Hlŭt kdô dưm tŏ thao, giêt ksu ti djiêu wăl sang mâo anôk gang, êkei êdam Nguyễn Chí Tâm, alŭ Dak Ri, să Tân Thành hơ̆k mơak: Anei jing “Sang 100 prăk” mâo bruă êdam êra să mkŏ mjing. Mơ̆ng grăp tŏ thao, giêt ksu 100 prăk, phung êdam êra hlăm să mkrum mguôp mkŏ mjing keh đru kơ phung mâo klei hdĭp dleh dlan:

“Kâo duñ tlŏ thao, giêt ksu arăng hluê hdră snei “Duñ mkăm pioh ƀrư̆ srăng mâo lu”. Leh anăn kâo ăt mđĭ ai phung êdam êra hlăm alŭ, hlăm să ngă mbĭt čiăng đru kơ grăp čô mnuih dleh dlan dưi dul hĭn klei dleh”.

Hdră hiu hrui tlŏ thao, giêt ksu mơ̆ng êpul bruă êdam êra să Tân Thành pral mâo phung mduôn, phung hđeh sa ai hluê ngă, mjing klei mưng jăk hlăm êpul êya.

Nguyễn Văn Bé, ti alŭ Dak Ri, hơ̆k kdơ̆k brei thâo:“Grăp blư̆ mâo tŏ thao, giêt ksu kâo pioh yơh, tal sa jing bi hrŏ klei čhŏ djhan hlăm wăl hdĭp mda, tal dua jing kâo čiăng đru kơ mnuih dleh dlan mkăn.

Hơ̆k mơak nao duñ tŏ thao, giêt ksu mơ̆ng phung êdam êra alŭ Dak Ri, đoàn viên Đặng Văn Hiếu, djuê ana Dao, brei thâo, hdră ngă bruă êdam êra msĕ si knăm kjuh mtah, yan bhang ba anăp, mkŏ mjing tač hlăp kơ phung hđeh êlăk êdam êra…, đru kơ phung hđeh hdĭp jăk hĭn:

“Êlâo hĭn jing klei mơak, tal dua jing ba wĭt boh tŭ dưn jăk siam. Kâo dưi bi tuôm lu, mjĕ mjuk hŏng lu mnuih snăn klei hdĭp jăk, mhač čhač hĭn mơh”.

Ayŏng Đặng Phúc Xuân, Khua bruă êdam êra să Tân Thành brei thâo, “Boh sang 100 prăk” mơ̆ng bruă hiu hrui tŏ thao, giêt ksu mâo bruă đoàn să pŏk ngă mơ̆ng mlan 4/2022 ti krĭng wăl să. Mâo klei nao hgŭm mơ̆ng lu mnuih ƀuôn sang, hdră ngă anei pral dưi bi lar ti dŭm krĭng mnuih ƀuôn sang dôk. Leh dŭm mlan, “Sang anei” bŏ leh thao, ksu srăng ba čhĭ dưm hlăm keh kăp đru kơ phung hđeh dleh dlan, mđup brei čhum ao, hdruôm hră, hră ênua mdrao mgŭn kơ phung hđeh ƀun, mjing prăk duh tal êlâo đru kơ phung êdam êra mđĭ kyar bruă duh mkra. Ayŏng Đặng Phúc Xuân, brei thâo:

“Mjing keh prăk anei čiăng sa thŭn hmei mđup brei mnơ̆ng 4 blư̆ hlăm wưng Têt djuê ana, têt hđeh êlăk, ƀri pŏk thŭn hriăm mrâo lehanăn mơak hruê mlan pŭr. Leh kơnăn, mâo klei đru mơ̆ng mnuih ƀuôn sang hmei ăt mâo mơh keh prăk brei phung êdam êra čan amâo tĭng prăk mnga čiăng blei mjeh mnơ̆ng pla mđĭ kyar bruă duh mkra.

Hluê si Trần Doãn Hiếu, Kơiăng khua Anôk bruă sang čư̆ êa să Tân Thành, “Boh sang 100 prăk” jing klei mĭn mrâo mơ̆ng êpul đoàn viên, êdam êra, bruă ngă điêt ƀiădah dưi lar bra hlăm mnuih ƀuôn sang, mjing klei mưng thâo mkiêt mkriêm lehanăn đru răng mgang wăl hdĭp mda. Mbĭt hŏng êpul êdam êra, êpul bruă mniê să ăt mkŏ mjing keh bi đru mkra sang, mđĭ kyar bruă duh mkra, mâo lu klei sa ai hlăm mnuih ƀuôn sang. Trần Doãn Hiếu, brei thâo, dŭm hdră bi mguôp êpul êya ba wĭt leh boh tŭ dưn ti să mâo 2/3 ênoh mnuih jing mnuih djuê ƀiă.

“Anei ăt jing sa hdră mtô mblang, mtrŭt mjhar jăk, jing sa bruă ngă klă sĭt lehanăn ăt đru ba hdră êlan mtrŭn mơ̆ng Đảng, Knŭk kna truh hŏng mnuih hgŭm, phung đoàn viên lehanăn mnuih ƀuôn sang, mơ̆ng anăn jih jang mnuih srăng đăo knang kjăp hĭn hlăm anôk bruă kđi čar mơ̆ng să. Boh nik, mkŏ mjing êpul êya hgŭm mguôp klă sĭt hŏng mnuih ƀuôn sang, jing kdrông mkŏ mơ̆ng Đảng, Knŭk kna truh hŏng mnuih ƀuôn sang.

Ăt hluê si Trần Doãn Hiếu, klei sa ai mơ̆ng mnuih ƀuôn sang đru mguôp mkŏ mkra leh să krĭng taih kbưi Tân Thành mâo 16 hnơ̆ng čuăn krĭng ƀuôn sang mrâo. Mnuih ƀuôn sang 7 djuê ana hlăm să dôk hgŭm ai hŏng bruă sang čư̆ êa alŭ wăl, mkŏ mkra krĭng ƀuôn sang mrâo, gĭr truh kơ jih thŭn 2025 srăng bi leh hdră bruă anei./.