Alŭ Trăng Nó Kon Blo, să Đăk Kôi, kdriêk Kon Braih, čar Kon Tum mâo 120 gŏ êsei jing mnuih djuê Xơ Đăng sơăi. Čiăng đru kơ mnuih ƀuôn sang hlăm alŭ anei bi mlih knhuah mĭn klei ngă bruă, kpưn đĭ hlăm klei duh ƀơ̆ng, đĭ ênoh mâo ba wĭt. Êpul bruă Đảng alŭ Trăng Nó Kon Blo brei 21 đảng viên ba akŏ hlăm jih jang bruă. Mơ̆ng dŭm klei bi hmô mđĭ kyar hlăm pưk sang pô bi mâo klei tŭ dưn, msĕ si: Ba yua mjeh mdiê mrâo, dlăng kriê wiê ênăk djŏ boh mnga, pla kphê, ksu, amâo lŏ pla hbei ƀlang ôh... Mnuih ƀuôn sang hlăm alŭ mâo truh 35 gŏ êsei ƀun tui hriăm. Amai Y Xanh, Khua êpul bruă mniê să Đăk Kôi, đảng viên bi mguôp hlăm alŭ Trăng Nó Kon Blo brei thâo kyua mâo phung đảng viên djă ti kngan ktrâo ti bruă, jih ai tiê mtô bi hriăm, dŭm gŏ êsei ƀun hĭn hlăm ƀuôn msĕ si: A Dĩa, A Thế, A Long… Ară anei čŏng mâo leh klei đăo knang, kmlăn leh ai tiê duh ƀơ̆ng, mâo ênoh ba wĭt kơ gŏ sang hơĭt leh:

 “Phung đảng viên kreh nao mtô mblang pioh hâo hưn čiăng kơ dŭm gŏ êsei anăn thâo duh ƀơ̆ng mơh, lehanăn lŏ haoa hưn wăt hdră êlan mơ̆ng Đảng knŭk kna. Ktrâo atăt mnuih ƀuôn sang bi mlih mnơ̆ng pla, mnơ̆ng rông, đru mnuih ƀuôn sang lăm lui knhuah hdĭp amâo mâo lŏ djŏ, jhŏng mĭn jhŏng ngă kpưn đĭ tlaih mơ̆ng ƀun ƀin”.

Đăk Kôi jing să krĭng taih kbưi hlăm kdriêk Kon braih hŏng ênoh giăm 3.400 čô mnuih, hlăm anăn mnuih djuê ana Xơ Đăng truh 94%. Trương Hồng Doanh, Khua bruă Đảng să Đăk Kôi brei thâo, truh knhal jih thŭn 2022 să mâo truh 285 gŏ êsei ƀun jing truh êbeh 34% gŏ êsei. Mơ̆ng anăn bruă Đảng să jih ai tiê mtrŭt mjhar “Bi mlih klei mĭn, hdră ngă bruă hlăm mnuih djuê ƀiă, đru leh kơ mnuih djuê ƀiă kmlăn ai tiê mđĭ kyar klei hdĭp mda”. Ƀuh klei đảng viên mâo klei thâo bi hmô jăk, bruă Đảng să Đăk Kôi jao bi nik bruă kơ187 đảng viên hlăm să, hlăm anăn mñă êdi hŏng phung đảng viên jing mnuih djuê ƀiă brei mâo klei thâo bi hmô êlâo:

 “Bruă Đảng să ară anei mâo hnơ̆ng ênoh phung đảng viên jing mnuih djuê ƀiă lu leh, truh 156 čô đảng viên truh 83,42%. Hŏng bruă klam mơ̆ng sa čô đảng viên snăn phung đảng viên ngă mtam klei thâo ba anăp mơ̆ng pô. Nao mtrŭt mjhar mnuih ƀuôn sang bi mlih knhuah mĭn, klei ngă bruă, kpưn đĭ kơ tui duah klei hdĭp, snăn hlăm dŭm thŭn êgao phung đảng viên. Ngă mtam klei mtrŭt mjhar brei mnuih ƀuôn sang dơ̆ng bi mlih klei mĭn, hdră ngă bruă, čiăng kơ mnuih ƀuôn sang kpưn đĭ tlaih mơ̆ng klei dleh dlan hlăm dŭm thŭn êgao kbiă hriê mơ̆ng dŭm čô phung đảng viên hlăm alŭ pô sơăi, lehanăn digơ̆ jing mnuih djuê ƀiă sơăi đru mtrŭt mjhar mnuih ƀuôn sang hŏng klei jăk sơăi”.

Bi lar klei mtrŭt mjhar: “Bi mlih klei mĭn, hdră ngă bruă hlăm mnuih djuê ƀiă, đru leh kơ mnuih djuê ƀiă kmlăn ai tiê mđĭ kyar klei hdĭp mda” mơ̆ng bruă Đảng čar Kon Tum kiă kriê, bruă Đảng kdriêk Kon Braih lŏ dăp hdră mtrŭt mjhar hŏng klei klă mngač, lehanăn mâo lu hdră jăk. Ti 43 alŭ ƀuôn mnuih djuê ƀiă anôk mâo lu phung  đảng viên bi mđing mtrŭt mjhat, ktrâo atăt dŭm gŏ êsei ƀun, lehanăn giăm ƀun ba yua prăk čan bi tŭ dưn duh mĭn kơ bruă knuă bi mâo klei tŭ dưn, tĭng mkă ngăn prăk ba yua bi djŏ guôp, kčĕ đru kơ mjeh mnơ̆ng pla, mnơ̆ng rông, mtrŭt mjhar mnuih djuê ƀiă mlih mkra war pla mtŭk mtŭl, mŭt hlăm êpul hgŭm ngă bruă, pla mjing ana êa drao, mđĭ kyar bruă lŏ hma doh... Nguyễn Văn Thủy, K’iăng khua knơ̆ng bruă sang čư̆ êa kdriêk  Kon Braih, lač klei mtrŭt mjhar mnuih ƀuôn sang mâo leh klei tŭ dưn hlăm klei mđĭ kyar klei hdĭp mda ala ƀuôn:

 “Mnuih ƀuôn sang mâo leh klei bi mlih hlăm hdră ngă bruă, thâo ba yua leh klei kreh knhâo hlăm bruă pla mjing lehanăn rông mnơ̆ng, đru leh klei hdĭp mda mnuih ƀuôn sang pô hlăm krĭng ƀuôn sang knư̆ hrue knư̆ mâo klei bi mlih hĭn. Hŏng dŭm klei bi hmô halwm bruă pla mjing, bi mguôp hŏng dŭm hdră mơư̆ng lăn čar kñăm bi mtruh hŏng mnuih ƀuôn sang, mjing lehklei bi mlih êdi lehanăn mâo klei tŭ dưn jăk hălm klei hdĭp lehanăn knuah mĭn mơ̆ng mnuih ƀuôn sang djuê ƀiă”.

  Tui si Nguyễn Quang Thạch, Khua bruă Đảng kdriêk Kon Braih, leh êbeh 2 thŭn ngă klei mtrŭt mjhar mnuih ƀuôn sang “Bi mlih klei mĭn, hdră ngă bruă hlăm mnuih djuê ƀiă, đru leh kơ mnuih djuê ƀiă kmlăn ai tiê mđĭ kyar klei hdĭp mda” dơ̆ng tư̆ leh klei mĭn mnuih ƀuôn sang dơ̆ng thâo ngă bruă hŏng klei tŭ jing. Mâo êbeh 30% gŏ êsei mnuih ƀuôn sang bi mlih knhuah mĭn, dơ̆ng lăm lui jih klei bhiăn amâo mâo lŏ djŏ, amâo lŏ jưh knang čang guôn klei knŭk kna đru ôh, čŏng pô thâo gĭr duh ƀơ̆ng tlaih mơ̆ng klei dleh dlan hŏng klei kjăp; êbeh 39% ênoh gŏ thâo ba yua klei kreh knhâo hlăm bruă duh mkra pla mjing leh mjeh mrâo kơ mnơ̆ng pla lehanăn mnơ̆ng rông, čhĭ mâo ênoh hĭn mơh; giăm 17% ênoh gŏ êsei mâo leh mnơ̆ng dhơ̆ng lehanăn ai tiê jăk mơak hŏng lu mnơ̆ng dhơ̆ng tloh blei mprăp, mâo nanao ênoh ba wĭt hơĭt jing klăi năng mơak êdi hŏng mnuih djuê ƀiă hlăm kdriêk.

Dưn yua boh tŭ dưn mơ̆ng mơ̆ng klei mtrŭt mjhar “Bi mlih klei mĭn, hdră ngă bruă hlăm mnuih djuê ƀiă, đru leh kơ mnuih djuê ƀiă kmlăn ai tiê mđĭ kyar klei hdĭp mda” klei anei dơ̆ng mtrŭn agha êlam hĭn leh, klă sĭt ƀuh boh tŭ dưn kdlưn hĭn nanao.  Bruă Đảng kdriêk Kon Braih yap sa hlăm dŭm hdră yuôm bhăn anăn jing lŏ dơ̆ng dưn yua bruă klam mơ̆ng dŭm gưl bruă Đảng jao bruă kơ grăp čô đảng viên đru bi dlăng ba dŭm gŏ êsei, êpul gŏ êsei lehanăn mnuih mâo k’hưm mnuih thâo bi hmô jăk mđrăm mbĭt ngă bruă anei./.