Ƀăng jang knông Samat jing sa hlăm dua boh ƀăng jang knông lăn prŏng ti čar Tây Ninh hŏng ênoh mnơ̆ng mŭt kbiă găn ƀăng jang knông lăn mjhĭt m’uăt mtam yơh hlăm grăp hrue. Mbĭt hŏng klei jing găl ênưih mơh kơ mnơ̆ng čhĭ mnia soh hŏng klei bhiăn găn mŭt ti ƀăng jang knông lăn, snăn phung ngă bruă ti ƀăng jang knông lăn bŏ hŏng klei răng. Boh nik, leh klei ruă tưp êdu leh snăn êpul ngă bruă ti ƀăng jang knông lăn hlŏng tiŏ nao mtam êpul ngă bruă, čiăng kơ jih jang bruă dŭ ba mnơ̆ng dhơ̆ng găn ƀăng jang knông lăn pral mâo ngă bruă hŏng klei jăk, đru kơ bruă bi mnia mblei hŏng ala tač êngao. Snăn mơ̆ng akŏ thŭn truh kơ ară anei ti ƀăng jang knông lăn Samat ka tuôm mâo ôh ya mta klei amâo mâo jăk prŏng hŏng klei soh tlĕ čhĭ mnia mnơ̆ng mgưt. Nguyễn Nam Hồng Sơn, Khua anôk bruă ksiêm dlăng klei mŭt kbiă ti ƀăng jang knông lăn Samat brei thâo:

 “Klei bi tlĕ čhŏ mniă mnơ̆ng soh hŏng klei bhiăn mơ̆ng lu phung ngă soh, diñu dơ̆ng lŏ kgŭ mjhua hŏng hdră êlan mngač tač mơ̆ng hdră bhiăn lehanăn jih jang klei ngă hră mơar găl ênưih, snăn phung soh duah djăp mnêč čiăng dŭ ba mnơ̆ng soh hŏng klei bhiăn kñăm čiăng dêč đuĕ kơ jia, boh nik ti knông lăn Samat jing ƀăng jang knông lăn kơ êlan dơ̆ng, lehanăn tĭng kơ Campuchia jing krĭng ngă lŏ hma. Snăn boh klei bi čhĭ mnia mnơ̆ng soh hŏng klei bhiăn ti krĭng knông lăn jing dôk mâo nanao klei tlĕ mjhua prŏng snăk. Ƀiădah êdei kơ klei ruă tưp êpul bruă djŏ tuôm mâo pŏk ngă leh hŏng jih ai tiê bi kdơ̆ng hŏng phung tlĕ čhĭ mnia soh hŏng klei bhiăn, snăn alŭ wăl Samat anei ăt dôk nanao mơh klei tlĕ čhĭ mnia soh hŏng klei bhiăn tơdah amâo mâo klei răng”.

Ăt msĕ hŏng dŭm anôk bruă kiă kriê klei mŭt kbiă ti ƀăng jang knông lăn mkăn, Anôk bruă kiă kriê klei mŭt kbiă ti ƀăng jang knông lăn Samat dôk tlă anăp nanao hŏng klei dleh dlan hlăm bruă bi kdơ̆ng hŏng klei tlĕ mnơ̆ng mgưt, tlĕ čhĭ matuĭ lehanăn lu mta mnơ̆ng amâo mâo thâo bĭt phŭn agha găn ƀăng jang knông lăn, mjhuă mbĭt hŏng klei bi tlĕ čhĭ mnơ̆ng soh hŏng klei bhiăn, mbĭt hŏng mnơ̆ng mâo ênŭm hră mơar jăk čiăng duah êlan mâo mŭt găn knông lăn, hlăm anăn mâo lu mnơ̆ng kăm. Phung ngă soh kreh bi mlih nanao mnêč diñu găn êrô, đa đuĕ hlăm êlan klah, čiăng dŭ hliê mnơ̆ng êlan điêt, dêč đuĕ kơ klei êpul bruă djŏ tuôm tiŏ mă, Nguyễn Văn Đạt, Khua êpul ksiêm dlăng hlăm anôk kiă kriê klei mŭt kbiă ti ƀăng jang knông lăn Samat lač:

 “Jih jang ênhă să Tân Lập jing prŏng snăk, klông knông lăn dlông hlăm brô 35km, mâo lu êlan hnoh, êlan điêt, phung ghan mnia tlĕ čhĭ mnơ̆ng soh hŏng klei bhiăn kreh mkăm mnơ̆ng ktuê knông lăn, lehanăn dôk ti kdrêč lăn Campuchia. Kreh mŭt kma hlăm lăn Việt Nam êjai mlam, mâo mnuih kăp iêp ksiêm phung knuă druh ngă bruă djŏ tuôm, snăn êjai hlăm klei hiu suang, lehanăn duah ksiêm čiăng bi kdơ̆ng hŏng klei tlĕ čhĭ mnơ̆ng soh hŏng klei bhiăn. Tal dua, êjai êpul bruă kiă kriê amâo mâo ôh êpul truăn kơ bruă ksiêm klei čhĭ mnia soh hŏng klei bhiăn, snăn bruă anei kreh mâo êpul ngă bruă kluôm klam ngă snăn ênoh mnuih ngă bruă ƀiă mơh, anôk lĕ prŏng snăn bŏ hŏng klei dleh dlan.”

Bi klă jih jang klei găl, lehanăn klei dleh dlan mơ̆ng akŏ thŭn mtam, êpul êya ngă bruă čŏng păn kjăp boh klei mkŏ mjing hdră ngă bruă phŭn, lehanăn mâo dŭm hdră êlan mghaih msir klei dleh dlan, hlăm anăn mâo ngă dŭm mta bruă, msĕ si: Ksiêm dlăng kơ klei luič liê, lehanăn klei hrui wĭt ênŭm ngăn prăk kơ knŭk kna, mđĭ mlih hdră ngă hră mơar, mđĭ kyar hdră mă bruă hlăm anôk ksiêm dlăng klei mŭt kbiă, mlih bi kjăp klei ngă bruă ti knông lăn, ngă mtam dŭm bruă bi kdơ̆ng hŏng klei tlĕ čhĭ mnia soh hŏng klei bhiăn, klei mplư mlêč hlăm klei bi mnia mblei ti knông lăn mtam.

Mbĭt hŏng jih jang hdră lač leh kơ dlông, anôk bruă kiă kriê klei mŭt kbiă ti knông lăn Samat lŏ mđĭ hĭn leh bruă bi mguôp, kăp bi hưn ya mta klei mâo plah wah kahan răng mgang knông lăn, anôk bruă kiă kriê klei mnia mblei, kahan ksiêm dơ̆ng mâo leh klei bi mlih jăk, lu mta bruă mâo ngă leh hlăm klei mđrăm mbĭt mơ̆ng jih jang djăp êpul êya bruă. Nguyễn Nam Hồng Sơn, k’iăng khua anôk bruă ksiêm dlăng klei mŭt kbiă ti ƀăng jang knông lăn Samat brei thâo:

 “Čiăng kơ bruă kdơ̆ng hŏng klei tlĕ čhĭ mnia soh hŏng klei bhiăn bi jăk, snăn anôk bruă kiă kriê klei mŭt kbiă hlue ngă jih bruă klam pô, păn kjăp jih jang boh klei, bi hưn mthâo hdơ̆ng găp, lehanăn mâo klei kuôl kă dŭm klei bhiăn hgŭm mbĭt hŏng dŭm êpul bruă djŏ tuôm hlăm alŭ wă. Êngao anăn, phung knuă druh ngă bruă nao ksiêm phung tlĕ čhĭ mnia soh hŏng klei bhiăn, bi hưn mthâo hŏng kdrăp mrâo mrang, čiăng jih jang thâo klă mnêč diñu mplêč, lehanăn thâo kơ klei diñu êrô êbat. Hmei lŏ mjuăt bi hriăm kơ êpul bruă djŏ tuôm, srăng mâo klei mbŏ hĭn hdră êlan mă bruă, hdră bi hâo hưn, dŭm bruă mrâo čiăng kơ mnuih ngă bruă ngă jăk hĭng bruă jao kơ pô hlăm alŭ wăl”.

Knăm hlue ngă jăk jih jang dŭm ênoh čuăn jao lehanăn dŭm gưl kčah leh hlăm thŭn 2022, anôk bruă kiă kriê klei mŭt kbiă ti ƀăng jang knông lăn Samat lŏ dơ̆ng ngă bi kjăp jih jang bruă hŏng lu hdră, pral mkŏ mjing djăp hdră kñăm dưi gang mkhư̆, lehanăn bi kdơ̆ng ktang hŏng klei tlĕ čhĭ mnia soh hŏng klei bhiăn, lehanăn mnơ̆ng mgưt, đru bi kiă kriê kjăp djăp mta boh klei ti knông lăn, ƀăng jang knông lăn knư̆ hruê knư̆ mâo klei tŭ dưn hĭn./.