă čuăl mkă, brei klei dưi bi mlih hdră djă yua lăn, klei hrui mă, sua wĭt lăn ala, bruă jao lăn, bruă brei mưn lăn, bruă mkăp hră lăn bi djŏ klei bhiăn. K’iăng nai prŏng, nai prĭn Đinh Trọng Thịnh, jing nai mtô ti sang hră ksiêm hriăm kơ ngăn prăk lač:

Mđĭ ai bruă čoh ênoh tui si klei blei mnia, kñăm truh kơ klei čiăng rơ̆ng kơ bruă bi čhĭ lăn dôk bi tui tiŏ ênoh hŏng klei bi ghan mnia. Kñăm čiăng kơ bruă djă yua lăn klă sĭt jing pioh kơ bruă mđĭ kyar, năng hŏng klei mđĭ kyar tui si hlăm grăp ênuk. Kơ êdei anăp, năng bi mđĭ ai bi mlih klei dưi djă yua lăn knŏng pioh kơ bruă pioh knŏng kơ klei tuh tia, lehanăn hlăm bruă lŏ hma pla mjing”.

 Tui si klei blŭ mơ̆ng phung truăn kơ bruă, klei bhiăn lăn ala lŏ mlih mrâo tal anei kñăm mghaih msir bi jih dŭm klei dôk ka djŏ, bi hrŏ bruă mkŏ mjing klei duah bi ghan lăn, knŏng kruak ênoh lăn djŏ hŏng ênoh sĭt klei kơ lăn ala, anăp amâo lŏ mâo ôh klei duah bi mkăm bi klin lăn ala kñăm pioh lŏ čhĭ čiăng mđĭ ênoh. Sa klei yuôm bhăn mkăn năng bi mâo klei čoh čuăn kơ bruă klam mơ̆ng dŭm anôk bruă hâo hưn kơ klei čuăl mkă, klei ngă bruă hlăm dŭm anôk rŭ mkra prŏng, ti alŭ wăl kñăm bi mâo bruă ngă hŏng klei klă mngač, mkhư̆ hĕ bi jih djăp mta bruă knŏng bi hing klei amâo mâo sĭt, knŏng duah êlan čiăng ƀơ̆ng mnga đĭ. Trần Văn Lê, Khua knơ̆ng bruă duh mkra mnia mblei Phương Linh brei thâo:

Klei ară anei djŏ tuôm hŏng lăn anôk dôk. Lăn dôk jing ba wĭt sa ênoh ngăn prăk prŏng, ƀiădah boh sĭt bruă mđĭ anôk lăn yap jing lăn dôk jing sa bruă dleh dlan. Tơdah knŭk kna yap anăn jing anôk kăp hrui wĭt ngăn prăk kơ knŭk kna, amâodah yap anei jing anôk pioh prăk. Snăn tui si phung thâo duh mkra dôk dlăng, tơdah bi ghan mnia lăn ala jing tuôm hŏng lu mta klei dleh dlan, kâo mĭn klei anei brei thâo ƀuh hŏng lu êlan, ƀiădah mta kñăm truh hŏng lăn jing klei kơ jia kdrêč lăn anăn, lehanăn anăp srăng ba klei tŭ dưn kơ 3 tĭng anăn jing pô mâo lăn, mnuih djă yua lăn, lehanăn knŭk kna, brei bi kna jih jang klei tŭ dưn anăn”.

 Sa mta klei mkăn, năng mâo klei bi mlih anăn jing klei bi tĭng mkă lăn ala, ngă bruă bi klin anôk ala pla mjing ti krĭng ƀuôn prŏng, kñăm mđĭ ênoh mâo ba wĭt kơ knŭk kna, lehanăn ba wĭt klei tŭ dưn mơh kơ mnuih yua lăn, kơ mnuih djŏ anôk hrui mă lăn, mnuih djŏ jao lăn, thâodah mnuih blei lăn amâdah sang dôk ti anôk lăn djŏ sua mă hrui wĭt kơ knŭk kna. Bi leh jih jang klei bhiăn klei kơ lăn ala, hŏng anôk bruă kăp kiă kriê lăn ala, iêo jak jih ai ktang klei dưi đru ba kơ mnuih djŏ tuôm hŏng klei hrui mă lăn, lehanăn mkăp anôk dôk mrâo hŏng klei hơĭt sĭt kơ mnuih ƀuôn sang./.