Tui mđing klei phung bi ala êmuh khua phŭn bruă – Khua adŭ bruă djuê ana Hầu A Lềnh ti anôk bi kƀĭn tal 5 Bruă kƀĭn ala XV, mnuih ƀuôn sang kluôm ala lač, Khua phŭn bruă wĭt lač kơ djăp mta bruă hlăk dôk mđing, mblang djăp ênum kơ dŭm bruă adôk ka dưi ngă, bruă awăt, lehanăn bi êdah hdră êlan čiăng mghaih msir dôk hlăm bruă pô klam. Djŏ tuôm kơ klei hlue ngă hdră êlan lăn čar kñăm “Mđĭ kyar bruă duh mkra ala ƀuôn krĭng mnuih djuê ƀiă, lehanăn čư̆ čhiăng”, Trương Thế Vinh, knuă druh ngă bruă djuê ana ti kdriêk Ia Grai, čar Gia Lai lač knuă druh nah gŭ klă sĭt hlăk dôk tuôm hŏng klei dleh dlan êjai ngă bruă, ñu lač snei:

“Mâo lu hdră mơar mơ̆ng čar jing ka hmao sĭt ôh hŏng bruă knuă, boh nik hlăm nah gŭ êmưt kơ klei ktrâo atăt. Msĕ si bruă mrô 1 đru kơ klei sang dôk, lăn dôk, lăn pla mjing hlue hdră mtrŭn mrô 4 mơ̆ng khua knŭk kna đru kơ klei lăn dôk hŏng ênoh 44 êklăk/gŏ êsei lehanăn lăn pla mjing jing 22 êklăk/gŏ êsei snăn ƀuh jing dleh snăk dưi mă bruă. Lăn pla mjing ară anei jing đĭ yuôm, mkă hŏng ênoh đru anăn lehanăn prăk lŏ brei čan msĕ snăn, si mnuih ƀuôn sang dưi lŏ tloh blei lăn pioh pla mjing, thâo dah mdơ̆ng sang”.

 Lâm Tấn Bình – mnuih djuê ana Chăm ti să Phan Hiệp, kdriêk Bắc Bình, čar Bình Thuận lač, hlăm gưl tal êlâo mơ̆ng klei wĭt lač klei êmuh ti anôk bruă kƀĭn ala bi kƀĭn, Khua phŭn bruă wĭt lač leh hŏng klei klă, jih jang bruă mâo êmuh, boh nik hlăm dŭm hdră êlan mơ̆ng Đảng lehanăn knŭk kna djŏ tuôm hŏng bruă klam mơ̆ng phŭn bruă, lehanăn klei bi hgŭm hŏng dŭm phŭn dhar bruă. Lâm Tấn Bình ăt lač kơ klei dleh dlan mơ̆ng khua phŭn bruă Hầu A Lềnh hlak mblang djŏ kơ klei bhiăn, hdră êlan boh nik kơ klei bi liê ngăn prăk duh kơ bruă mđĭ kyar klei hdĭp mda ala ƀuôn hlăm krĭng mnuih djuê ƀiă:

“Hŏng bruă klam mơ̆ng khua phŭn bruă čoh čuăn kơ hdră hlăm wưng tinăp si srăng ngă čiăng kơ mnuih ƀuôn sang thâo săng lehanăn tŭ mă hdră êlan mơ̆ng Đảng lehanăn knŭk kna duh bi liê, čiăng bi djŏ hŏng klei jing, lehanăn klei hdĭp mnuih ƀuôn sang djuê ƀiă ti krĭng čư̆ čhiăng hŏng klei klă mngač, msĕ hŏng klei khua phŭn mâo bi mklă leh ti anôk bi kƀĭn wĭt lač klei êmuh anei”.

Tinăp bruă kƀĭn ala, k’iăng khua knŭk kna Trần Lưu Quang brei thâo: truh jih mlan 5/2023, kdrêč prăk kơ thŭn 2022 hlăm bruă anei knŏng djăp mă hlăm brô 58% ênoh prăk duh bi liê mđĭ kyar, prăk kơ thŭn 2023 knŏng mâo mă 17% ênoh prăk duh bi liê kơ bruă knuă. Êjai anăn hlăm 2 thŭn mkrah čiăng mâo ngă wưng tal 1 mơ̆ng bruă anei, jing kdlưn hĭn yơh mnuih ƀuôn sang djuê ƀiă mâo dưn yua êjai hlăk dôk hlăm klei dleh dlan. K’iăng khua knŭk kna ktrâo klă kơ dŭm klei gun kpăk hlăm bruă hlue ngă, kyuadah ênoh hră mơar ktrâo atăt dôk mâo klei mđĭ mđal, ba klei dleh kơ bruă bi liê ngăn prăk mơ̆ng gưl dlông. K’iăng khua knŭk kna lŏ mñă, hlăm kơ anăp mâo klei ruh mgaih bi jăk hĭn djŏ hŏng klei bhiăn kñăm pral mâo klei bi liê ngăn prăk knŭk kna djŏ tui si hdră êlan čiăng buh bi liê:

“Klei yuôm bhăn hĭn jing drei srăng mđĭ hĭn bruă mbha gưl, kơ alŭ wăl čiăng  dưi ngă bruă hŏng klei pral hĭn. Ya mta klei jing knŏng alŭ wăl kơ thâo si srăng ngă jing djŏ. Hŏng ai tiê hdră êlan mĭn brei mâo klei gĭr mghaih msir bi djŏ hŏng mta mtrŭn lehanăn djŏ hŏng klei jih jang mnuih dôk hmăng hmưi”.

          Mjưh ruĕ bruă ngă klei êmuh kơ bruă djuê ana, Khua bruă kƀĭn ala Vương Đình Huệ lač, klei êmuh anei klă sĭt bi êdah leh bruă klam, hŏng klei klă, lehanăn thâo bi rŭ mdơ̆ng. Bi êdah klă klei awăt kƀah, boh nik êmưh hlăm klei hlue ngă hdră êlan mă bruă jih jang bruă lăn čar kñăm. Mâo dŭm mta hră mơar ktrâo atăt êmưt truh, amâodah amâo mâo bi sa hnơ̆ng, ka klă mngač, ka ƀuh hnơ̆ng čoh čuăn klă ôh, Khua bruă kƀĭn ala lŏ mtă ti wưng kơ anăp bi hluê ngă hŏng klei kjăp hĭn djăp hdră êlan bi mâo hdră êlan mă bruă klă mngač, bi djŏ hŏng bruă duh mĭn kơ bruă djuê ana wưng thŭn 2021-2030. Iêo jak jih klei găl, ai dưi pioh duh bi liê mđĭ kyar bruă duh mkra ala ƀuôn krĭng mnuih djuê ƀiă lehanăn krĭng čư̆ čhiăng, hlăm anăn, mđing hĭn êdi hlăm dŭm alŭ wăl dôk hlăm klei dleh dlan, boh dôk hlăm alŭ wăl dleh dlan hĭn./.