Ƀuôn hgŭm Tu Mơ Rông (čar Quảng Ngãi) mâo mkŏ mjing leh klei bi mŭt bruă sang čư̆ êa dua boh să Tu Mơ Rông lehanăn Đăk Hà (čar Kon Tum hđăp). Ară anei mâo 17 boh ƀuôn, hŏng ênoh giăm 6.500 čô mnuih. Bruă Đảng ƀuôn hgŭm mâo 26 êpul bruă Đảng hŏng êbeh 300 čô đảng viên. Leh bruă sang čư̆ êa dua gưl mă bruă, bruă Đảng ƀuôn hgŭm mkŏ mjing leh klei bi tuôm phung knuă druh, mnuih mă bruă hŏng dua asăp mtrŭn mâo bi êdah: “Hơĭt klei mĭn, mkŏ mjing - brei mâo klei thâo bi mguôp” lehanăn Mđĭ hĭn klei thâo hlăm klei mă bruă 2025-2030 čiăng mâo klei đĭ kyar pral bruă duh mkra ala ƀuôn. Võ Trung Mạnh, Khua bruă Đảng ƀuôn hgŭm Tu Mơ Rông, brei thâo:

 “Ƀuôn hgŭm mrâo bi mklă leh bruă mđĭ kyar nah gŭ, čiăng kơ bruă drông tue hriê čhưn đang sâm Ngọc Linh, lehanăn mkŏ mjing dŭm anôk mnia mblei mnơ̆ng mơ̆ng sâm. Ƀuôn hgŭm mkŏ mjing anôk pioh mđĭ kyar bruă hiu čhưn ênguê ti Đăk Chum 1. Ƀuôn hgŭm duh mĭn kơ bruă pla mjing ana êa drao jing bruă phŭn. Êngao kơ sâm Ngọc Linh srăng pla mjing ana sâm mkăn pioh mjing mnơ̆ng bi mkă, lehanăn mơ̆ng anăn răng mgang anăn knăl sâm Ngọc Linh hlăm alŭ wăl”.

Mbĭt hŏng klei mă bruă kjăp jih bruă sang čư̆ êa dŭm boh ƀuôn hgŭm krĭng dlông čar Quảng Ngãi hlăk čŏng mprăp kjăp kơ jih jang bruă bi kƀĭn prŏng bruă Đảng wưng păn bruă mrâo wưng thŭn 2025-2030, djŏ hŏng klei kiă kriê mơ̆ng khua gĭt gai Đảng Tô Lâm leh mâo gưl hriê čuă lehanăn mă bruă ti čar. Anăn jing asăp mtrŭn mrô 45; mprăp kơ klei hâo mdah bruă kđi čar djŏ hŏng klei sĭt leh klei bi mŭt; mâo anôk kñăm klă, thâo ƀuh hdră êlan jăk, ruah ti jing bruă ngă êlâo, hlăm dŭm bruă phŭn, lehanăn mta kñăm mđĭ kyar hŏng klei klă.

Nguyễn Đức Tuy, K’iăng khua bruă Đảng čar, Khua êpul gơ̆ng bruă ƀuôn sang čar Quảng Ngãi, brei thâo:

 “Klei hâo mdah bruă kđi čar bi êdah bruă kut kat kơ klei mđĭ kyar hlăm wưng păn bruă mrâo. Anôk mđĭ kyar jing prŏng hlăm ƀuôn hgŭm, ară anei brei ngă lu bruă prŏng hĭn. Thâo săng kơ krĭng ya mta bruă mâo, pioh mdưm hlăm klei hâo mdah bruă kđi čar čiăng dưi nao djŏ hdră pioh kơ klei mđĭ kyar, lehanăn mđĭ hnơ̆ng hdĭp mnuih ƀuôn sang, boh nik mnuih ƀuôn sang krĭng mnuih djuê ƀiă”.

Klei bi kƀĭn prŏng bruă Đảng dŭm boh ƀuôn hgŭm krĭng čư̆ čhiăng Kon Tum dôk hlăm čar Quảng Ngãi srăng jing klei găp čiăng kơ dŭm alŭ wăl bi mklă wĭt hdră êlan kơ klei mđĭ kyar, dưn yua jih klei găl krĭng kwar pioh bi leh mta kñăm mđĭ kyar pral, kjăp hlăm ênuk gưl mrâo./.