Alŭ mrô 4, să Phước Cát 2 kbưi hŏng krah kdriêk Cát Tiên 40km, hŏng giăm 50 gŏ êsei, 160 čô mnuih jing mnuih djuê ƀiă sơăi. Jing sa čô mnuih hlăm, đảng viên Điểu K’Điệp dôk bi mĭn nanao klei dleh dlan, klei awăt kƀah hlăm klei hdĭp lehanăn klei mnuih ƀuôn sang duh ƀơ̆ng. Mơ̆ng thŭn 2016, leh jing pô kiă kriê bruă mặt trận alŭ mrô 4, ñu ngă leh jăk bruă klam mkŏ plah wah gưl bruă Đảng, bruă sang čư̆ êa alŭ wăl lehanăn mnuih ƀuôn sang anăp wir phă bruă rŭ mdơ̆ng klei hdĭp jăk siam hĭn.

Msĕ si, Điểu K’Điệp mbĭt hŏng phung knuă druh hlăm alŭ ngă leh lu bruă mđrĭng hŏng klei hâo hưn, mtrŭt mjhar hlăm klei djŏ, kreh truh kơ grăp boh sang čiăng bi lar dŭm hdră êlan mơ̆ng Đảng, klei bhiăn knŭk kna čiăng kơ mnuih ƀuôn sang păn kjăp, lehanăn hlue ngă. Mbĭt hŏng anăn, păn kjăp klei mĭn klei mnuih ƀuôn sang čiăng, lŏ hưn hŏng anôk bruă Đảng, bruă sang čư̆ êa alŭ wăl. Điểu K’Điệp brei thâo, čiăng kơ mnuih ƀuôn jưh knang, lehanăn tui gưt, snăn asei ñu pô mtam jing tal êlâo hĭn mâo klei thâo bi hmô jăk ngă djăp mta bruă:

 “Kâo mtă mtăn kơ mnuih ƀuôn sang bi kreh kruiñ duh ƀơ̆ng, bi mlih mnơ̆ng pla, mnơ̆ng rông. Msĕ si ana kñŭl, tơdah ana khua leh, snăn bi mlih pla mnơ̆ng mkăn, ƀiădah amâo mâo dưi bi mlih ngă hlăm sa blư̆ ôh. Tơdah pla hlăm sa ha snăn drei bi mlih ƀrư̆ ƀrư̆ mơ̆ng sa sao êlâo, tơdah bi mlih hĕ jih hlăm sa blư̆ mgi dih dleh lŏ mâo mnơ̆ng ƀơ̆ng huă. Lŏ lăn msĕ mơh mtă kơ mnuih ƀuôn sang ksiêm kơ klei hluăt ƀơ̆ng mnơ̆ng ngă, ksiêm dlăng bi kluôm. Bi kơ hdră răng kriê rông ba anak aneh, kkiêng mơ̆ng sa truh kơ dua čô anak đuič, amâo lŏ kkiêng anak tal 3 ôh”.

Bi mlih klei mĭn dơ̆ng mơ̆ng bruă điêt, klei hdĭp mnuih ƀuôn sang ti alŭ mrô 4, să Phước Cát 2 mâo leh klei bi mlih jăk, jih jang klei bhiăn hđăp amâo lŏ djŏ dơ̆ng lui jih. Ară anei grăp boh sang dơ̆ng mĭn kơ klei duh ƀơ̆ng, thâo ba yua klei kreh knhâo hlăm klei duh mkra pla mjing. Snăn krĭng ƀuôn sang ƀuh mâo leh klei bi mlih jăk. Êlan klông mngač tač, sang pưk doh siam, khuăt, war êning kbưi hŏng sang dôk, lehanăn dlăng kriê hŏng klei doh mơh.

Klei hdĭp mda leh hơĭt snăn mnuih ƀuôn sang lŏ dơ̆ng kơrŭ wĭt bruă dhar kreh djuê ana pô. Dŭm êpul tông čing, êpul kdŏ, êpul čưng boh êkei, êpul pah boh mniê lehganăn êkei ti alŭ mrô 4 ngă nanao leh hŏng klei jăk, lehanăn mâo ba wĭt lu klei tŭ dưn ti dŭm anôk bi lông mâo să, kdriêk mkŏ mjing. Điểu K’Điệp yăl dliê:

Mnuih ƀuôn sang mâo leh êpul tông čing, mâo leh êpul kdŏ, bruă mñăm bŭng bai mâo lŏ ngă, lu mnuih thâo hrĭ mñam lŏ wĭt bruă pô đưm. Kâo mtă mnuih ƀuôn sang đăm lui ôh ya jing knhuah gru dhar kreh pô jăk siam drei bi djă pioh”.

Tui si Đường Bình Độ, Khua bruă mặt trận să Phước Cát 2, alŭ mrô 4 jing alŭ wăl krĭng taih kbưi, êlan klông dôk dleh dlan, klei hdĭp mda dôk kñap mñai. Ară anei alŭ mâo leh klei bi mlih hlăm djăp mta, hlăm anăn êdah êdi jing bruă mkŏ mkra krĭng ƀuôn sang mrâo, lehanăn bi hrŏ ƀun hŏng klei kjăp. Mnuih ƀuôn sang mâo leh klei thâo săng kpưn đĭ hlăm klei hdĭp čiăng bi trei mđao jăk yâo. Boh tŭ dưn anei mâo jing klei đru mguôp jăk mơ̆ng đảng viên mda asei Điểu K’Điệp, Khua bruă mặt trận alŭ mrô 4:

 “Mtô mblang, mtă mtăn kơ mnuih ƀuôn sang hlue ngă djŏ hdră êlan mơ̆ng Đảng knŭk kna bi jăk. Kơ klei mđĭ kyar klei hdĭp mda snăn hlăm dŭm thŭn êgao mnuih ƀuôn sang ti alŭ mrô 4 jih ai tiê duh ƀơ̆ng, snăn klei hdĭp đĭ hĭn leh, bruă mnuih djuê ƀiă ăt mâo ngă jăk. Hlăm dŭm thŭn êgao, asei Điểu K’Điệp mtam yơh nao mtrŭt mjhar mnuih ƀuôn sang kơ dŭm bruă msĕ si mkŏ mkra krĭng ƀuôn sang mrâo, lehanăn jih jang bruă mơ̆ng să lehanăn kdriêk pŏk ngă”.

Hŏng jih jang klei mâo mguôp leh jăk hlăm bruă mkŏ mkra ƀuôn sang, Điểu K’Điệp mâo leh klei myun mâo knơ̆ng bruă mặt trận čar Lâm Đồng bi mni lehanăn mđup brei leh hră bi mni jing Khua bruă mặt trận krĭng mnuih djuê ƀiă kdlưn hĭn hlăm wưng thŭn 2016 - 2021./.