Krah mlan 8/1945, êjai klei bi blah hŏng Japon hlăm wưng dlưn hĭn, khua gĭt gai Hồ Chí Minh mâo leh asăp Mtrŭn mjêč mkŏ mjing klei kƀĭn kluôm Quốc dân Tân Trào čiăng mkŏ mjing knŭk kna êjai, gĭt gai klei krŭ kdơ̆ng mơ̆ng mnuih ƀuôn sang Việt Nam. Ti đình Tân Trào, êbeh 60 čô bi la kơ dŭm gưl mnuih ƀuôn sang, dŭm djuê ana, dŭm êpul dŏng mtlaih lăn čar wĭt bi kƀĭn, bi êdah ai tiê bi mguôp djuê ana, k’iăng nai prŏng, nai prĭn Nguyễn Danh Tiên, Khua anôk bruă hƀuê ênuk Đảng, Sang hră kđi čar ala čar khua gĭt gai Hồ Chí Minh brei thâo:

Khua gĭt gai Hồ Chí Minh ruah leh Tuyên Quang jing anôk mkŏ mjing Quốc dân Đại hội Tân Trào, bi êdah knhuah gru khăp kơ lăn čar, klei mĭn kjăp, sa ai hluê Đảng. Quốc dân Đại hội Tân Trào dưi bi êdah klei mĭn, klei hmăng hmưi mơ̆ng mnuih ƀuôn sang leh anăn mgaih msir dŭm boh klei prŏng mơ̆ng lăn čar.

Mtrŭt mjhar jih jang mnuih ƀuôn sang kgŭ krŭ kdơ̆ng sua wĭt klei dưi kiă kriê mơ̆ng Japon, pai mă klei găl, Klei kƀĭn kluôm lač klă: “Boh klei jing mjêč êdi”. Djăp mta bruă srăng ngă djŏ hŏng 3 hdră bhiăn: Kñăm êpul bruă hlăm dŭm bruă phŭn – sa ai kơ bruă lĭng kahan, bruă kđi čar, ngă bruă leh anăn gĭt gai, hmao ngă bruă, amâo mâo lui klei găl. Truh hruê 18/8/1945, khua gĭt gai Hồ Chí Minh iêo mthưr: Mmông bi klă kơ klei hdĭp djuê ana truh leh. Kluôm lăn čar mnuih ƀuôn sang kgŭ krŭ kdơ̆ng  mă ai pô mtlaih êngiê kơ pô…Drei amâo dưi êmưt ôh. k’iăng nai prŏng, nai prĭn Vũ Quang Đạo, khua kiă kriê hđăp anôk bruă hluê ênuk lĭng kahan Việt Nam mñă klă:

Quốc dân Đại hội Tân Trào hlăk anăn khădah ka mâo klei găl bi kƀĭn jih jang phung bi ala mnuih ƀuôn sang, ƀiădah ênŭm leh bi ala kơ mnuih ƀuôn sang phung khăp kơ lăn čar cách mạng čiăng ngă klei yuôm bhăn hŏng lăn čar. Anăn jing klei bi klă hƀuê ênuk”.

Klei kƀĭn kluôm bi klă 10 hdră êlan msĕ si: Ngă klei krŭ kdơ̆ng yang ƀuôn, hrui mă ngăn drăp roh leh anăn knuă roh bi mbŏ hlăm ngăn dŏh nik jing hdră êlan ngă hŏng klei mplĕ hră, klei dưi êngiê leh anăn lu klei dưi mkăn djŏ tuôm hŏng boh tŭ dưn mnuih ƀuôn sang hlăk mmông anăn. Hoàng Ngọc, Sa čô hlăm êpul phung hđeh đru dŏng lăn čar êjai anăn, thŭn anei 90 thŭn lŏ wĭt hdơr:

Kâo jing sa čô hlăm êpul bi ala êkei, phung mduôn, phung hđeh nao hlăm klei kƀĭn kluôm. Kâo hriê tinei ƀuh Trần Huy Liệu drông leh anăn hưn mdah jing pô mduôn, amâo mâo thâo ôh jing awa Hồ. Awa Hồ lač jăk klei sa ai mơ̆ng mnuih ƀuôn sang Kim Long hruê anei, Awa Hồ ƀuh kâo čŭt čhum ai tĭ, ñu rueh kŏ kâo leh anăn lač phung bi ala si srei srăng ngă čiăng kơ phung hđeh tinei mâo êsei huă, čhum ao čŭt leh anăn hriăm hră mơar.

Găn 80 thŭn, dŭm boh tŭ dưn mơ̆ng Quốc dân Đại hội Tân Trào ăt dôk kluôm dhuôm, mơ̆ng klei mĭn mnuih ƀuôn sang jing phŭn, truh kơ gru hmô bi ala mnuih ƀuôn sang, anăn jing klei hriăm kơ klei bi mguôp djuê ana, kơ klei êngiê nao mbĭt hŏng bruă klam hƀuê ênuk, kơ dŭm hdră êlan djŏ hlăm wưng yuôm bhăn mơ̆ng lăn čar. K’iăng nai prŏng, nai prĭn Nguyễn Mạnh Hà, Khua hđăp anôk bruă hƀuê ênuk Đảng, Sang hră kđi čar ala čar khua gĭt gai Hồ Chí Minh brei thâo:

Quốc dân Đại hội jing hdră hră kyua mmông anăn drei ngă bruă hgăm, ênoh mnuih ƀiă sơnăn đuč, êdei anei leh mâo mă klei dưi, Đảng leh anăn khua gĭt gai Hồ Chí Minh bi klă anei jing anôk bruă klei dưi bi ala mơ̆ng mnuih ƀuôn sang srăng ngă hŏng klei mplĕ hră, kyuanăn mâo klei ruah khua kluôm hruê 6/1/1946 leh anăn êdei anei djăp gưl ngă klei mplĕ hră ruah phung mâo kơhưm hĭn hlăm anôk bruă mnuih ƀuôn sang ruah. Anei jing anôk bruă mnuih ƀuôn sang ruah, anôk bruă bi klă hdră bhiăn phŭn leh anăn čih mkra hdră bhiăn mơ̆ng Việt Nam. Mphŭn mơ̆ng Quốc dân Đại hội, Bruă kƀĭn ala  Việt Nam mđĭ kyar kluôm dhuôm hĭn, hdră mă bruă leh anăn truh kơ ară anei drei ƀuh sa Bruă kƀĭn ala  hlăm brô giăm 500 čô bi ala Bruă kƀĭn ala  ngă bruă jêñ jêñ.

Quốc dân Đại hội Tân Trào amâo djŏ knŏng jing hdră bruă hƀuê ênuk yuôm bhăn mơ̆ng klei krŭ kdơ̆ng mlan 8, ƀiădah lŏ jing gru kruăk mkŏ mjing gru hmô bi ala êngiê tal êlâo, mdưm tur knơ̆ng kơ klei mkŏ mjing leh anăn mđĭ kyar Bruă kƀĭn ala Việt Nam. Dŭm hdră êlan dưi bi klă ti Tân Trào ăt adôk mâo boh tŭ ênuk gưl: mă mnuih ƀuôn sang jing phŭn, bi lar klei bi mguôp djuê ana, hmao pai mă klei găl hƀuê ênuk bi klă klei jing lăn čar. Mơ̆ng dŭm klei kčưm anăn, Bruă kƀĭn ala Việt Nam amâo mdei dưi bi kluôm, mlih mrâo klei mkŏ mjing leh anăn hdră ngă bruă, klă klơ̆ng jing anôk bruă bi ala gưl dlông hĭn mơ̆ng mnuih ƀuôn sang, anôk bruă klei dưi mơ̆ng knŭk kna gưl dlông hĭn mơ̆ng ala čar yang ƀuôn ngă phŭn Việt Nam.