Y- Dân Êban (djuê ana Ê Đê) jing đảng viên bi mguôp ti êpul bruă Đảng alŭ Đoàn Thành 2, să Hòa Đông, kdriêk Krông Pač, čar Daklak. Tết leh êgao gŏ sang bŏ hŏng klei mơak kyua boh mnga mâo djŏ êa hlĭm hjan, čhĭ mâo ênoh lehanăn lŏ mâo prăk čiu hnô prŏng truh 3,4 êklai prăk pioh ruh mgaih anôk ala mkra êlan dơ̆ng pral Khánh Hòa – Ƀuôn Ama Thuôt. Hŏng ênoh prăk anăn ñu bi liê truh 500 êklăk blei ô tô pioh đĭ hiu, êbeh 2,9 êklai prăk adôk lŏ duh bi liê kơ bruă knuă blei mâo 2 ha lăn kphê pla pluă mbĭt boh durian. Klei blei êdeh, lehanăn lŏ duh kơ bruă hma pưk mâo leh jih sa boh sang tĭng mkă leh hŏng klei nik lehanăn truh kơ klei bi tŭ ư leh hmư̆ hing lăn lehanăn mnơ̆ng pô pla mjing tuôm hŏng klei hrui mă pioh mâo anôk mkra êlan. Đảng viên Y- Dân lač:

 “Hmei mâo jih jang truh 8,4 sào lăn kphê, boh durian, tiu lehanăn dŭm mta boh kroh mkăn grăp thŭn mâo ba wĭt kah knar 300 êklăk prăk. Leh mâo hdră êlan hlăk thŭn 2021, kyua kâo jing đảng viên, lehanăn jih jang mnuih hlăm gŏ sang ăt jing đảng viên kyuanăn kâo sa ai hŏng hdră êlan mơ̆ng knŭk kna mkra êlan, hmei nao đru ksiêm yap lehanăn mâo klei knŭk kna čiu hnô, čang hmăng mgi dih leh mkra êlan anei mâo êlan nao ngă bruă găl ênưih, êrô hiu jăk, bi mnia mblei ênưih”.

          Gŏ sang đảng viên Y - Ngăt Niê ti să Ea Yông, kdriêk Krông Pač ăt mâo êbeh 500 m2 lăn lehanăn êbeh 70 phŭn kphê dôk hlăm ênhă djŏ ruh mgaih pioh mkra êlan dơ̆ng pral Khánh Hòa – Ƀuôn Ama Thuôt. Ñu brei thâo, hŏng lăn anăn, lehanăn kphê pô pla leh, gŏ sang ñu mâo tŭ mă truh êbeh 120 êklăk prăk čiu hnô. Jih jang ênoh prăk anei ñu pioh lŏ duh kơ bruă knuă, lehanăn mlih hĕ tuil sang krum sô leh. Gŏ sang ñu ăt jing sa hlăm dŭm gŏ sang ba êlan êlâo ti să Ea Yông ngă bruă mkă tĭng, lehanăn tŭ ư klei čiu hnô anăn kñăm pral mâo ba jao anôk ala kơ êpul mkra êlan. Đảng viên Y - Ngăt lač:

 “Mâo klei iêo mthưr ba jao anôk ala pioh kơ bruă mkra êlan dơ̆ng pral Khánh Hòa – Buôn Ma Thuột snăn gŏ sang kâo tŭ ư hŏng ênoh čiu hnô anăn. Kyua pô jing đảng viên mơ̆ng anăn pô ba êlan êlâo, čiăng kơ mnuih ƀuôn sang   ƀuh ti pô lehanăn tui hlue, mgi dih dưi mâo êlan jăk êlan siam. Lehanăn kâo ăt iêo mthưr mnuih ƀuôn sang hlei pô djŏ hlăm ênhă knŭk kna hrui mă snăn bi pral mâo klei tŭ ư djăp ba jao anôk kơ bruă mkra êlan klông, snăn digơ̆ mơak mñai tui hlue sơăi, tŭ ư sơăi hŏng ênoh čiu hnô anăn.

          Bruă mkra êlan dơ̆ng pral Khánh Hòa – Ƀuôn Ama Thuôt, wưng tal 1 găn kdriêk Krông Pač hŏng boh taih 33,3 km, anôk ruh mgaih pioh mkra êlan êbeh 255 ha. Êbeh 2.000 gŏ êsei dôk hlăm 8 să mâo lăn hmăi djŏ pioh hrui mă. Knơ̆ng bruă sang čư̆ êa kdriêk mâo ngă leh 9 gưl čiu hnô, hŏng ênoh prăk jih jang êbeh 344 êklai prăk. Jih jang ênhă čiu hnô anăn hlăm kdriêk mâo ba jao leh kơ êpul rŭ mkra êlan pioh ngă êlan.

           Tui si Phạm Văn Hà – k’iăng khua knơ̆ng bruă sang čư̆ êa să Hòa Đông, lăn ala ti kdriêk Krông Pač, hlăm anăn mâo să Hòa Đông jing lăn bazan sơăi, guôp êdi hŏng bruă pla kphê, tiu, boh nik boh durian čhĭ yuôm snăk. Grăp ha dưi mâo ba wĭt mơ̆ng 800 - 1,2 êklai prăk/thŭn. Khădah klei tŭ dưn jing prŏng êdi yơh, ƀiădah tuôm hŏng hdră êlan knŭk kna hrui mă pioh rŭ mkra êlan dơ̆ng pral, snăn lu mnuih ƀuôn sang bi tŭ ư, ba akŏ hlăm anăn jing phung đảng viên hlăm anăn lu jing phung đảng viên mnuih djuê ƀiă ti să. Phạm Văn Hà lač:

           “Hlăm ênoh 152 gŏ êsei ti să Hòa Đông mâo êlan dơ̆ng pral găn, snăn giăm mkrah gŏ êsei ti anăn jing mnuih djuê ƀiă, lehanăn mâo lu gŏ êsei jing knuă druh, đảng viên. Snăn jih jang phung knuă druh, đảng viên anăn bi ba akŏ sơăi ba jao anôk ala pioh kơ bruă mkra êlan. Bi hmô êdah êdi jing Y- Dân, gŏ sang ñu mâo lăn prŏng giăm 1 ha lăn djŏ hlăm anôk ruh mgaih, ăt jih ai tiê đru bi nao yap, tŭ mă prăk čiu hnô. Mbĭt hŏng phung đảng viên mkăn ngă snăn mơh.”

          Hŏng klei mĭn “đảng viên nao êlâo mnuih ƀuôn sang tui tluôn” mơ̆ng phung đảng viên ở xã Hòa Đông lehanăn Ea Yông hlăm kdriêk Krông Pač, čar Daklak, bruă ruh mgaih anôk ala pioh jao kơ êpul êya mkra êlan dơ̆ng pral Khánh Hòa - Buôn Ma Thuột mâo mă bruă hŏng klei pral hĭn mkă hŏng dŭm boh kdriêk mkăn ti čar Daklak./.