Blŭ pŏk klei bi kƀĭn, khua êpul gơ̆ng bruă djuê ana hlăm bruă kƀĭn ala Y Thanh Hà Niê Kđăm brei thâo, bruă kƀĭn ala mâo leh klei ksiêm dlăng gưl dlông kơ bruă truăn “Boh tŭ dưn hlue ngă djăp hdra mtrŭn mơ̆ng bruă kƀĭn ala kơ hdră 5 thŭn wưng mơ̆ng 2021- 2025: Hdra lăn čar kñăm; mkŏ mkra krĭng ƀuôn sang mrâo; hdră lăn čar kñăm boi hrŏ ƀun hŏng klei kjăp; hdră mđĭ kyar bruă duh mkra - ala ƀuôn krĭng mnuih djuê ƀiă, lehanăn krĭng čư̆ čhiăng”. Anei jing bruă truăn pioh ksiêm dlăng kluôm lehanăn wĭt bi mklă nanao hlăm mkra wưng (2021-2025).

Truh kơ ară anei êpul mâo ksiêm leh djŏ hdră kčah. Êpul ksiêm dlăng mâo leh klei hâo mdah boh tŭ dưn klei ksiêm dlăng hŏng khua bruă kƀĭn ala, phung k’iăng khua bruă kƀĭn ala; hâo mdah hŏng dhar bruă gĭt gai bruă kƀĭn ala ti anôk bi kƀĭn tal 25 (mlan 8 leh êgao) lehanăn klei bi kƀĭn tal 26 (hlăm mlan 9). Êpul ksiêm dlăng ară anei hlăk gĭt gai êpul đru bruă pral bi klin, mă klei blŭ mơ̆ng dhar bruă gĭt gai bruă kƀĭn ala pioh mkŏ mjing klei hâo mdah, hâo mdah klah čŭn lehanăn hdră mtrŭn bruă ksiêm dlăng pioh ba mdah kơ anôk bruă kƀĭn ala hlăm klei bi kƀĭn tal 6, mlan 10 anăp anei.

Khua êpul gơ̆ng bruă djuê ana lač, hrue 12/9/2023, knŭk kna mâo hră mdah “Kơ boh tŭ dưn klei hluê ngă, klei dleh dlan, klei gun kpăk hlăm bruă hluê ngă 3 hdră lăn čar kñăm kơ wưng thŭn 2021-2023 lehanăn akâo kơ hdră, klei bhiăn ruh mgaih klei dleh dlan, klei gun kpăk mđĭ bi pral jih jang ngă hlăm wưng ti anăp”, hlăm anăn mâo đa đa klei dleh dlan, klei gun kpăk hlue ngă 3 hdră lăn čar kñăm, lehanăn akâo kơ dŭm mta bruă mkăn.

Knŭk kna mâo klei akâo brei hlue ngă nanao čiăng dưi bi liê ngăn prăk hlŏng truh jih 31/12/2024 hŏng dŭm ngăn prăk mơ̆ng knŭk kna kơ bruă lăn čar kñăm kao mâo bi liê jih ôh hlăm thŭn 2023; lŏ bi kdung hrue mlan, ka ba mdah ôh hŏng anôk bruă kƀĭn ala ksiêm dlăng, bi klă kơ klei bhiăn lông bi hmô mbha gưl ti dŭm kdriêk hlăm klei kiă kriê, mkŏ mjing dŭm bruă lăn čar kñăm ti anôk bi kƀĭn tal 6 mơ̆ng bruă kƀĭn ala.

Khua êpul gơ̆ng bruă ƀuôn sang mơ̆ng bruă kƀĭn ala Y Thanh Hà Niê Kđăm lač, jih jang bruă mrâo lač anăn jing yuôm bhăn snăk pioh mđĭ kyar jih jang bruă kơ mnuih ƀuôn sang, boh nik hŏng mnuih ƀuôn sang ƀun, anôk dleh dlan hĭn êdi   mjing djăp klei găl mđĭ kyar. Hŏng ai tiê mđĭ kyar krĭng mnuih ƀuôn sang djuê ƀiă. Mjing djăp klei găl čiăng kơ knŭk kna mjing klei đru kơ mnuih djuê ƀiă ti anôk bi kƀĭn mâo knŭk kna bi êdah klei bi trông, tui duah hdră mghaih msir ruh mghaih, sa ai mđrăm mbĭt mjing djăp klei găl mđrăm mbĭt hŏng knŭk kna ti anôk bi kƀĭn anei, Khua êpul gơ̆ng bruă djuê ana hlăm bruă kƀĭn ala Y Thanh Hà Niê Kđăm čiăng kơ phung bi ala bi trông, duah hdră mghaih msir ruh mgaih klei dleh dlan.

Klah čŭn tianôk bi kƀĭn, Khua êpul gơ̆ng bruă djuê ana mơ̆ng bruă kƀĭn ala Y Thanh Hà Niê Kđăm brei thâo leh sa wưng ngă bruă hŏng klei pral, mâo bruă klam hŏng lu bruă bi mđing, djŏ bi leh bruă čuăn.

Bi ala kơ êpul ksiêm dlăng, Khua êpul gơ̆ng bruă djuê ana; lač, êpul ksiêm dlăng mâo čih pioh bruă klam mơ̆ng êpul ti anôk bi kƀĭn. Boh nik jih jang klei blŭ jing djŏ boh phŭn mjing leh klei sa ai jing mđrăm mbĭt bi mă bruă hŏng knŭk kna, čiăng pral mâo bi leh mghaih msir bi jih klei dleh dlan hlue ngă jăk hdră lăn čar kñăm.

Čiăng pral mâo ruh mgaih jih klei dleh dlan, klei gun kpăk, mđĭ hĭn bruă hlue ngă hdră lăn čar kñăm hlăm wưng tinăp, Khua êpul gơ̆ng bruă djuê ana hlăm bruă kƀĭn ala Y Thanh Hà Niê Kđăm mtă kơ phŭn bruă čuăl mkă duh bi liê, jing êpul bruă dôk hlăm hdră lăn čar kñăm, bi mguôp kjăp hŏng êpul đru bruă mơ̆ng dŭm anôk bruă djŏ tuôm bi klin jih jang klei blŭ mơ̆ng êpul ksiêm dlăng, ngă bi leh klei hâo mdah ba mdah ti anôk bi kƀĭn tal 6 tui si mta mtrŭn. Lehanăn, mtă kơ êpul đru bruă nga klei ksiêm čŏng bi sa hnơ̆ng hŏng phŭn bruă čuăl mkă, duh bi liê, mbĭt hŏng jih jang dŭm phŭn bruă djŏ tuôm bi trông kơ bruă kñăm ti anôk bi kƀĭn anei, pioh bi leh jih jang hdră mtrŭn, kñăm ba mơĭt kơ dhar bruă gĭt gai bruă kƀĭn ala./.