Êlan mŭt hlăm ƀuôn Bhô̆k, să Yang Tao, kdriêk Lăk doh bhung, 2 tĭng tuê êlan dưi bi msiam hŏng dŭm kpum mnga. Ti mmăt, kdrăp mtrang mngač êlan ƀuôn lŏ bi msiam thiăm kơ ƀuôn Bhô̆k. Klei hdĭp mnuih ƀuôn sang hlăm ƀuôn ƀrư̆ ƀrư̆ mâo klei mlih, ênoh gŏ sang ƀun ƀin thŭn 2022 hrŏ 9 gŏ sang mkă hŏng thŭn 2021. Hluê si ayŏng Y Al Trei, k’iăng khua bruă Đảng nah gŭ, Khua ƀuôn Bhô̆k, jih jang dŭm klei mlih anăn jing boh sĭt mơ̆ng hdră mtrŭn mrô 2 leh anăn mrô 5 mơ̆ng bruă Đảng kdriêk Lak, djŏ guôp hŏng klei hmăng hmưi mơ̆ng mnuih ƀuôn sang.

“Pô jak iêo mnuih ƀuôn sang nao kƀĭn čiăng hâo hưn, mtrŭt mjhar, mtô klei ngă bruă mơ̆ng hdră mtrŭn mrô 2 leh anăn mrô jing sa hdră, kyua hdră mtrŭn mrô 2 ñu sơnei, mâo êlan klông leh anăn pui mngač ktuê êlan, mnuih ƀuôn sang pla nga 2 nah êlan, leh anăn hdră mtrŭn mrô 5 mtô kơ mnuih ƀuôn sang hdră pla ana ƀơ̆ng ƀoh, rông êmô kbao. Leh kƀĭn hâo hưn 2; 3  blư̆ msĕ sơnăn, pô nao hâo hưn hlăm grăp sang leh anăn hâo hưn hŏng kdrăp hưn mthâo mrâo mrang hŏng facebook, zalo čiăng kơ mnuih ƀuôn sang thâo klă hĭn”.

Hdră mtrŭn mrô 2 leh anăn mrô 5 mơ̆ng Êpul khua bruă Đảng kdriêk Lak wưng păn bruă 2020 – 2025 dôk hluê ngă hrăm mbĭt ti dŭm să hlăm kdriêk. Hlăm anăn, hdră mtrŭn mrô 02 kơ bruă iêo mthưr dŭm ai dưi, kñăm mkŏ mjing leh anăn mđĭ kyar kdriêk Lak jing anôk hiu čhưn ênguê kñăm mơ̆ng čar ti thŭn 2030. Hdră mtrŭn mrô 05 hluê ngă bruă mkŏ wĭt ana pla mjing, mnơ̆nhg rông wưng thŭn 2021 – 2025. Hluê ngă 2 hdră mtrŭn anei, Ƀuôn Bhô̆k rŭ mjing leh êbeh 2.500m êlan klei pui mtrang mngač, pla 325 phŭn ana mnga ti dŭm bĭt êlan phŭn mŭt hlăm ƀuôn. Kluôm ênoh prăk ngă 2 hdră anăn jing 40 êklăk prăk mơ̆ng mnuih ƀuôn sang čŏng mkrum mguôp. Ƀuôn Bhô̆k ăt dưi mkăp brei 1000 phŭn mjeh ana ƀơ̆ng boh dŭm mta đru kơ dŭm gŏ sang ƀun ƀin. Amai H’Nguyệt Hatrơi ti ƀuôn Bhô̆k brei thâo, amâo djŏ knŏng mđup brei ana mjeh, knuă dru mtrŭt mđĭ bruă lŏ hma lŏ mtô kơ hdră pla mjing leh anăn kriê dlăng čiăng mâo hnư̆ hrui wĭt:

            “Kâo lač jăk kơ Đảng, knŭk kna mkăp brei leh ana mjeh kơ gŏ sang kâo. Khua ƀuôn ăt mâo klei uêñ mĭn kơ gŏ sang kâo. Kâo srăng gĭr kriê dlăng čiăng kơ ana ƀơ̆ng boh đĭ hriê, êdei anăp mâo hnư hrui wĭt čiăng yua kơ klei hdĭp.”

            Hluê si Nguyễn Văn Huyên, Khua bruă Đảng să Yang Tao, kdriêk Lăk, čiăng kơ dŭm hdră êlan mơ̆ng Đảng nao hlăm klei hdĭp, yuôm bhăn hĭn ăt jing phung knuă druh. Boh nik hŏng krĭng mnuih djuê ƀiă, tơdah phung knuă druh thâo săng klă alŭ wăl, jĕ hŏng mnuih ƀuôn sang, thâo mbruă srăng dưi hmar ba hdră mtrŭn mơ̆ng Đảng truh kơ mnuih ƀuôn sang.

“Ară anei phung đảng viên mda asei msĕ si Y Al Trei jing phung khua ƀuôn sơăi. Hlăm klei ktuê dlăng ñu ngă bruă, ñu bi lar nanao bruă klam leh anăn hluê ngă jăk dŭm mta bruă hlăm alŭ wăl. Mrâo anei hluê ngă hdră mtrŭn mrô 5 leh anăn mrô 2, kñăm kơ 2 hdră mtrŭn anei truh kơ phung khua ƀuôn leh anăn iêo jak jih ai dưi jao kơ alŭ ƀuôn mtruh mjhar mnuih ƀuôn sang bi mkrum mguôp prăk čiăng pla mnga leh anăn dưm pui mtrang mngač ktuê êlan, mrâo anei ƀuôn Bhô̆k dưm pui mtrang mngač ktuê êlan, mâo mnuih ƀuôn sang sa ai”.

Phung đảng viên mnuih djuê ƀiă mda asei thâo mbruă msĕ ayŏng Y Al Trei dôk đru mguôp kơ bruă hâo hưn, ba hdră mtrŭn mơ̆ng Đảng, hdră êlan knŭk kna truh kơ mnuih ƀuôn sang, ƀrư̆ ƀrư̆ đru kơ mnuih ƀuôn sang bi mlih klei mĭn truh kơ bruă ngă čiăng mkŏ mjing klei hdĭp ƀrư̆ hruê ƀrư̆ jăk siam hĭn./.