01.  Mprăp ai dưi, klei gĭr ba lăn čar hlăm ênuk kpưn đĭ

Dŭm boh tŭ dưn dưi mâo leh 40 thŭn mlih mrâo ti gŭ klei gĭt gai mơ̆ng Đảng đru kơ Việt Nam bi kƀĭn ai dưi leh anăn ai ktang kơ klei đĭ kyar kdlưn hĭn hlăm wưng kơ anăp. Khua gĭt gai Đảng Tô Lâm mñă klei anei jing wưng bi kƀĭn kluôm dŭm ai dưi, ai ktang čiăng kơ lăn čar mŭ hlăm wưng mrâo, ênuk kpưn đĭ mơ̆ng djuê ana lŏ čuê kơ ênuk êngiê, mkŏ mjing yang ƀuôn ngă phŭn leh anăn ênuk mlih mrâo. Klei kƀĭn trông tal 10, Êpul khua bruă Đảng gưl dlông gưl 13 bi klă ênuk kpưn đĭ mơ̆ng djuê anan Việt Nam srăng kčưm mơ̆ng klei kƀĭn tal XIV mơ̆ng Đảng. Čiăng dưi mâo mta kñăm anei, mơ̆ng ară anei mtam, Kluôm Đảng, jih jang mnuih ƀuôn sang  čiăng kñăm 3 klei kdlưn hĭn hdră êlan jing mlih mrâo klei kiă kriê, bi khuăt klei ngă bruă leh anăn mđĭ hnơ̆ng tŭ jăk ai dưi, kriê dlăng kjăp, mkŏ mjing klei đĭ kyar, mbĭt anăn bi kơrŭ klei ktưn hưn djuê ana, ai tiê čŏng pô, bi mguôp kjăp hŏng ai ktang ênuk gưl, ba lăn čar đĭ kyar kluôm dhuôm, ktang phĭt, klưn hĭn leh anăn đĭ phiơr.

02. Khua gĭt gai Đảng Nguyễn Phú Trọng djiê

Hruê 19/7/2024, Khua gĭt gai Đảng Nguyễn Phú Trọng djiê leh sa wưng ruă kjham ngă kơ kluôm Đảng, jih jang mnuih ƀuôn sang lehanăn ƀĭng găp tar rŏng lăn hnĭng ênguôt. Asăp hưn mthâo ti knăm čang ênuh Khua gĭt gai Đảng Nguyễn Phú Trọng lač klă: “Dăl hlăm ktuê êlan, klei mĭn mơ̆ng Nguyễn Phú Trọng jing Mnuih ƀuôn sang, jing anak mnuih, jih ai tiê ngă bruă kơ mnuih ƀuôn sang, mkŏ mjing anak mnuih mrâo yang ƀuôn ngă phŭn lehanăn amâo bi kjăp klei bi hgŭm mguôp hluh lir, tal êlâo hĭn jing hgŭm mguôp hlăm kluôm Đảng, bi mguôp jih jang djuê ana lehanăn bi hgŭm mguôp hŏng ƀĭng găp tar rŏng lăn kpă mngač. Klei hdĭp lehanăn hdră mă bruă mơ̆ng Khua gĭt gai Đảng Nguyễn Phú Trọng bi êdah klei bi hgŭm mguôp, kdơ̆ng mblah amâo mâo mdei mơ̆n sa čô cộng sản jhŏng ktang, jih klei hdĭp ênuah ênô, sa gru hmô jăk siam êdi kơ brua tui hriăm, hluê ngă klei mĭn knhuah hdĭp mngač Hồ Chí Minh. Dŭm bruă ngă tŭ yuôm mơ̆ng Khua gĭt gai Đảng Nguyễn Phú Trọng ngă leh jih mkŏ mkra anôk bruă kđi čar kjăp ktang, klei đăo knang kjăp hlăm klei hgŭm mguôp djuê ana srăng jing ngăn dưn yuôm bhăn kơ Đảng, Knŭk kna lehanăn mnuih buôn sang drei./.

03 Mkŏ dăp bi khuăt mnuih mă bruă – knhuang yuôm hlăm bruă kiă kriê lăn čar

            Găn 7 thŭn hluê ngă Hdră mtrŭn 18-NQ/TW hruê 25/10/2017 mơ̆ng Êpul khua bruă Đảng gưl dlông gưl 12 kơ bruă mlih mrâo, mkŏ dăp mnuih mă bruă mơ̆ng bruă kđi čar, truh kơ ară anei, drei dưi mâo leh đa đa boh tŭ dưn yuôm bhăn. Ƀiădah, klei ngă bruă ăt adôk mtŭk mtŭl, lu gưl, lu akŏ, boh tŭ klei ngă bruă ka djăp ênŭm klei čiăng, bruă klam. Hruê 25/11, hlăm klei kƀĭn trông Êpul khua bruă Đảng gưl dlông tal 13, Khua gĭt gai Đảng Tô Lâm mñă kơ gưl bruă Đảng nah gŭ, êpul bruă Đảng, anôk bruă, dŭm gưl bruă, dhar bruă, êlâo hĭn jing knuă druh gĭt gai, pô ba anăp mâo klei bi hmô, čŏng pô, ktang phĭt hlăm bruă klam dưi jao hluê si ai tiê “êran êjai, dăp êjai”, gưl dlông amâo mâo čang guôn gưl čar, gưl čar amâo mâo čang guôn gưl kdriêk, gưl kdriêk amâo mâo čang guôn gưl nah gŭ, gĭr bi leh bruă ksiêm wĭt hluê ngă hdră mtrŭn 18-NQ/TW leh anăn hưn mdah Êpul khua bruă Đảng gưl dlông kơ hdră êlan mkŏ dăp, bi kluôm phung mă bruă kđi čar hlăm wưng tlâo mlan tal 1 thŭn 2025.

Bruă mkŏ dăp, bi khuăt mnuih mă bruă jing bruă čiăng kơ klei jhŏng, klei săn asei mơ̆ng knuă druh, phung mă bruă knŭk kna, mñă srăng ngă hŏng klei klă mngač, kreh knhâo čiănjg mprăp ba lăn čar hlăm ênuk mrâo.

04 Hdră duh mkra Việt Nam đĭ kyar kjăp, GDP đĭ kyar hlăm brô 7%

Hdră duh mkra Việt Nam ăt krơ̆ng kjăp hdră krŭ wĭt hlăm thŭn 2024. Đĭ kyar GDP đăo tĭng mâo hlăm brô 7%, klei prăk luič ênoh dưi ksiêm dlăng gŭ 4%, mâo mta kñăm kčah mtrŭn.  Ênoh prăk bi mnia mblei hŏng ala tač êngao mâo lu êdi truh 800 êklai USD, ba čhĭ mnơ̆ng kơ ala tač êngao giăm 23 êklai USD, hnơ̆ng đĭ lu êdi mơ̆ng êlâo adih truh kơ ară anei. Jak iêu prăk duh bi liê FDI mâo êbeh 31 êklai USD, dôk hlăm êpul 15 ala čar dôk jak iêu hdră FDI lu êdi tar rŏng lăn. Hlăk hdră duh mkra mâo lu klei bi mlih, klei đĭ kyar anei amâo djŏ knŏng jing tur knơ̆ng kơ hdră đĭ kyar hlăm thŭn 2025 ƀiădah lŏ bi êdah hdră đĭ kyar pral mơ̆ng anôk bruă duh mkra Việt Nam./.

05 Bi kluôm dŭm bruă păn khua gĭt gai Đảng leh anăn Knŭk kna, lŏ dơ̆ng “Amâo mâo anôk kăm aghă” hlăm bruă ƀuah mkra knuă druh ngă soh

Thŭn 2024, bruă bi kluôm phung mă bruă gưl dlông mơ̆ng Đảng leh anăn Knŭk kna mkŏ mjing hŏng klei bi tŭ ư, mđing truh mđĭ hĭn boh tŭ dưn gĭt gai leh anăn kriê dlăng lăn čar, rơ̆ng kơ klei đĭ kyar hơĭt kjăp. Klei kƀĭn trông Êpul khua bruă Đảng gưl dlông Đảng Cộng sản Việt Nam gưl XIII dưi bi mni, hŏng ênoh hră kluôm dhuôm, ruah Tô Lâm, Khua hlăm Phŭn bruă kđi čar, Khua lăn čar păn ngă Khua gĭt gai Đảng. Bruă Kƀĭn Ala gưl 15 ruah leh Khua bruă kƀĭn ala Trần Thanh Mẫn leh anăn Khua lăn čar Lương Cường, mbĭt hŏng anăn jing bruă bi kluôm dŭm bruă păn gĭt gai ti Bruă Kƀĭn Ala, knŭk kna leh anăn dŭm anôk bruă hdră bhiăn. Bruă mkŏ mjing, ƀuah mkra hlăm Đảng leh anăn bi kdơ̆ng hŏng klei ƀơ̆ng ngăn, klei amâo mâo jăk lŏ jing mta kñăm hlăm thŭn 2024. Lu phung knuă druh gưl dlông mơ̆ng Đảng, knŭk kna tŭ klei ƀuah mkra, brei ƀuh klei “Amâo mâo anôk kăm aghă, amâo mâo knhal”, bi êdah klei gĭr mkŏ mjing bruă kđi čar ênuah ênô, kjăp ktang.

06 Angĭn êbŭ mrô 3 ba lu klei truh kjham kơ mnuih lehanăn ngăn drăp ti kwar Dưr

Angĭn êbŭ mrô 3 (angĭn êbŭ Yagi) jing angĭn êbŭ ktang êdi hlăm wang 30 thŭn êgao ti krĭng ksĭ Ngŏ, tlă hlăm kwar Dưr ala čar drei hlăm hruê 7/9/2024 hŏng hnơ̆ng angĭn truh ti gưl 17, ba lu klei truh kjham. Angĭn êbŭ anei ngă leh adiê hjan prŏng, angĭn ktang lehanăn ngă klưh lăn ti lu anôk, ngă 323 čô djiê, 22 čô luič ka thâo ƀuh lehanăn 1.978 čô êka, klei luič liê hdră duh mkra mâo êbeh 81.700 êklai prăk. Knŭk kna pral mâo hdră gĭt gai, mdrơ̆ng mơ̆ng hnưm, mơ̆ng kbưi, gĭr mdrơ̆ng hŏng angĭn êbŭ, ba mdah dŭm hdră mtrŭn mjêč kñăm msir mghaih klei truh, rơ̆ng kơ bruă mkŏ mkra anôk bruă nah gŭ lehanăn bi hơĭt klei hdĭp mnuih ƀuôn sang leh angĭn êbŭ. Hlăm klei truh anei, ai tiê “Hla tĭ luôm hla hmum” mơ̆ng djuê ana Việt Nam dưi mđĭ ktang êdi. Dŭm hdră đru kơ mnuih mâo klei truh dưi lar bra hlăm kluôm ala čar, pral đru kơ mnuih ƀuôn sang krĭng yan adiê ngă hgao klei dleh dlan, bi hơĭt klei hdĭp./.

07 Klei kdlưn hĭn kơ êlan klông leh anăn pui kmlă mơ̆ng dŭm hdră êlan

Thŭn 2024, dŭm hdră kñăm kơ êlan klông leh anăn pui kmlă dưi leh anăn dôk mkŏ mjing boh kdrŭt mđĭ kyar bruă duh mkra, rơ̆ng kơ pui kmlă hơĭt kjăp, mñă klă hdră êlan kơ klei đĭ kyar hơĭt kjăp mơ̆ng lăn čar. Truh kơ ară anei, êbeh 2000km êlan dơ̆ng pral dưi ba yua leh anăn gĭr bi leh 3.000km êlan dơ̆ng pral hlăm thŭn 2025. Hdră rŭ mkra êlan klei pui kmlă 500Kv 3 aruăt klei Quảng Trạch - Phố Nối dưi mphŭn pŏk ngă. Hlăm klei kƀĭn tal 8, Bruă Kƀĭn Ala gưl 15 bi klă hdră mtrŭn duh bi liê mkra êlan êdeh treng prăl Dưr – Dhŭng, bi leh mta kñăm hlăm thŭn 2035. Bruă Kƀĭn Ala ăt bi klă mkŏ wĭt hdră sang măi bi êran pui kmlă hạt nhân Ninh Thuận, kñăm bi mâo djăp pui kmlă leh anăn mđing truh mta kñăm êwa čhŏ knar hŏng 0 hlăm thŭn 2050. Hŏng tač êdeh phiơr Long Thành, Bruă Kƀĭn Ala tŭ ư wưng tal 1 duh bi liê dua êlan đĭ trŭn êdeh phiơr ti Nah Dưr leh anăn sa sang ga kơ tuê mbĭt hŏng dŭm hdră đru hrăm mbĭt hŏng hnơ̆ng 25 êklăk čô tuê hlăm sa thŭn, 1,2 êklăk tôn mnơ̆ng dhơ̆ng hlăm sa thŭn.

08 Mlih mrâo hlăm bruă čih mkra hdră bhiăn lehanăn dŭm hdră mtrŭn prŏng

Anôk bruă kƀĭn ala gưl XV mâo leh gru kruăk prŏng hlăm thŭn 2024 hŏng dŭm hdră mtrŭn mlih mrâo klei mĭn hlăm bruă čih mkra hdră bhiăn lehanăn msir mghaih dŭm bruă yuôm bhăn mơ̆ng ala čar. Hŏng 2 klei bi kƀĭn grăp gưl lehanăn 2 klei bi kƀĭn mjêč hlăm thŭn 2024, Anôk bruă kƀĭn ala gưl XV ksieme dlăng lehanăn bi mklă lu hdră mtrŭn djŏ tuôm kơ bruă čih mkra hdră bhiăn, ksiêm dlăng gưl dlông lehanăn bi mklă lu bruă yuôm mơ̆ng ala čar. 18 hdră bhiăn lehanăn 21 hdră mtrŭn dưi bi mklă msĕ si Hdră bhiăn Lăn ala, Sang dôk lehanăn Hdră bhiăn Mnia mblei lăn ala, sang dôk dưi ba yua hnưm hĭn 5 mlan, mŏng hruê 1/8/2024. Dŭm klei čih mkra Hdră bhiăn yuôm bhăn mkăn msĕ si Hdră bhiăn Duh bi liê, Hdră bhiăn Duh bi liê knŭk kna lehanăn Hdră bhiăn čuăl mkă dưi bi mklă kñăm ruh mtlaih klei gun kpăk hlăm klei bhiăn, mtrŭt mđĭ hdră kah mbha gưl lehanăn msir mghaih hnơ̆ng ngă bruă duh mkra pla mjing. Hŏng ai tiê mlih mrâo, lăm lui klei mĭn “Amâo dưi kriê srăng kăm”, Anôk bruă kƀĭn ala čih mkra leh hdră bhiăn kơ dŭm bruă mrâo, mtrŭt mđĭ klei mĭn mrâo, ba yua jih klei găl mâo, mjing tur knơ̆ng kơ hdră mđĭ kyar hơĭt kjăp ala čar hlăm wưng mrâo./.

09 Lăn čar hrăm mbĭt lăm lui sang dôk êjai, sang tĭ ƀrôč

Hruê 5/10/2024, knŭk kna leh anăn Êpul khua gĭt gai dhar bruă gưl dlông mặt trận čar kwar Việt Nam mkŏ mjing hdră mtrŭt mjhar đru lăm lui sang dôk êjai, sang tĭ ƀrôč hlăm kluôm ala hŏng akŏ “Sang dôk kơ mnuih ƀuôn sang kâo”. Khua knŭk kna Phạm Minh Chính iêo mthưr, hlei mâo mnơ̆ng mguôp mnơ̆ng, hlei mâo ai mguôp ai, mâo lu mguôp lu, mâo ƀiă mguôp ƀiă hŏng mta kñăm bi leh bruă lăm lui 153.000 sang dôk êjai, sang tĭ ƀrôč hlăm kluôm ala êlâo kơ hruê 31/12/2025. Khua knŭk kna mñă kơ dŭm Phŭn, dhar bruă, bruă sang čư̆ êa dŭm čar, ƀuôn prŏng gưl dlông kñăm gĭt gai, ktrâo lač, bi lar bruă klam leh anăn nao mbĭt mơ̆ng pô ba anăp, nao êlâo hlăm bruă mđĭ hnơ̆ng tŭ jăk, boh tŭ dưn mơ̆ng dŭm ai dưi čiăng ngă bruă đru sang dôk kơ phung mâo ai đru brua krŭ kdơ̆ng, gŏ sang ƀun, giăm ƀun, mkŏ mjing hdră êlan klă klơ̆ng čiăng mkŏ mjing, hluê ngă tŭ dưn, đru hluê ngă tŭ jing mta kñăm lăm lui sang dôk êjai, sang tĭ ƀrôč hlăm kluôm ala.

10 Wăl anôk čhĭ lăn ala sang dôk lehanăn mah mâo klei bi mlih prŏng

Thŭn 2024 jing thŭn mâo lu klei bi mlih hŏng wăl anôk čhĭ lăn ala sang dôk lehanăn mah ti Việt Nam hlăk 2 wăl anôk anei đĭ ênoh lu êdi lehanăn dleh dưi ksiêm dlăng,. Ênoh čhĭ sang đĭ lu mkă hŏng hnư hrui wĭt mơ̆ng mnuih ƀuôn sang, ngă luič klei bi knar plah wah ngăn drăp lehanăn klei dưi tĭng tla mơ̆ng mnuih ƀuôn sang, ngă kơ wăl anôk anei amâo hơĭt kjăp lehanăn dleh dưi ksiêm dlăng. Wăl anôk čhĭ mah ăt đĭ ênoh lu êdi mkă hŏng ênoh kah knar mơ̆ng dŭm thŭn êlâo kơ mâo klei ruă COVID-19. Dŭm klei anei brei mâo hdră mtrŭn ksiêm dlăng tŭ dưn hĭn, mđing truh kơ bruă bi hrŏ klei mkăm pioh, mtrŭt mđĬ hdră duh bi liê hlăm wưng sui lehanăn rơ̆ng kơ wăl anôk čhĭ mnơ̆ng anei bi knar hŏng boh tŭ mơ̆ng mnuih ƀuôn sang lehanăn hdră duh mkra./.