Lŏ bi hdơr klei Trần Việt Hoà, Khua anôk bruă mkăp mbha pui kmlă, Hlăm phŭn bruă tuh tia ti anôk bi kƀĭn hŏng phung ngă bruă klei mrâo kơ bruă mkăp pui kmlă, mâo phŭn bruă tuh tia kiă kriê hrue 07/06/2023 – leh mâo hĕ klei kƀah pui kmlă yua hlăm yan bhang không knhal jih mlan 5, akŏ mlan 6 ti kwar dưr, ngă kơ klei khăt pui kmlă jêñ jêñ ti lu anôk.

Khădah gĭr jih ai tiê leh čiăng bi mâo djăp pui kmlă, ƀiădah kyua kƀah pui kmlă pioh mkăp kơ bruă duh mkra ala ƀuôn jing bruă klam amâo mâo dưi lŏ mgăl ôh. Hmei mâo leh klei akâo klei pap mñai kơ mnuih ƀuôn sang, kơ phung duh mkra, lehanăn lŏ sa blư̆ dơ̆ng akâo kơ phung ngă bruă klei mrâo bi lar klei thâo mkiêt mkriêm pui, kñăm jih jang mđrăm mbĭt mâo hdră êlan dưi găn klei dleh dlan anăn.

Boh sĭt klei kƀah pui kmlă ba leh klei hmăi amâo mâo djŏ điêt ôh hlăm klei duh mkra mnia mblei mơ̆ng phung duh mkra, lehanăn kơ klei hdĭp mda grăp čô mnuih. Êjai klei kwar dưr kƀah pui kmlă, êbeh 4.000 MW pui kmlă bi êran hŏng ai angĭn ti kwar krah, Lăn Dap kngư mrâo bi leh ƀiădah ka dưi bi mŭt mbĭt ôh hŏng êlan klei pui kmlă mbĭt, kyua adôk gun kpăk lu mta bruă, wăt hlăm kdrăp bi êran lehanăn klei ngă hră mơar mơ̆ng mdê bi alŭ wăl dôk găn klei dleh dlan. Leh mâo dŭm klei amâo mâo jăk anăn, anôk bruă knŭk kna kiă kriê, ngă mtam klei ksiêm duah, čŏng mkŏ mjing hdră êlan mă bruă mdrơ̆ng hŏng djăp mta klei dleh dlan kơ bruă mkăp pui kmlă, kñăm bi hrŏ klei luič liê kơ mnuih ƀuôn sang lehanăn kơ phung duh mkra.

          Mâo mtam lu klei gĭt gai, klei kiă kriê hŏng djăp mta hră mơar, dŭm asăp mtrŭn mơ̆ng knŭk kna, khua knŭk kna truh kơ dŭm phŭn dhar bruă, phung duh mkra – mtă hŏng ya mta klei dleh dlan, brei gĭr amâo mâo lui kƀah pui kmlă ôh – mâo bi êdah leh hlăm hlăk krah thŭn 2023, boh nik leh mâo dŭm klei čuăl mkă kluôm kơ bruă pui kmlă ala čar, klei čuăl mkă mđĭ kyar bruă pui kmlă ala čar, lehanăn klei čuăl mkă kdrap bi êran pui kmlă, bruă mkăp êa săng, êa pui, êwa čuh wưng thŭn 2021-2030, tă hdră truh kơ thŭn 2050 mâo leh khua knŭk kna bi mklă hlăm mlan 5,6,7 leh êgao. Klei čoh čuăn jing si srăng ngă čiăng kơ jih jang bruă dưi ngă djŏ hŏng hdră êlan čuăl mkă, rơ̆ng dưi djăp pui kmlă mơ̆? Nai prĭn Nguyễn Anh Tuấn, dôk hlăm êpul gơ̆ng bruă kreh knhâo mơ̆ng hră klei mrâo Năng lượng Việt Nam bi dlăng klă, hlăm kluôm ala êlâo hĭn, lehanăn kjăp nanao jing brei mâo hdră êlan kjăp kơ klei thâo mkiêt mkriêm pui kmlă, nao mđrĭng hŏng bruă duh bi liê hdră êlan mkăp pui kmlă mrâo:

2024-2025 tơdah lŏ găn hlăm yang bhang không sui msĕ hŏng mlan 5 mlan 6 leh êgao sĭt nik kwar dưr srăng lŏ lĕ hlăm klei kƀah pui kmlă mơh. Snăn ară anei amâo lŏ mâo hdră mkăn ôh, knŏng brei thâo mkiêt mkriêm klei yua pui kmlă. Knŭk kna, dŭm phŭn dhar bruă brei mâo hdră êlan mă bruă kjăp hĭn, amâo mâo lŏ bi mplĕ klei soh hdơ̆ng găp ôh, ƀiădah bi mâo hdră êlan kjăp hĭn djŏ tuôm hŏng klei mkăp pui...

Mâo nanao klei bi trông hlăm ala čar, lehanăn hŏng ala tač êngao kơ klei pui kmlă, hlăm anăn kơ bruă bi êran pui kmlă hŏng ai angĭn, lehanăn pil yang hrue, klei ba yua pui kmlă hŏng klei mkiêt mkriêm, hlăk bluh đĭ êdi ti thŭn    2023. Mâo leh lu klei akâo dưi bi êdah, msĕ si klei duh mkra mtah, doh, bi mlih bruă bi êran pui kmlă hŏng klei mtăp mđơr. Pô thơ̆ng kơ bruă duh mkra, nai prĭn   Võ Trí Thành hưn hŏng klei klă mngač: Klei kơ ai tiê, ngăn prăk, mnuih ngă bruă, kdrăp ngă bruă, lehanăn kơ klei bhiăn mă bruă brei pral bi ruh mgaih hĕ, kñăm čiăng ba klei găl kơ bruă duh bi liê mơ̆ng êngao knŭk kna, mđrăm mbĭt mđĭ kyar bruă pui kmlă, kyuadah hlăm grăp thŭn Việt Nam čiăng lŏ mâo thiăm ƀiă êdi mơ̆ng 14-16 êklai USD pioh hlue ngă klei čuăl mkă bruă pui kmlă 8 djŏ hŏng hdră.

Êlâo hĭn, čiăng bi mâo djăp pui kmlă kơ thŭn 2024, Khua phŭn bruă tuh tia tuh tia Nguyễn Hồng Diên mtă kơ dŭm êpul êya bruă djŏ tuôm ngă bi jăk 2 mta bruă čuăn, jing rơ̆ng bi mâo djăp mnơ̆ng pioh bi êran pui, lehanăn mkiêt mkriêm klei ba yua pui kmlă, lehanăn yap anei jing dua hdră yuôm bhăn kơ bruă čiăng bi mâo djăp pui kmlă ti thŭn 2024:

Ttui si asăp mtrŭn mrô 29/TTg mơ̆ng khua knŭk kna snăn grăp boh sang bi êran pui kmlă brei rơ̆ng kjăp bruă mâo djăp ênŭm klei găl kơ bruă bi êran pui kmlă. Čiăng dưi ngă ênŭm asăp mtrŭn mrô 20 mơ̆ng khua knŭk kna kơ bruă mkiêt mkriêm pui kmlă wưng thŭn 2023-2025. Bruă mkiêm pui kmlă jing bruă năng ngă êdi, wăt hŏng dŭm lăn čar mdrŏng, jih jang mnuih ăt thâo mkiêt mkriêm sơăi. Drei yua pui hŏng klei mkriêm. Kyua ênoh čhĭ pui kmlă amâo mâo yuôm ôh, kyua mâo klei kiă kriê brei mkiêt mkriêm, drei adôk ka tui ngă hŏng jih ai tiê ôh, kyuanăn yơh ngă luič liê pui ti hơăi muang mang jing prŏng snăk. Asăp mtrŭn mrô 20 mơ̆ng khua knŭk kna mblang leh klă mngač, brei drei ngă yơh./.