Tŭ ư hŏng klei lač kơ bruă duh mkra hnơ̆ng prŏng leh anăn boh tŭ hluê ngă hdră êlan lač hlăm Hră mơar, k’iăng nai prŏng, nai prĭn Trần Hoàng Ngân, pô bi ala Bruă kƀĭn ala  gưl 15 lač, nư knŭk kna ala čar drei thŭn 2025 knŏng adôk 35% (mkă hŏng hnơ̆ng hưn brei răng jing 60%), jing klei bi knăl jăk, bi êdah ai dưi kriê dlăng tŭ dưn, đru bi kjăp klei đăo knang mơ̆ng phung duh bi liê leh anăn dŭm êpul bruă ala tač êngao hlăm bruă ngăn prăk Việt Nam. Mbĭt anăn bi kna hlăm klei hrui wĭt – bi liê prăk knŭk kna, jing mta phŭn yuôm bhăn čiăng bi kna ai dưi duh bi liê kơ klei đĭ kyar. Trần Hoàng Ngân, hlăk mblang:

Hŏng hdră êlan duh bi liê knŏng 2,8 êklăk êklai prăk truh kơ knhal jih wưng păn bruă anei drei mâo 3,4 êklăk êklai prăk kơ duh bi liê bruă duh mkra ala ƀuôn. Anei jing klei hmei lač jing tŭ jing hĭn. Kyuanăn, drei dưi duh bi liê kơ êlan dơ̆ng pral, êlan dơ̆ng ktuê hang ksĭ, dŭm kdrŭn ksĭ, tač êdeh phiơr, êlan dar mrô 4 Hà Nội, êlan dar mrô 3 ƀuôn prŏng Hồ Chí Minh leh anăn lu sang hră mơar, bruă mdrao mgŭn dưi duh bi liê.”

Bi kơ klei đĭ kyar GDP, tơdah amâo mâo yap thŭn 2021, jing thŭn hmăi mơ̆ng klei ruă tưp Covid-19, klei đĭ kyar bruă duh mkra lăn čar drei mâo 7,2% hlăm 4 thŭn dơ̆ng. Thŭn 2025, klei mnia mblei mơ̆ng Việt Nam đăo tĭng đĭ hĭn êdi 900 êklai USD. Anei jing klei ka tuôm mâo. Mơ̆ng sa anôk bruă duh mkra ƀun ƀin, truh kơ ară anei ala čar drei jing sa anôk bruă duh mkra hlăm top 20 ala čar mâo hnơ̆ng mnia mblei prŏng dlông rŏng lăn.

Hŏng klei mĭn kluôm jing đĭ kyar pral leh anăn hơĭt kjăp, dŭm boh tŭ dưn kơ mđĭ kyar bruă duh mkra ala ƀuôn mơ̆ng lăn čar drei dưi bi êdah hŏng klei đĭ kyar bruă duh mkra ala ƀuôn leh anăn đĭ kyar anak mnuih. Ênoh đĭ kyar anak mnuih mơ̆ng Việt Nam dưi bi êdah klă, đĭ 37 gưl, jing tal 46 hlăm ênoh yâo mơak tar rŏng lăn thŭn 2025, lu hĭn mkă hŏng dŭm ala čar ƀun ƀiin. Nai prĭn bruă duh mkra Lê Duy Bình lač:

Klei bi hmô đĭ kyar mơ̆ng hmei amâo djŏ knŏng jing đĭ kyar kơ bruă duh mkra ƀiădah lŏ nao mbĭt hŏng klei đĭ kyar anak mnuih, mă anak mnuih jing mta kñăm, mă wăl hdĭp mda jing mta phŭn, mă ênuk êdei anăp jing mta kñăm gĭr ktưn čiăng drei mâo sa gru hmô đĭ kyar hơĭt kjăp, jing sa wăl jăk kơ anak čô drei êdei anăp.

Mbĭt hŏng dŭm mta bruă duh mkra mkăn, klei kreh knhâo mrâo mrang, mlih mrâo mbruă leh anăn mlih mrô mơ̆ng lăn čar drei ăt mâo klei đĭ kyar pral. Klei mlih mrâo mbruă tar rŏng lăn thŭn 2025 mơ̆ng Việt Nam dôk tal 44 hlăm 139 ala čar, krĭng wăl. Bruă mrô đĭ kyar ktang, kluôm dhuôm, Internet hlăm top 20 tar rŏng lăn. Klei mnia mblei online đĭ kyar pral, đĭ kah knar 20% sa thŭn. Mơ̆ng boh sĭt klei ngă bruă mơ̆ng knơ̆ng bruă, Nguyễn Hữu Sơn, khua êpul grup ATS bi êdah:

Drei ƀuh klei gĭr prŏng mơ̆ng knŭk kna, mkŏ mjing klei găl kơ knơ̆ng bruă, hmei ƀuh bruă anei Việt Nam dôk mâo lu klei găl hŏng klei đĭ kyar pral, dôk ñu kma hlăm hdră êlan mđĭ kyar mrô, ngăn prăk mrô).

 Tŭ ư hŏng klei hriăm dưi lač hlăm hră mơar: grăp hdră êlan srăng kčưm mơ̆ng klei čiăng, boh tŭ leh anăn klei yâo mơak mnuih ƀuôn sang, rơ̆ng kơ klei klă mngač. Mă klei tŭ ư, klei đăo knang mơ̆ng mnuih ƀuôn sang, knơ̆ng bruă jing giê treh bi klă knuă druh leh anăn boh tŭ bruă knuă. Bi râo ai tiê duh myơr kyua lăn čar, bi lar klei mĭn čŏng pô, jhŏng mlih mrâo, mbruă, ngă bruă leh anăn đua klam kyua boh tŭ dưn mbĭt. Lưu Thị Thanh Mẫu, k’iăng khua êpul phung mnia mblei mda asei Việt Nam hmăng hmưi:

Mbĭt hŏng hdră ngă bruă mơ̆ng knŭk kna online, bi mguôp hŏng bi mlih mrô leh anăn mđĭ ai dưi gưl alŭ wăl, kâo mĭn gưl phŭn bruă leh anăn knŭk kna srăng ngă pral hdră mtrŭn mrô 66 leh anăn hdră mtrŭn mrô 68 mơ̆ng Phŭn bruă kđi čar. Msĕ si ti krah hdră êlan leh anăn ngă bruă truh kơ boh sĭt mtrŭt mđĭ bruă duh mkra mơ̆ng ala čar drei msĕ si Khua gĭt gai Đảng mñă klă hlăm ênuk kpưn đĭ mơ̆ng djuê ana. Drei srăng hrăm mbĭt čiăng mkŏ mjing bruă duh mkra mbruă, ba Việt Nam đĭ kyar jing anôk bruă duh mkra mrô 1 tar rŏng lăn.)

Hlăm klei mđĭ kyar bruă duh mkra lăn čar 5 thŭn êgao, ăt adôk mâo lu klei čiăng mgaih msir, leh anăn klei hriăm dưi lač hlăm hră mơar mơ̆ng Đảng. Ƀiădah, hŏng dŭm boh tŭ dưn prŏng prĭn hlăm klei mđĭ kyar bruă duh mkra lăn čar drei dưi mâo hlăm 5 thŭn êgao, hŏng ai tiê mlih mrâo, ai ktang bi mguôp djuê ana leh anăn klei hmăng hmưi đĭ kyar, djuê ana Việt Nam dôk mŭt hlăm ênuk mrâo, ênuk đĭ kyar mdrŏng ktang, yâo mơak, ñu kma leh anăn čŏng pô./.