Mơ̆ng mkrah mlan hŏng anei, A Kiêu, ti alŭ Kon Long, să Đăk Tơ Lung, kdriêk Kon Braih, čar Kon Tum bŏ hŏng klei hơ̆k mơak. Dôk hlăm sang dơ̆ng leh, ñu brei thâo, hlăm sang mâo 6 čô wăt mduôn leh anăn hđeh, sang hđăp tĭ ƀrôč đei kyuanăn sĭt hjan hlĭm srăng duah anôk thu čiăng đih pĭt. Mâo khua dlăng bruă đảng nah gŭ A Tẻ mđĭ ai, gŏ sang ñu mâo klei đăo knang găn klei rŭng răng sang pô amâo mâo mnơ̆ng dhơ̆ng čiăng rŭ mdơ̆ng sang mrâo:

 “Êlâo dih gŏ sang kâo dôk hlăm sang tĭ ƀrôč, sĭt hjan anôk pĭt kăn mâo. Ară anei mâo knŭk kna đru 60 êklăk prăk čiăng rŭ mdơ̆ng sang mrâo. Leh anăn găp djuê đru kơ gŏ sang nao mă čuah, boh tâo. Mâo sang lŏ brei thiăm simăng, đru mă bruă amâo mâo mă prăk. Sang mrâo dơ̆ng leh, yan hjan thŭn anei gŏ sang mâo klei hơĭt”.

Hluê ngă hdră bi lông ktưn hrăm mbĭt msir lăm sang dôk êjai, sang tĭ rưč, anôk bruă đảng ƀuôn Kon Long bi klă hlăm ƀuôn mâo 2 gŏ sang čiăng mâo sang rŭ mdơ̆ng mrâo jing gŏ sang A Kiêu leh anăn amai Y Seng. Mơ̆ng bruă nao êlâo đru kơ 2 gŏ mdơ̆ng sang mơ̆ng 9 čô đảng viên hlăm anôk bruă, 96 gŏ sang sa ai bi hluê ngă. Khua dlăng bruă đảng alŭ A Tẻ brei thâo, kyua mâo klei hrăm mbĭt, klei đru mơ̆ng mnuih ƀuôn sang hŏng ai tiê ya dŏ mâo đru dŏ anăn, grăp boh sang mâo knŭk kna đru 60 êklăk prăk ƀiădah klă sĭt ênoh sang truh kơ 1 êtuh êklăk pră. Sang dôk mơ̆ng 2 gŏ sang dleh dlan hĭn hlăm ƀuôn ăt dưi siam leh anăn kjăp hĭn:

 “Mnuih ƀuôn sang hur har đru kơ dŭm gŏ sang dleh dlan, đru ruh sang, klei tur. Dŭm êpul bruă ƀuôn mtrŭt mjhar mnuih ƀuôn sang đru bi krum mguôp prăk kăk grăp gŏ sang 5 êbâo. Mnuih ƀuôn sang đru mdiăng mnơ̆ng yua, đru pŭ ƀrick. Diñu đru hur har êdi”.

Čar Kon Tum mâo 2.752 boh sang dôk êjai, hlăm sang klei čiăng rŭ mdơ̆ng mrâo giăm 2.200 boh sang leh anăn mkra mđĭ 560 boh sang. Ti anăp boh sĭt ngăn prăk mơ̆ng čar amâo mâo djăp, lu gŏ sang krĭng taih kbưi, dleh dlan hlăm bruă dŭ mdiăng, bi kƀĭn mnơ̆ng yua…Êpul gĭt gai msir lăm sang tĭ rưč dŭm gưl čar Kon Tum bi myuôm bruă klam nao êlâo, bi hmô kơ grăp čô Đảng viên leh anăn gưl bruă đảng nah gŭ hlăm klei đru kơ mnuih ƀuôn sang rŭ mdơ̆ng, mkra mđĭ sang dôk. Nguyễn Văn Thuỷ, k’iăng khua bruă sang čư̆ êa kdriêk Kon Braih brei thâo, amâo djŏ knŏng đru kơ mnuih ƀuôn sang hŏng klei mtă, đru kơ hdră mnêč rŭ mdơ̆ng, diñu lŏ iêo mkrum, iêo jak dŭm ai dưi čiăng kơ dŭm boh sang dưi rŭ mjing, mkra mđĭ dưi kjăp hĭn hŏng ênoh dưi đru:

 “Ti gŭ klei gĭt gai mơ̆ng bruă đảng kdriêk, Êpul khua bruă Đảng kdriêk, bruă msir lăm sang tĭ rưč dưi mâo klei sa ai nao hgŭm mơ̆ng knuă druh, đảng viên leh anăn mnuih ƀuôn sang tinei. Knuă druh, đảng viên nao truh grăp gŏ sang čiăng ngă klei đru.”

Klă sĭt brei ƀuh êbeh 440 čô khua dlăng bruă đảng nah gŭ hlŏng ngă khua ƀuôn mbĭt hŏng dŭm êbâo čô đảng viên mơ̆ng čar Kon Tum đru mguôp klă klơ̆ng, tŭ dưn hlăm klei gĭr msir hlăm sang dôk êjai, sang tĭ rưč kơ mnuih ƀuôn sang. Truh knhal jih mlan 3, čar Kon Tum dưi rŭ mdơ̆ng mrâo, mkra mđĭ 1.776 boh sang. Nguyễn Khắc Thời,, khua ƀuôn Kon Jri Xut, să Đăk Bla, ƀuôn prŏng Kon Tum brei thâo:

 “Anôk bruă mâo 9 čô đảng viên. Đảng viên srăng bi hmô đru kơ phung ƀun ƀin msir hlăm sang dôk êjai, sang tĭ rưč. Mmông kkuh kơ hla čhiăm gru grăp hruê kăm, grăp mlan anôk bruă hâo hưn mtrŭt mjhar mnuih ƀuôn sang đru mguôp hruê ai kơ hdră lăm lui sang ti ƀrôč”.

Nguyễn Duy Lơ, Khua dlăng bruă Đảng nah gŭ hlŏng ngă khua ƀuôn Đăk Tăng, să Rơ Kơi, kdriêk Sa Thầy brei thâo:

 “Hŏng bruă klam jing khua ƀuôn, kâo mtrŭt mjhar mnuih ƀuôn sang hlăm ƀuôn leh anăn phung hlăk ai nao đru, ya mnơ̆ng mâo đru mnơ̆ng anăn, mâo ai đru ai, mâo prăk đru prăk. BI mkrum mguôp prăk mơ̆ng gưl dlông đru kơ dŭm gŏ sang rŭ mdơ̆ng sang kjăp hĭn čiăng kơ mnuih ƀuôn sang mâo klei hơĭt mă bruă knuă hlăm dŭm hruê hlĭm hjan”.

Hdră bi lông ktưn, Hrăm mbĭt lăm lui sang dôk êjai, sang tĭ rưč hlăm lăn čar thŭn 2025 mơ̆ng čar Kon Tum hluê ngă amâo djŏ knŏng mdei hlăm bruă bi mlih pưk sang, ƀiădah lŏ jing sa kdrêč yuôm hlăm bruă mkŏ mjing leh anăn bi kjăp klei đăo knang mơ̆ng mnuih ƀuôn sang hŏng Đảng. Dŭm bruă ngă klă klơ̆ng mơ̆ng khua đảng viên ti Kon Tum bi êdah klă bruă klam nao êlâo hlăm bruă kriê dlăng klei hdĭp gŏ sang adôk dleh dlan. Čar Kon Tum gĭr truh knhal jih mlan 6/2025 srăng bi leh bruă rŭ mdơ̆ng mrâo, mkra mđĭ sang dôk êjai, sang tĭ rưč, đru kơ dŭm gŏ sang dleh dlan hlăm čar mâo klei hdĭp jăk hĭn leh anăn hơĭt hĭn ti anăp yan hjan hlĭm kơ anăp.