Hrue knhăl jih hrue kăm, đảng viên Y Bleng, djuê ana M’Nông, sa čô kahan hđăp lehanăn jing khua mduôn kơ bon 9, să Dak Drô, kdriêk Krông Knô mbĭt hŏng êpul kiă kriê ƀuôn nao čuă dŭm gŏ êsei ƀun hlăm bon. Mơ̆ng anăn, ñu lehanăn êpul kiă kriê ƀuôn hâo hưn mtô mblang kơ dŭm gŏ êsei thâo duh ƀơ̆ng bi mlih klei mĭn mă bruă. Khua mduôn Y Bleng brei thâo, hlăm 5 đảng viên, 5 gŏ êsei thâo mâo srăng đru kơ sa gŏ êsei ƀun. Diñu srăng đru ba digơ̆ mơ̆ng mjeh pla mjing truh kơ hdră dlăng kriê wiê ênăk mnơ̆ng pla mjing... Truh kơ tui duah anôk čhĭ boh mnga mâo. Dŭm gŏ êsei mâo ktrâo atăt hlăm grăp mta bruă ngă, lehanăn dôk mđĭ ai digơ̆ gĭr ktĭr hlăm klei duah ƀơ̆ng. Mta kñăm mơ̆ng bon jing leh 3 thŭn đru dŭm gŏ êsei ƀun dưi tlaih mơ̆ng klei dleh dlan hŏng klei kjăp. Y Bleng lač:

“Ayŏng adei thâo bi mđĭ ai hdơ̆ng găp, mtrŭt mnuih ƀuôn sang thâo bi mguôp, hlăm klei duah ƀơ̆ng. Amâo mâo djŏ knŏng hjăn phung kahan hđăp đuič ôh, ƀiădah mđĭ ai jih jang mnuih ƀuôn sang, bi đru čung ba dŭm gŏ êsei dleh dlan, nanao msĕ snăn yơh. Hlei sang dôk hlăm klei dleh dlan, bi mtrŭt phung ayŏng adei thâo mâo nao đru digơ̆”.

Hrue 23/3 anei, čar Dak Nông mkŏ mjing klei bi hdơr 20 thŭn hrue mkŏ mjing čar, ăt jing hrue bi hdơr 49 thŭn Gia Nghĩa, čar Quảng Đức (hđăp) mâo klei êngiê. Ƀuh klei bi mlih hlăm mnuih ƀuôn sang, ti ƀuôn prŏng Gia Nghĩa, đảng viên, khua mduôn Điểu Đi, bon Bu Păng 2, lŏ bi hdơr hlăk ênuk nao ngă pô ba hră kơ cách mạng ti krĭng phŭn krŭ kdơ̆ng knông lăn Quảng Trực, Tuy Đức. Ñu lač, ênuk bi blah tuôm hŏng phung roh mplĕ bom kih bi mdoh ktang phĭt, ƀiădah mnuih ƀuôn sang ăt kiă kriê lăn ala aê aduôn pô, sa ai tiê tui hlue Đảng, tui hlue cách mạng. Leh lăn čar mâo klei êngiê, klei hdĭp mda mnuih ƀuôn sang knư̆ hrue knư̆ trei mđao, knông lăn mâo klei bi mlih grăp hrue, Điểu Đi ƀaih hĭn mơh đăo knang kơ klei Đảng kiă kriê:

 “Ênuk mblah ngă snăn mđrăm mbĭt hŏng cách mạng răng kriê krĭng lăn pô. Leh lăn čar mâo klei êngiê, snăn gĭr ktĭr duh ƀơ̆ng, rŭ mdơ̆ng ƀuôn sang. Hŏng klei jing sa čô đảng viên, mnuih mâo k’hưm snăn hmei mtrŭt mjhar mnuih ƀuôn sang mâo ai tiê thâo bi mguôp gĭr ktĭr duah ƀơ̆ng, mđĭ kyar klei hdĭp lehanăn bi đru răng mgang kjăp krĭng knông lăn anei”.

Pưng myưng hŏng klei hdĭp ti ƀuôn sang Dak Nia (Ƀuôn prŏng Gia Nghĩa), jing anôk kơ knhuah gru hlăm thŭn 1960 Êpul B90 mơ̆ng dưr lehanăn êpul C200 mơ̆ng dhŭng mâo klei bi tuôm mbĭt, pŏk êlan Hồ Chí Minh hlăk anăn, K Sung, K’iăng khua bruă Đảng lehanăn jing khua bon Ting Wel Đơm, ƀai hĭn mơh mâo klei mơak leh ƀuôn sang pô mâo klei đĭ kyar:

“Hlăm ênuk bi blah, mnuih ƀuôn sang djuê ƀiă mâo nanao klei đăo knang kơ Đảng. Bă truh kơ ară anei, mnuih ƀuôn săng ăt jưh knang kơ Đảng, klei bhiăn knŭk kna, mâo nanao klei thâo bi mguôp, răng kriê klei êđăp ênang pô mâo leh ară anei, lehanăn thâo bi mguôp nanao čiăng mđĭ kyar klei hdĭp mda, kpưn đĭ nao kơ mdrŏng sah”.

Dưn yua bruă klam jing phung đảng viên, mnuih mâo k’hưm hlăm ƀuôn sang, găn leh 20 thŭn rŭ mdơ̆ng (leh bi ktlah mơ̆ng čar Daklak hđăp), čar Dak Nông ară anei păn kjăp nanao klei êđăp ênang bruă kđi čar, mđĭ kyar kjăp bruă duh mkra ala ƀuôn. Thŭn 2020, Dak Nông tlaih leh mơ̆ng sa boh čar ƀun, lehanăn ktưn srăng jing sa boh čar đĭ kyar ti krĭng lăn dap kngư.

 Hŏng dŭm mta kñăm mrâo nao hlăm klei hdĭp, thŭn 2013, bruă Đảng čar Dak Nông mâo mtrŭn hdră êlan mă bruă mrô 05 kơ bruă mkŏ mjing phung knuă druh knơ̆ng hlăm krĭng mnuih djuê ƀiă. Truh kơ ară anei, êpul anei mâo leh giăm 500 čô, mâo mprăp klei thâo săng kơ hdră êlan mơ̆ng Đảng, klei bhiăn knŭk kna, thâo mtrŭt mjhar mnuih ƀuôn sang hlăm boh klei mrâo. Mơ̆ng anăn, diñu čŏng jih ai tiê ngă jăk djăp mta bruă, pral thâo săng ai tiê klei mĭn mnuih ƀuôn sang, ba bi êdah hŏng alŭ wăl ya mta klei čiăng bi mâo hdră mghaih msir hŏng klei djŏ. Mơ̆ng klei thâo mtrŭt mjhar mnuih ƀuôn sang, dưi đru leh kơ mnuih ƀuôn sang mâo klei thâo răng, bi kdơ̆ng hŏng djăp mta klei mčeh luar, klei duah mjhua hŏng djuê ana, lehanăn klei đăo mngă klei amâo mâo djŏ. Mâo leh lu klei mjhĭk mtŭl, klei bi mmiă mâo bi mgrăng hŏng klei êđăp ênang. Mbĭt anăn dŭm phung thâo bi hmô anei, jih ai tiê mơh mkŏ mjing klei bi ktưn thâo khăp kơ lăn čar, mâo lu klei mtrŭt mjhar hlăm ƀuôn sang, msĕ si jih jang mnuih ƀuôn sang thâo bi mguôp mkŏ mkra krĭng ƀuôn sang mrâo, bi hrŏ ƀun hŏng klei kjăp.

   Hồ Văn Mười, Khua knơ̆ng bruă sang čư̆ êa čar Dak Nông lač, tiŏ nao phung đảng viên, phung mâo k’hưm hlăm ƀuôn sang, anăn yơh jing bruă tal êlâo mơ̆ng dŭm gưl dhar bruă ti čar dôk mđing:

“Dŭm gưl bruă Đảng, bruă sang čư̆ êa alŭ wăl jih ai tiê čŏng mkŏ mjing djăp mta bruă ngă dưn yua jih phung mâo k’hưm, knuă druh knơ̆ng, lŏ dơ̆ng mkŏ mjing, bi kjăp, mjut mjing lu knuă druh hlăm krĭng mnuih djuê ƀiă, lŏ bi lar lu klei bi hmô jăk, msĕ si hlăm klei mđĭ kyar bruă duh ƀơ̆ng, bruă hlăm klei hdĭp mda ala ƀuôn, lehanăn bruă đru bi răng mgang klei êđăp ênang ti ƀuôn sang pô, kñăm sa ai mbĭt bi rŭ mdơ̆ng ƀuôn sang pô knư̆ hrue knư̆ mdrŏng sah jăk siam”.

Dlăng wĭt jih jang bnruă klam mơ̆ng phung mâo k’hưm hlăm mnuih djuê ƀiă, mâo hdră êlan mă bruă djŏ guôp čiăng dưn yua jih hnơ̆ng bruă klam “mơ̆ng mnŭt akŏ êa hra akŏ ƀuôn”, mâo đru leh kơ čar Daknông păn kjăp klei êđăp ênang bruă kđi čar, mâo ba wĭt leh boh tŭ dưn prŏng hlăm bruă mđĭ kyar klei duh mkra./.