Grăp mmăt knăm 1 leh anăn knăm 4 hlăm hruê kăm, adŭ mtô boh hră ti ƀuôn Kret Krot, să H’ra, kdriêk Mang Yang hŏng pui mtrang mngač, kwang ênai phung hriăm răk boh hră. Adŭ hriăm anei mâo êbeh 40 čô, mơ̆ng phung hđeh truh kơ phung ama, phung amĭ jing mnuih Bahmar mơ̆ng ƀuôn Kret Krot.

Leh sa hruê mă bruă suăi êmăn, Amai Sen (45 thŭn), nao ti adŭ hriăm djŏ mmông čiăng hriăm čih boh hră. Msĕ hŏng lu phung amai adei mkăn, amai Sen dôk ung mơ̆ng ưm, gŏ sang dleh dlan, amâo mâo nao sang hră. Ară anei adŭ mtô boh hră dưi pŏk, amai gĭr nao hriăm kyua dlăng anei jing mmông găl kơ pô.

 “Kâo amâo mâo thâo hră, čiăng nao hriăm čiăng thâo hră, thâo čih anăn pô, nao anôk anei anôk dih thâo čih anăn pô”.

Ăt msĕ sơnăn mơh, amai Mah (29 thŭn) ăt nao ti adŭ hriăm leh sa hruê ngă bruă lŏ hma. Kngan khăng gơ̆k mơ̆ng mnuih knŏng mưng hŏng klei djă wăng, djă kgă, ară anei lŏ ktuê čih grăp boh hră – grăp mrô. Khădah dleh dlan, amai Mah ăt gĭr hriăm boh hră kyua đăo knang thâo boh hră srăng đru lu sơnăk kơ asei pô, kơ gŏ sang pô.

 “Kâo nao hriăm čiăng thâo boh hră čiăng kơ êdei anăp nao anôk anei anôk dih, pô thâo boh hră ăt ênưih hĭn. Msĕ ară anei pô amâo mâo thâo boh hră ti anôk nao arăng ăl sơăi, msĕ hruê mdih nao sang êa drao kyua anak ruă, arăng brei čih anăn pô amâo mâo thâo êa mdrao ăl mơh, kyuanăn huĭ sơnak. Ară anei knŏng čiăng nao sang hră čiăng thâo boh hră, nao anôk anei, anôk dih ăt jăk hĭn”.

Mjĕ mjuk hŏng mnuih ƀuôn sang, Trung uý Lê Tuấn Thành – kahan ksiêm să H’Ra, kdriêk Mang yang, čar Gia Lai thâo klă klei hmăng hmưi mơ̆ng mnuih ƀuôn sang. Amâo mâo thâo hră, kyuanăn mnuih ƀuôn sang tuôm hŏng lu klei dleh dlan êjai ngă dŭm mta hră mơar knŭk kna gưl să. Kyuanăn, mâo klei tŭ ư mơ̆ng gưl bruă nah dlông, bruă đảng, bruă sang čư êa alŭ wăl, Trung uý Lê Tuấn Thành  jing sa čô nai čiăng dru kơ dŭm gŏ sang thâo boh hră, thâo yap, mơ̆ng anăn ƀrư̆ ƀrư̆ bi mlih knhuah mĭn, hdră ngă hlăm klei mđĭ kyar bruă duh mkra.

 “Mphŭn kčưm adôk dleh dlan kyua mnuih ƀuôn sang dôk mâo klei hêñ, hêñ kơ bruă nao hriăm boh hră. Mnuih ƀuôn sang jing mnuih Bahnar kyuanăn klei blŭ hrăm hŏng mnuih ƀuôn sang ăt mâo klei dleh kyua klei blŭ, ƀuh klei kbưi kyua ka ƀuh klei yuôm bhăn. Čiăng kơ kơ adŭ hriăm anei mkŏ hŏng jar bruă kđi čar, dŭm khua ƀuôn, kahan ksiêm, bi mguôp hŏng phung hriăm leh anăn mâo boh tŭ dưn srăng mâo hnư mnơ̆ng, mnơ̆ng brei kơ phung hriăm”.

Să H’ra, kdriêk Mang Yang, čar Gia Lai mâo 9 alŭ, ƀuôn, hnơ̆ng mnuih ƀuôn sang jing mnuih djuê ƀiă mâo truh kơ 2/3, lu jing mnuih Bahnar. Dung – k’iăng khua bruă sang čư êa să H’Ra brei thâo, bruă nai Lê Tuấn Thành ngă bruă mtô boh hră, pluă mbĭt bruă hâo hưn leh anăn mtrŭt mjhar mnuih ƀuôn sang, đru kơ kahan ksiêm să bi mguôp hĭn hŏng mnuih ƀuôn sang, ngă jăk bruă čung ba mnuih ƀuôn sang.

“Hriăm boh hră čiăng thâo lu hĭn, êjai pô ngă bruă hâo hưn srăng ênưih hĭn, êdei anăp mnuih ƀuôn sang ngă dŭm mta bruă, mkra mjing, blei hbâo pruê, êa drao gŭn đru kơ bruă mkra mjing, mđĭ kyar bruă duh mkra. Bruă sang čư êa alŭ wăl mkŏ mjing klei mtrŭt mjhar mnuih ƀuôn sang msĕ si hâo hưn kơ klei bi dôk ung mô̆ mơ̆ng mda, bi dôk anak amiêt awa kơ mnuih ƀuôn sang srăng ênưih hĭn. Hmăng hmưi dŭm adŭ hriăm anei dưi pŏk ti ƀuôn Kret, Krot srăng pŏk mlar truh ti ƀuôn mkăn”.