Ti anôk bruă sa bhăn bhă mơ̆ng ƀuôn hgŭm Ea Kao, bi mŭt mơ̆ng să Ea Kao leh anăn ƀuôn hgŭm Ea Tam, čar Dak Lak, hlăm hruê lông ngă, mnuih ƀuôn sang nao ngă hră mơar dưi mâo klei đru pral, thơ̆ng kơ bruă. H’Đinh Ƀuôn Krông ( Aduôn Y Ssam), ti ƀuôn Alê B brei thâo dŭm klei ƀuh jăk êjai ngă hră mơar brei hưn sang dôk:

 “Klei ngă hră mơar knŭk kna leh bi mŭt mbĭt kâo ƀuh phung knuă druh ăt tŭ drông jăk êdi, đru kơ mnuih ƀuôn sang hlăm bruă bi klă hră mơar. Ngă hră mơar pral, kâo ƀuh mâo lu klei bi mlih êdi.”

Klă sĭt bruă lông ngă ti dŭm čar Dak Lak, Lâm Đồng, Gia Lai, bruă knŭk kna dưi đru kơ mnuih ƀuôn sang hŏng hdră jăk êdi. Klă anăp nao ksiêm dlăng boh sĭt, Nguyễn Đình Trung, khua bruă Đảng čar Dak Lak gĭt gai.

Drei lač lông ngă ƀiădah mta phŭn jing sĭt. Anei jing knhuang čiăng hruê 1/7 brei ngă sĭt amâo mâo lŏ klei bi kngăr. Kyuanăn, phung mă bruă srăng čŏng pô hlăm bruă pô, êjai bi kƀĭn êpul mă klei hriăm, mâo klei bi mklin bi trông hŏng hdơ̆ng pô.”

Ti Gia Lai, bruă mkŏ dăp, bi khuăt phung mă bruă, hluê ngă klei bi hmô bruă sang čư̆ êa dua gưl dưi ngă jăk. Hô Văn Niên, khua bruă Đảng čar Gia Lai lač klă:

 “Bruă kđi čar mơ̆ng čar dôk kñăm ngă klei bi hmô bruă sang čư̆ êa alŭ wăl dua gưl dưi ngă mơ̆ng hruê 1/7. Êngao kơnăn, čar dôk mtrŭt mđĭ ktang lu hdră êlan msĕ si mtrŭt mđĭ klei mlih mrô, dưn yua klei mrâo mrang, ruh mgaih klei kpăk gun hlăm bruă ruh mgaih anôk ala, mtrŭt bi pral klei brei čan duh bi liê bruă knŭk kna leh anăn ngă dŭm hdră kñăm čiăng rơ̆ng kơ klei đĭ kyar hlăm thŭn 2025 leh anăn mkŏ mjing tur knơ̆ng kơ wưng păn bruă mrâo”.

Ti Dak Noong, bruă lông ngă bruă sang čư̆ êa gưl să mrâo mkŏ mjing tŭ dưn, mnuih ƀuôn sang đăo knang kơ bruă mkŏ dăp, bi mŭt anôk bruă knŭk kna. H’Thương, ti să Nâm Nung brei thâo:

 “Bi mŭt čar Bình Thuận, Dak Nông hŏng Lâm Đồng hluê si kâo ƀuh jing djŏ êdi. Pô mâo djăp klei găl mđĭ kyar bruă duh mkra djăp mta, mâo dliê, mâo êa ksĭ; Msĕ si Dak Nông mâo ksuêh, Lâm Đồng mâo Đà Lạt. Bình Thuận mâo êa ksĭ, mâo klei găl kơ kan hdang…sơnăn 3 čar bi mŭt mbĭt bruă duh mkra ala ƀuôn ƀrư̆ hruê ƀrư̆ đĭ kyar hĭn.

Ti čar Lâm Đồng mrâo, bruă lông ngă dưi mâo klei ktuê dlăng kjăp. Y Thanh hà Niê Kdăm, khua bruă Đảng čar Lâm Đồng mñă klă, dŭm klei kpăk gun dưi mgaih msir mjêč êlâo kơ 124 să, ƀuôn hgŭm, anôk bruă klă klơ̆ng ngă bruă.

“Bi leh bruă mkŏ dăp knuă druh, phung mă bruă knŭk kna, mnuih mă bruă wĭt kơ anôk mă bruă mrâo. Bruă Đảng bruă sang čư̆ êa čar, khua gĭt gai bruă sang čư̆ êa čar gĭt gai ngă jăk bruă mprăp kơ mnơ̆ng yua, kdrăp yua, dang kông, phần mềm đru kơ klei ngă bruă, anôk bruă mă, rơ̆ng dưi ngă mơ̆ng čar truh kơ ƀuôn hgŭm, anôk bruă, hrăm mbĭt mơ̆ng hruê 1/7/2025.