Ti krah adiê mđiă bhang không prŏng, dôk hlăm đang kphê, Thiếu tá Nguyễn Phúc Thuận, hlăm kđông răng mgang knông lăn Dak Lao, kahan răng mgang knông lăn čar Dak Nông dôk ktrâo atăt mnuih ƀuôn sang ti ƀuôn Dak Thŏ, să knông lăn Dak Lao, kdriêk Dak Mil kơ hdră dlăng kriê wiê ênăk kphê hlăm yan bhang, lehanăn mprăp kơ bruă pla mjing akŏ yan hjan. Thŭn anei mđiă ktang bhang prŏng, ti anôk truh snăn mâo nanao klei mtă kơ jih jang mnuih ƀuôn sang brei thâo mkiêt mkriêm klei ba yua êa, krih êa kơ mnơ̆ng pla man dưi krơ̆ng bi djăp truh kơ akŏ yan hjan. Truh ti wưng anei, dlăng kơ ana kphê mâo lu mnơ̆ng ngă, boh nik eh kan, snăn ñu mbĭt hŏng phung knuă druh bi ktrâo atăt kơ mnuih ƀuôn sang hdră răng kriê bi mâo klei tŭ dưn. Thŭn anei ênoh čhĭ kphê đĭ yuôm, snăn lu gŏ sang dơ̆ng mâo hdră čiăng lŏ pŏk phai pla mjing kphê. Ñu mtă nanao kơ mnuih ƀuôn sang, brei thâo ruah mjeh bi jăk, đăm duah blei ôh mjeh amâo mâo klă phŭn agha, jing mjeh amâo mâo jăk. Mâo kđông răng mgang knông lăn Dak Lao tiŏ nao mă bruă mbĭt hŏng êpul bruă Đảng ti ƀuôn Dak Thŏ, să Dak Lao, Thiếu tá Nguyễn Phúc Thuận gĭr jih ai tiê pô čiăng đru bi mlih klei mĭn, lehanăn hdră mă bruă hlăm mnuih ƀuôn sang.

“Čiăng dưi mâo mjeh pla mjing, mjeh mnơ̆ng rông jăk, djŏ guôp snăn kâo ksiêm duah, bi mguôp hŏng êpul hgŭm bruă lŏ hma să, kdriêk tui duah ya mta mjeh jing jăk djŏ guôp hŏng mnuih ƀuôn sang pla mjing. Tiŏ nao phung hđeh hriăm gưl prŏng nao kčĕ đru hŏng mnuih ƀuôn sang mâo hdră êlan mă bruă bi jăk. Kâo jhŏng akâo kơ knuă druh nao truh hŏng ƀuôn sang pioh đru kơ dŭm gŏ êsei dleh dlan”.

Nguyễn Khắc Chinh, Khua bruă Đảng ƀuôn Dak Thŏ, să knông lăn Dak Lao, kdriêk Dak Mil, čar Dak Nông brei thâo, mơ̆ng hrue mâo Thiếu tá Nguyễn Phúc Thuận djŏ tiŏ nao bi mguôp hŏng êpul bruă Đảng ƀuôn, mâo đru leh kơ ƀuôn lu klei tŭ dưn. Djăp mta bruă hlăm êpul bruă Đảng ƀuôn mâo mă bruă mjhĭt m’uăt hĭn. Lu hdră mtrŭn mâo ba hriê truh hŏng klei hdĭp mnuih ƀuôn sang, đru mnuih ƀuôn sang hlăm klei duh ƀơ̆ng mâo ba wĭt leh klei tŭ dưn jăk. Phung đảng viên hlăm êpul bruă Đảng ƀuôn mâo klei thâo săng hĭn hlăm bruă mđĭ kyar klei hdĭp mda, brei mâo klei thâo bi hmô jăk hŏng mnuih ƀuôn sang. Mơ̆ng anăn lu gŏ sang mnuih ƀuôn sang jhŏng bi mlih hdră duah ƀơ̆ng mơh, mkra mjing lu mta mnơ̆ng, dlăng kriê wiê ênăk bi jăk mnơ̆ng pla mjing, lehanăn mnơ̆ng rông, snăn klei hdĭp mda ƀrư̆ ƀrư̆ dơ̆ng mâo klei bi mlih. Hlăm ƀuôn adôk mâo lu gŏ sang dleh dlan, Thiếu tá Thuận mbĭt hŏng êpul bruă Đảng ƀuôn lŏ mtrŭt mjhar, ngă klei iêo mkrum čiăng mâo rŭ mdơ̆ng truh kơ 4 boh sang bi đru. Tui si Nguyễn Khắc Chinh, mâo Thiếu tá Thuận đru kčĕ, ngă lu bruă bi hmô, dưi đru leh kơ mnuih ƀuôn sang ti knông lăn lŏ mâo ai tiê thâo mjĕ mgiăm hŏng kahan răng mgang knông lăn hĭn.

“Thuận jing sa čô knuă druh dôk mda asei, hur har jih ai tiê hlăm djăp mta bruă. Đru kčĕ kơ êpul bruă Đảng lehanăn kơ mnuih ƀuôn sang hlăm ƀuôn ngă jăk bruă răng mgang knông lăn. Năng mpŭ mni, năng khăp êdi”.

Jih ai tiê kiă kriê hrăm mbĭt ƀrư̆ ƀrư̆ mâo đru leh kơ mnuih ƀuôn sang thâo săng, dơ̆ng bi mlih hdră êlan duh ƀơ̆ng, klei ngă bruă, klei hdĭp mâo klei uêñ mĭn hĭn. Anăn yơh jing bruă klam mơ̆ng phung đảng viên kahan răng mgang knông lăn, mâo tiŏ nao đru dŭm boh ƀuôn mnuih ƀuôn sang pô hdĭp ti knông lăn Dak Nông. Jih jang hdră ngă klei bi hmô, lehanăn mđĭ ai mnuih ƀuôn sang hlăm klei duh ƀơ̆ng, đru kơ mnuih ƀuôn sang mjeh êmô pioh rông, đru kơ hdră pla mjing kphê, pla ana boh durian, pla tiu doh, lehanăn lu bruă đru ba kơ yang ƀuôn msĕ si iêo ba hđeh dleh dlan mjing anak rông kahan răng mgang knông lăn, mtrŭt mjhar mnuih ƀuôn sang mtô bi hriăm anak aneh pô amâo mâo bi dôk ung mô̆ mơ̆ng mda... Dưi păn kjăp jih hlăm klei hdĭp mnuih ƀuôn sang, kơ alŭ wăl. H’Xuân, K’iăng khua bruă Đảng kdriêk Dak Mil, čar Dak Nông brei thâo, Kahan răng mgang knông lăn tiŏ nao leh knuă druh đảng viên wĭt ngă k’iăng khua bruă Đảng să, bi mguôp hŏng dŭm êpul bruă Đảng ƀuôn hlăm knông lăn mơ̆ng kdriêk klă sĭt mâo ba wĭt leh boh tŭ dưn:

“Hŏng kahan răng mgang knông lăn hlăm kdriêk, snăn bruă mkŏ mjing lu kleibi hmô mâo ngă hŏng klei jăk lehanăn dưi bi lar lu. Jih jang hdră anăn mâo leh mnuih ƀuôn sang tui hlue lehanăn ba yua hlăm klei hdĭp jăk snăk mâo leh kdriêk bi mni. Đru hlăm bruă rŭ mjing ƀuôn sang Dak Mil, boh nik, hlue ngă dŭm hdră mtrŭn mơ̆ng Đảng kơ klei mđĭ kyar bruă duh mkra ala ƀuôn lehanăn răng mgang klei êđăo ênang hlăm alŭ wăl kdriêk”.

Đại tá Bùi Đức Chính, K’iăng khua bruă kđi čar kahan răng mgang knông lăn čar Daknông brei thâo, hlue ngă djŏ hŏng hdră mtrŭn mơ̆ng bruă Đảng čar, lehanăn asăp mtrŭn mơ̆ng êpul bruă Đảng kahan răng mgang knông lăn, snăn kahan răng mgang knông lăn čar Daknông lŏ mâo bi mŭt leh truh 57 čô đảng viên bi mguôp leh ti 55 êpul bruă Đảng ƀuôn; 146 čô đảng viên đru bi čung ba truh 367 gŏ êsei ti alŭ wăl knông lăn. Phung đảng viên kahan răng mgang knông lăn dưn yua jih ai tiê pô kăp kčĕ, đru leh kơ dŭm gưl bruă Đảng să, ƀuôn mă bruă bi mâo klei bhiăn hĭn, kjăp hĭn hlăm dŭm êpul bruă Đảng.

Hŏng dŭm klei thâo bi hmô ba êlan êlâo, đru čung ba mnuih ƀuôn sang hŏng klei jăk, ngă bruă mâo klei tŭ jing, đru bi mlih leh klei hdĭp mda mnuih ƀuôn sang, lŏ bi ksul mbŭ klei thâo bi mguôp, msĕ si klang êrah plah wah kahan răng mgang knông lăn hŏng mnuih ƀuôn sang. Jĕ giăm hŏng mnuih ƀuôn sang, mđĭ hĭn ai ktang hlăm mnuih ƀuôn sang, mjing knơ̆ng pioh kơ kahan răng mgang knông lăn Daknông păn kjăp bruă răng mgang klei êđăp ênang knông lăn lehanăn knư̆ hrue knư̆ mâo klei đĭ kyar hĭn./.