Hlăm klei mpŭ ti sanh dhar kreh ƀuôn Diêo, să Bông Krang, kdriêk Lăk, čar Daklak ti anăp hla čhiăm gru Lăn čar, hla čhiăm gru Đảng, ti anăp rup khua gĭt gai Hồ Chí Minh, H Mên Teh hŏng klei kraih ktang đŏk pô ƀuăn hlăm mmông mŭt jing đảng viên mrâo.

“Kut kat sĭt suôr hŏng hdră êlan mơ̆ng Đảng, hlue gưt kjăp klei bhiăn bruă kđi čar, klei bhiăn Đảng, hdră mtrŭn, asăp mtrŭn mơ̆ng Đảng, klei bhiăn knŭk kna. Bi leh jăk bruă čuăn mâo jao. Akâo ƀuăn, akâo ƀuăn!”

 H Mên Teh, kkiêng thŭn 1996, djuê ana M’Nông, leh lu thŭn gĭr hlăm djăp mta bruă truh ară anei jing leh đảng viên tal 9 hlăm êpul bruă Đảng ƀuôn Diêo. H Mên Teh lač:

“Kâo ƀuh bŏ hŏng klei myun lehanăn mâo klei pưng myưng leh dưi jing sa čô   đảng viên Đảng Cộng Sản Việt Nam. Kâo srăng gĭr hĭn hlăm djăp mta bruă ti ƀuôn sang”.

Bi mŭt đảng viên mrâo hlăm krĭng mnuih djuê ƀiă jing klei amâo mâo djŏ ênưih ôh, boh nik hŏng dŭm boh să krĭng taih kbưi hlăm kdriêk Lăk. Ƀiădah hŏng klei gĭr “Čiăng mkŏ mjing, lehanăn mđĭ kyar êpul bruă Đảng hŏng klei kjăp” snăn djăp anôk bruă đảng bi mkŏ mjing hdră mă bruă klă mngač, bi mâo hdră mtrŭn, ênoh čuăn kơ grăp êpul bruă Đảng, jih ai tiê ba êlan êlâo, mjing klei lông dlăng jing klei găl kơ klei mđĭ kyar bruă duh mkra ala ƀuôn ti alŭ wăl. Y Wu Sruk, K’iăng khua să Yang Tao, kdriêk Lăk lač:

“Hŏng klei găl tinei jing mnuih alŭ wăl, lehanăn să Yang Tao jing să krĭng 3, dôk hlăm klei dleh dlan, truh 95% jing mnuih djuê ƀiă. Snăn drei thâo săng kơ klei bhiăn mnuih ƀuôn sang tinei, boh nik hlăm klei blŭ tlao nao hriê blŭ hrăm hŏng mnuih ƀuôn sang čiăng kơ digơ̆ư ênưih thâo săng. Leh mâo klei thâo bi săng, drei dưn yua dŭm hdră êlan mơ̆ng Đảng, klei bhiăn knŭk kna truh hŏng mnuih ƀuôn sang čiăng kơ mnuih ƀuôn sang thâo săng hĭn lehanăn ba yua hlăm klei hdĭp”.

Tui si aduôn Đào Thị Thanh An, K’iăng khua bruă Đảng kdriêk Lăk, čar Dak Lak, mơ̆ng alŭ wăl jing anôk lu mnuih djuê ƀiă, êpul kiă kriê bruă Đảng kdriêk Lăk bi mklă leh, bruă bi mŭt đảng viên jing mnuih djuê ƀiă, nao mđrĭng hŏng bruă dăp knuă druh hlăm jih jang bruă kđi ičar jing yuôm bhăn snăn hlăm klei mkŏ mjing Đảng, mkŏ mjing bruă sang čư̆ êa nah gŭ. Mơ̆ng anăn, đru mđĭ hĭn klei tŭ dưn mơ̆ng knŭk kna kiă kriê, mkŏ mjing bruă kđi čar hlăm klei kjăp, hyuă kjăp hĭn klei bi mguôp jih jang djuê ana. Aduôn Đào Thị Thanh An brei thâo:

“Dưi lač hĕ hlăm wưng leh êgao, bruă klam mơ̆ng knuă druh đảng viên, boh nik jing đảng viên mnuih djuê ƀiă mâo bi êdah leh bruă klam, boh nik hlăm klei hâo hưn, mtrŭt mjhar mnuih ƀuôn sang hlăm klei mđĭ kyar klei hdĭp mda ala ƀuôn, răng mgang kjăp klei êđăp ênang yang ƀuôn, mkŏ mjing jih jang bruă kđi čar nah gŭ. Mtă mtăn kơ mnuih ƀuôn sang amâo mâo duah hmư̆ klei phung mplư, lehanăn hyuă kjăp hĭng klei thâo bi mguôp hlăm jih jang djuê ana”.

Truh kơ ară anei kluôm kdriêk Lăk mâo leh giăm 1.400 čô đảng viên jing mnuih djuê ƀiă, truh êbeh 42% ênoh jih jang phung đảng viên hlăm kluôm kdriêk. Anei ăt jing êpul knơ̆ng, jih ai tiê đru mguôp rŭ mdơ̆ng ƀuôn sang knư̆ hrue knư̆ mâo klei đĭ kyar./.