Thŭn hriăm anei, ti Sang hră gưl 2 Võ Thị Sáu ti să Krông Na, kdriêk Ƀuôn Đon mâo 349 čô hđeh, hlăm anăn mâo 80% jing phung hđeh mnuih djuê ƀiă. Kyua bruă duh mkra dleh dlan, lu phung amĭ ama brei kơ anak dôk ti sang mă bruă pưk hma đru kơ gŏ sang. Adei Y-Jun Su Byă, hđeh adŭ 9B, Sang hră gưl 2 Võ Thị Sáu, kdriêk Ƀuôn Đon, čar Dak Lak brei thâo: “Bruă duh mkra gŏ sang dleh dlan kyua anăn adei mdei sang hră hiu mă bruă. Leh mâo phung nai mtrŭt mđĭ ai, adei lŏ gĭr nao sang hră”.

Msĕ snăn, ti Sang hră gưl sa Y-Jŭt, să Krông Na, kdriêk Ƀuôn Đon, čiăng krơ̆ng kjăp ênoh hđeh nao sang hră jing bruă amâo djŏ ênưih ôh. Nai mtô Nguyễn Tiến Chung, mtô ti Sang hră Y-Jŭt, brei thâo: Hdră mtrŭt mjhar phung hđeh lŏ nao sang hră jing sa hlăm dŭm bruă yuôm bhăn hrăm mbĭt hŏng bruă mtô bi hriăm. Tơdah mâo phung hđeh mdei sang hră, nai mtô mbĭt hŏng phung khua sang hră srăng nao ti sang bi tuôm klă anăp hŏng amĭ ama lehanăn hđeh čiăng thâo klă klei mâo, klei čiăng lehanăn gĭr mtrŭt mjhar phung hđeh lŏ nao sang hră.  “Mơ̆ng hdră mtô mblang, tal êlâo ƀuh phung hđeh nao sang hră jêñ jêñ mơh, ƀiădah leh sa wưng lŏ mdei snăn hmei lŏ gĭr mtrŭt mjhar. Mmông mdei lu gĭr lŏ nao mtrŭt mjhar yơh”.

Hluê nai Trần Thị Hằng, K’iăng khua sang hră gưl sa Y-Jŭt, să Krông Na, kdriêk Ƀuôn Đon, bruă dleh dlan êdi amâo djŏ mtô bi hriăm ôh ƀiădah krơ̆ng kjăp ênoh hđeh nao sang hră. Hruê aguah tlam dleh leh, truh kơ mlan 11,12 hĭn mơh dleh kyua djŏ wưng pĕ kphê, phung hđeh mdei sang hră hluê amĭ ama nao pĕ kphê mưn. Phung nai kreh nao ti sang, đa mmăt mlam nao truh kơ pưk hma duah hđeh hriăm hră. “ Mtrŭt mjhar phung hđeh nao sang hră hmei kreh nao hlăm tlam mmăt, hlăm brô 7h krah truh kơ 8h kơh tuôm hŏng gŏ sang digơ̆. Anak čô diñu đa dôk hŏng amĭ ama ti pưk hma snăn hmei gĭt nao kơ pưk hma duah mơh. Khua, k’iăng khua sang hră, khua bruă công đoàn, đội, nai kiă adŭ bi nao ti hma mơh čiăng mtrŭt mjhar phung hđeh gĭr lŏ nao sang hră.

Suaĭ êmăn gơ̆ snăn, ƀiădah leh ƀuh phung hđeh lŏ nao sang hră, phung nai mtô ƀuh m’ak êdi. Kyua phung nai thâo ti krĭng dleh dlan msĕ si knông lăn Ƀuôn Đon, čiăng gĭr ktưn kpưn đĭ tlaih kơ ƀun amâo mâo êlan mkăn êngao kơ klei hriăm hră, mâo klei thâo săng bi mlih klei hdĭp.  Nai mtô Phạm Thị Loan, K’iăng khua sang hră gưl 2 Võ Thị Sáu, să Krông Na, kdriêk Buôn Đon brei thâo: “Bruă duh mkra ti ƀuôn sang, ti să pô dleh dlan êdi, lăn ala amâo čăt jing, pla mjing lu jing hlăm yan hjan kơh mâo ƀiă boh mnga lehanăn tui hluê lu hŏng yan adiê. Snăn, ară anei, phung hđeh gĭr hriăm hră yơh čiăng mâo êdei anăp jăk siam hĭn.

Mbĭt hŏng bruă mtrŭt mjhar phung hđeh nao sang hră, dŭm boh sang hră ti krĭng knông lăn Krông Na, kdriêk Ƀuôn Đon iêu mtrŭt leh djăp ai dưi, klei mâo đru kơ phung hđeh ƀun, msĕ si hdruôm hră, mnơ̆ng yua, êdeh wai jơ̆ng… Kyua mâo klei đru kơ mnơ̆ng dhơ̆ng lehanăn mđĭ ai, lu phung hđeh ti krĭng knông lăn dưi lŏ nao sang hră./.