Kơiăng khua Anôk bruă kƀĭn ala Nguyễn Thị Thanh brei thâo: Hdră ruah phung bi ala bruă kƀĭn ala gưl XVI lehanăn bi ala Êpul gơ̆ng bruă ƀuôn sang dŭm gưl wưng thŭn 2026 – 2031 mkŏ mjing hlăm ai êwa hơ̆k mơak, ngă phŭn mil pô, mtăp mđơr, djŏ hdră bhiăn, êđăp ênang, mkiêt mkriêm lehanăn tŭ jing jăk siam, klă sĭt jing Hruê mơak lăn êa, hruê mơak prŏng mơ̆ng jih jang mnuih ƀuôn sang. Anei jing hdră kđi čar yuôm bhăn hŏng hdră mprăp ênŭm, klă klơ̆ng hŏng ai tiê đua klam, klei hgŭm sa ai mơ̆ng jih anôk bruă kđi čar mơ̆ng Gưl dlông truh kơ alŭ wăl.

Boh tŭ jăk siam mơ̆ng hdră ruah khua jing klei bi êdah klă mơ̆ng ai ktang bi hgŭm mguôp jih jang djuê ana, kơ klei thâo kiă kriê mơ̆ng Đảng lehanăn boh tŭ hdră mă bruă mơ̆ng jih anôk bruă kđi čar, mơ̆ng anăn mñă klă klei đăo knang kjăp mơ̆ng mnuih ƀuôn sang hŏng Đảng, Knŭk kna.

Kơ boh tŭ hdră ruah phung bi ala bruă kƀĭn ala, kluôm ala ruah leh ênŭm 500 čô bi ala mơ̆ng 863 čô mgơ̆ng ruah. Hlăm anăn, 214 čô bi ala mâo Gưl dlông hưn mthâo djŏ ruah, mâo ênoh lu. Hdră mkŏ dăp anôk bruă bi ala lŏ dơ̆ng mâo klei bi mlih jăk hluê hdră bi hrŏ ênoh bi ala dôk păn bruă, mđĭ ênoh phung bi ala thơ̆ng kơ bruă. Ênoh bi ala anôk bruă kƀĭn ala tĭng ngă bruă thơ̆ng kơ hdră bruă mâo djŏ ruah lu êdi mơ̆ng êlâo truh kơ ară anei, mâo 40%. Boh nik, Anôk bruă kƀĭn ala gưl 16 hŏng lu mta mrâo hlăm hdră mkŏ dăp phung bi ala, gưl tal êlâo mâo phung bi ala djuê ana Ơ Đu djŏ ruah, ênoh phung bi ala mniê mâo hlăm brô 30%, lŏ dơ̆ng krơ̆ng ti hnơ̆nglu. Anei ăt jing gưl tal êlâo ênoh phung bi ala mâo Gưl dlông hưn mthâo wĭt kơ dŭm alŭ wăl mgơ̆ng ruah mâo ênoh djŏ ruah păt dah ênŭm jih. Lê Ngọc Chung, mnuih ƀuôn sang ƀuôn hgŭm Phước Thắng (Bà Rịa - Vũng Tàu hđăp), Ƀuôn prŏng Hồ Chí Minh sa ai hŏng phung bi ala bruă kƀĭn ala gưl anei mâo hnơ̆ng thâo bi knar… lu phung djŏ ruah mâo hnơ̆ng thâo kđi čar, thâo kơ bruă kjăp, mâo lu mnuih djuê ƀiă.

“Jing sa čô mnuih ƀuôn sang kâo ƀuh snei, hlăm anăn phung bi ala bruă kƀĭn ala mrâo hưn mrâo djăp ênŭm, wăt hlăm anôk bruă kđi čar, wăt phung văn nghệ sĩ, mă bruă duh mkra, êpul djă phao ktuang. Anei jing klei năng mơak, bi êdah klei lu jơr lehanăn hnơ̆ng trah dlăng hlăm êpul nao hgŭm hlăm anôk bruă bi ala bruă kƀĭn ala. Boh nik, hŏng bruă klam jing mnuih ƀuôn sang anăp wưng mrâo mơ̆ng ala čar, kâo čang hmăng phung bi ala mrâo djŏ ruah bi êdah klei gĭr, klei đua klam, klei thâo, pral lehanăn mĭn mrâo. Năng jing phung bi ala klă sĭt mơ̆ng mnuih ƀuôn sang čiăng đru mguôp hlăm dŭm klei bhiăn, hdră mtrŭn ba ala čar mŭt hlăm ênuk gưl mrâo.

Dlăng kơ hnơ̆ng tŭ jăk, hdră mkŏ dăp phung djŏ ruah ngă pô bi ala bruă kƀĭn ala gưl 16, Tạ Thị Yên, Kơiăng khua Dhar bruă ksiêm dlăng phung bi ala, Kơiăng khua adŭ bruă Êpul hgŭm ruah khua ala čar mñă:

“Hnơ̆ng tŭ jăk phung bi ala djŏ ruah lŏ dơ̆ng mkra mđĭ klă sĭt. Mkŏ dăp phung bi ala ăt rơ̆ng phung bi ala ăt msĕ mơh bi knar plah wah dŭm êpul mbĭt anăn mâo leh knhuang nao yuôm bhăn, dưi mđĭ ênoh phung bi ala mâo klei thâo kơ bruă ăt msĕ mơh klei thâo ngă bruă rơ̆ng ênoh djŏ guôp plah wah pô bi ala mniê, mda asei lehanăn mnuih djuê ƀiă.

Êpul hgŭm ruah khua ala čar tĭng dlăng, hdră ruah tŭ jing jăk siam, rơ̆ng klei ngă phŭn mil pô, klă mngač, djŏ hdră bhiăn, êđăp ênang. Klei gĭt gai kjăp mơ̆ng Đảng jing mta phŭn rơ̆ng klei tŭ jing hdră ruah khua. Hdră knuă druh dưi mprăp klă klơ̆ng. Mbĭt anăn, mđing mjuăt bi hriăm, mđĭ hdră ksiêm dlăng, pral msir mghaih klei gun kpăk hlăm bruă hluê ngă. Nguyễn Hữu Đông, Khua dhar bruă ksiêm dlăng phung bi ala,  khua hlăm adŭ bruă Êpul hgŭm ruah khua ala čar mñă:

Boh tŭ ruah ênŭm 500 čii ala ala, 2.552 čô bi ala Êpul hgŭm bruă ƀuôn sang gưl čar lehanăn êbeh 72.437 čô bi ala Êpul gơ̆ng bruă ƀuôn sang gưl să, mñă leh hdră knuă druh mâo mprăp ênŭm, ngă phŭn mil pô, djŏ hdră bhiăn. Ênoh mnuih ƀuôn sang lu, ênoh mnuih nao mplĕ hră lu êdi mơ̆ng êlâo truh ară anei bi êdah leh klei thâo săng hlăm bruă kđi čar lehanăn klei đua klam mơ̆ng mnuih ƀuôn sang; hdră kiă kriê, gĭt gai mơ̆ng bruă Đảng, bruă knŭk kna dŭm gưl dưi pŏk ngă kjăp, mđrăm mbĭt, hdră hâo hưn mtô mblang dưi mkŏ mjing tŭ dưn”.

Hŏng klei tŭ jing mơ̆ng hdră ruah khua, lŏ dơ̆ng mñă klei mĭn, klei đăo knang lehanăn klei sa ai mơ̆ng mnuih ƀuôn sang hŏng Đảng, Knŭk kna, mjing tur knơ̆ng kjăp kơ Anôk bruă kƀĭn ala gưl XVI hluê ngă kjăp bruă klam hlăm wưng mrâo./.