Klei kruak knăl mơ̆ng wưng păn bruă anôk bruă kƀĭn ala gưl 15 jing bruă mkŏ mjing hdră bhiăn hŏng klei mlih mrâo prŏng kơ klei mĭn, atăt hdră êlan kiă kriê mjing kơ ai bi ktưn prŏng. Boh nik mlih mrâo thiăm mbŏ đa đa mta hlăm hdră bhiăn phŭn thŭn 2013 mjing atur knơ̆ng kơ klei bhiăn kiă kriê nao hlăm bruă sang čư̆ êa alŭ wăl dua gưl, mđĭ hĭn klei mbha gưl, mbha klei dưi. Ksiêm wĭt boh tŭ dưn anăn, pô bi ala Nguyễn Thị Thủy, êpul mơ̆ng Thái Nguyên čang hmăng;

“Čiăng lŏ dơ̆ng hlue ngă jăk bruă mlih mrâo klei mĭn hlăm bruă mkŏ mjing klei bhiăn, čiăng kơ klei bhiăn dưi čoh čuăn dŭm jar kjăp, mâo knhuah bhiăn kjăp atăt kơ djăp hdră êlan nao djŏ hŏng klei knŭk kna čuăn kčah. Kyuanăn, hmei akâo kơ knŭk kna hlăm klei čih mkra klei bhiăn bi kñăm hlăm dŭm knuă hmăi djŏ, čiăng hlăm hdră êlan mă klei blŭ bi ƀhĭ hĭn pioh mâo hdră mtrŭn kjăp.”

Tui si pô bi ala Dương Khắc Mai, êpul mơ̆ng Lâm Đồng, hlăm wưng păn bruă kơ anăp, boh phŭn jing amâo mâo djŏ bruă mtrŭn lu mta klei bhiăn ôh, ƀiădah brei mâo klei kjăp, thâo dưn yua djŏ hdră bhiăn. Boh nik, hyuă kjăp hĭng klei kăp ksiêm mơ̆ng gưl dlông, kyuadah kreh mâo nanao dŭm klei amâo mâo găl, snăn ksiêm bi hmao lehanăn mghaih msir bi pral ti dŭm anôk ka djŏ:

“Wưng tinăp, klei yuôm bhăn tinei jing lŏ dơ̆ng bi leh hdră êlan čiăng kăp ksiêm, mđĭ ai, lehanăn lŏ kăp kčĕ bruă hlue ngă dŭm klei leh bi tŭ ư, klei leh bi mklă êdei kơ bruă leh ksiêm. Boh sĭt brei ƀuh, leh klei ksiêm ƀuh klei hlue ngă amâo mâo bi sa hnơ̆ng, amâo mâo kjăp snăn boh tŭ dưn klei hlue ngă ăt adôk awăt, ka djăp klei ktang ôh. Kyuanăn, kâo čang hmăng hlăm wưng păn bruă tinăp, lŏ mđĭ hĭng bruă kăp ksiêm mơ̆ng bruă kƀĭn ala.”

Bi êdah klă wưng păn bruă mơ̆ng bruă kƀĭn ala gưl 15 mâo leh lu klei bi mklă yuôm bhăn, djŏ tuôm lu hŏng bruă mđĭ kyar bruă duh mkra ala ƀuôn, jao dŭm klei bhiăn kjăp msĕ si kơ bruă mkra êlan klông, kơ dŭm bruă ala čar kñăm lehanăn dŭm bruă lông bi hmô hŏng dŭm klei bhiăn mrâo hlăm klei mđĭ kyar 10 boh čar, ƀuôn prŏng, pô bi ala Tô Ái Vang, êpul Cần Thơ čang hmăng:

“čang hmăng kơ knŭk kna lŏ kăp ksiêm, bi mklin, dŭm boh tŭ dưn hlue ngă dŭm hdră mtrŭn lông bi hmô kơ klei bhiăn, hdră êlan hjăn, čiăng bi mngač kơ klei ngă bruă djŏ lehanăn mâo klei tŭ dưn, mjing ai bluh đĭ prŏng, ti klei bhiăn adôk ka kjăp ôh, lehanăn ya ngă, čiăng lŏ mâo hdră êlan mlih mkra bi djŏ hlăm wưng tinăp, đăm mjing ôh anôk kƀah kơ klei bhiăn êjai mă bruă, amâodah ngă luič liê ai tiê lehanăn ngăn prăk mung mang. Bruă mlih jao, lehanăn lŏ čuê bruă mơ̆ng dua gưl bruă kƀĭn ala brei bi sa dơ̆ng hlăm klei hlue ngă dŭm hdră mtrŭn, mjing boh kdrŭt kjăp kơ hdră êlan mđĭ kyar bruă duh mkra ala ƀuôn klă sĭt kơ dŭm alŭ wăl hlăm kluôm ala.”

Bi hŏng klei hâo mdah bruă knuă wưng păn bruă 2021-2026 mơ̆ng knŭk kna, phung bi ala lač, hlăm boh klei ară anei hlăm ala čar lehanăn ala tač êngao dôk mâo lu klei bi mlih, ƀiădah hŏng klei gĭr prŏng, mă bruă amâo mâo mdei, jih ai tiê hlăm klei kiă kriê, knŭk kna mâo bi leh dŭm mta bruă prŏng kơ ênoh čuăn, mta kñăm, dŭm hdră mtrŭn mơ̆ng bruă kƀĭn ala. Klei lŏ kơrŭ wĭt, mđĭ kyar bruă duh mkra ala ƀuôn, iêo jak klei duh bi liê mâo mđing hĭn, mbĭt anăn lŏ kơrŭ dŭm mta bruă knŭk kna duh bi liê adôk ka dưi ngă leh, čiăng kơ jih jang bruă mâo boh tŭ dưn.

Bi êdah klei čang hmăng kơ wưng păn bruă ti anăp, pô bi ala Trần Hoàng Ngân, êpul ƀuôn prŏng  Hồ Chí Minh lač:

“Čhuang hlăm ênuk gưl mrâo, hŏng mta kñăm jing prŏng, lehanăn mjêč, sĭt nik drei srăng mă bruă ba wĭt klei tŭ dưn. Kâo čang hmăn kơ knŭk kna mđing mbĭt hŏng klei mđĭ kyar pral, brei rơ̆ng mâo boh tŭ dưn kjăp, boh nik klei hơĭt hlăm bruă duh mkra kluôm, lehanăn kơ klei bi mlih yan adiê ară anei, čiăng bi mâo hdră êlan duh bi liê, mkŏ bruă nah gŭ hlăm klei duh mkra ala ƀuôn dưi hơĭt kjăp, pral lŏ kơrŭ bruă, mđĭ kyar kjăp bruă êlan êdeh treng ênuk mrâo ară anei.”

 Hŏng dŭm klei đru mguôp klă mngač mơ̆ng phung bi ala bruă kƀĭn ala brei ƀuh, klei gĭr lŏ dơ̆ng mlih mrâo hŏng klei ktang hlăm bruă mkra mjing klei bhiăn, hlăm bruă kăp ksiêm, lehanăn bruă kiă kriê, kñăm mâo ngă jăk hlăm bruă mđĭ kyar klei duh mkra ala ƀuôn wưng ênuk mrâo. Phung bi ala mâo klei čang hmăng wưng păn bruă mơ̆ng anôk bruă kƀĭn ala gưl 15 srăng lŏ dơ̆ng čuê, bi leh lehanăn mđĭ hĭn čiăng kơ dŭm hdră êlan mă bruă mâo mtrŭn klă sĭt nao djŏ hŏng klei hdĭp./.