Anôk bruă Đảng alŭ Đăk Ga, să knông lăn Đăk Nhong, kdriêk Đăk Glei, čar Kon Tum mâo 23 čô đảng viên leh anăn jih jang jing mnuih Jeh Triêng. Mơ̆ng klei mjĕ giăm hŏng mnuih ƀuôn sang, nao êlâo bi hmô mơ̆ng phung đảng viên, 112 gŏ sang hŏng 360 čô ti alŭ Đăk Ga nao hgŭm hur har hlăm bruă răng mgang knông lăn ala čar. Hŏng ai tiê thâo khăp, thâo pap, bi đru hdơ̆ng pô mđĭ kyar klei hdĭp mda mơ̆ng mnuih ƀuôn sang hlăm alŭ dưi bi lar. Khua dlăng bruă Đảng ti alŭ A Cu brei thâo, grăp thŭn grăp čô đảng viên mâo klei ƀuăn leh anăn mâo hdră êlan tui ngă, hluê hriăm gru mngač Awa Hồ. Asei A Cu ăt msĕ mơh hŏng phung đảng viên mkăn hlăm anôk bruă đảng ƀuh bruă tui hriăm leh anăn hluê ngă gru mngač awa Hồ jing jĕ giăm, klă klơ̆ng:

 “Grăp hruê pô hluê hriăm leh anăn hluê ngă gru mngač awa Hồ jing hriăm leh anăn hluê ngă dŭm klei jăk. Hriăm mơ̆ng awa mkiêt mkriêm hlăm grăp hruê. Leh anăn mtrŭt mjhar mnuih ƀuôn sang mđĭ kyar klei hdĭp mda gĭr ktưn kpưn đĭ tlaih ƀun hŏng klei kjăp”.

Thŭn 2023 hluê ngă hdră mtrŭn mơ̆ng bruă Đảng čar Kon Tum hluê ngă gru mngač Awa Hồ kơ bruă jih ai tiê mkŏ mjing čar Kon Tum đĭ kyar hmar leh anăn kjăp, dŭm anôk bruă đảng nah gŭ krĭng mnuih djuê ƀiă mơ̆ng čar Kon Tum mâo lu hdră hluê hriăm leh anăn tui ngă gru mngač Awa Hồ găl guôp hŏng boh sĭt mơ̆ng grăp alŭ ƀuôn. K’iăng khua bruă đảng nah gŭ A Vet, mnuih djuê ana Hrê, alŭ Vi Ô Lăk, să Pờ Ê, kdriêk Kon Plông brei thâo, ƀuh mnuih ƀuôn sang hlăm alŭ thâo kơ bruă rông mnơ̆ng, ngă mdiê lŏ, mâo klei thâo hlăm bruă lŏ hma, ñu bi klă bruă anei hŏng hmăng hmưi đru kơ mnuih ƀuôn sang mđĭ kyar bruă mkra mjing:

 “Msĕ si awa Hồ mtô đảng viên srăng bi hmô, nao êlâo, ngă êlâo kơh mnuih ƀuôn sang ƀuh leh anăn hluê ngă. Kčưm mơ̆ng bruă rông mnơ̆ng pô ksiêm duah, hâo hưn kơ mnuih ƀuôn sang rông mnơ̆ng srăng ngă war doh, amâo mâo čhŏ djhan čiăng gang mkhư̆ klei ruă tưp. Ngă lŏ pô srăng hriăm ti mjeh mâo lu asăr leh anăn pô hâo hưn kơ mnuih ƀuôn sang”.

Jing sa hlăm dŭm gru hmô đảng viên mnuih djuê ƀiă dưi mâo klei pah mni hlăm klei kƀĭn trông bi klă bruă hluê ngă klei bi klă mrô 01 mơ̆ng Phŭn bruă kđi čar kơ bruă lŏ dơ̆ng hluê ngă asăp mtrŭn mrô 05 mơ̆ng Phŭn bruă kđi čar kơ bruă mtrŭt mđĭ klei hluê ngă gru mngač Hồ Chí Minh thŭn 2023 – 2024 mơ̆ng bruă Đảng čar Kon Tum mkŏ mjing ƀri wưng hruê k’kiêng awa Hồ mlan 5 mrâo êgao, khua bruă Đảng alŭ A Huế, mnuih djuê ana Sêdang, ƀuôn Kon Nhên, să Đăk Ruồng, brei thâo:

 “Hluê ngă gru mngač Hồ Chí Minh, kâo pô mtrŭt mjhar mnuih ƀuôn sang mkŏ mkra krĭng ƀuôn sang mrâo. Kâo pô lŏ dơ̆ng mtrŭt mjhar mnuih ƀuôn sang bi mkrum mguôp čiăng mkra wĭt êlan klông. Pla ana kyâo ktuê êlan dơ̆ng. Ƀuh hlăm boh sĭt ară anei mnuih ƀuôn sang đĭ kyar hĭn leh”.

Mơ̆ng bruă hluê ngă gru mngač Awa Hồ, 3 thŭn êgao đảng viên ti dŭm kdriêk, să mơ̆ng čar Kon Tum mkŏ mjing leh êbeh 800 klei bi hmô bi đru hdơ̆ng pô mđĭ kyar bruă duh mkra, mkra wĭt đang pla mjing, lui hĕ dŭm klei bhiăn kthul mluk… Mơ̆ng dŭm klei bi hmô anei, êbeh 6.300 gưl gŏ sang mnuih djuê ƀiă ƀun ƀin leh anăn êbeh 3.300 gưl gŏ sang giăm ƀun dưi mkăp brei mjeh, hdră mnêč hlăm bruă mđĭ kyar klei hdĭp mda. K’iăng khua bruă Đảng kdriêk Ngọc Hồi Phạm Hải Châu brei thâo, bruă đảng kdriêk bi klă nanao klei hluê ngă gru mngač awa Hồ jing bruă klam kđi čar yuôm bhăn mrô 1. Anei ăt jing mta yuôm bhăn đru bi mlih alŭ wăl mâo mnuih djuê ƀiă giăm 60% ênoh mnuih ƀuôn sang mơ̆ng kdriêk:

 “Bruă hluê ngă gru mngač Awa Hồ dưi mđĭ klei thâo săng leh anăn mkŏ mjing klei sa ai mơ̆ng kluôm anôk bruă Đảng hlăm bruă klam kđi čar, bruă duh mkra ala ƀuôn, klei êđăp ênang leh anăn mkŏ mjing Đảng leh anăn bruă kđi čar. Bi kjăp klei đăo knang mơ̆ng mnuih ƀuôn sang hŏng Đảng. Bruă hluê ngă gru mngač awa Hồ dưi nao êlam hĭn, hluê ngă lu klei bi hmô, hdră ngă bruă jăk, tŭ dưn leh anăn pŏk mlar”.

Bi lar bruă hluê ngă gru mngač Awa Hồ, dŭm anôk bruă Đảng nah gŭ krĭng mnuih djuê ƀiă mơ̆ng čar Kon Tum mâo leh dŭm klei đru mguôp yuôm bhăn hlăm bruă hluê ngă dŭm mta kñăm mđĭ kyar mơ̆ng bruă Đảng čar Kon Tum msĕ si: Mđĭ hnơ̆ng bruă mkŏ mkra krĭng ƀuôn sang mrâo, bi hrŏ ƀun hŏng klei kjăp, hluê ngă tŭ dưn klei mtrŭt mjhar bi mlih klei mĭn, hdră ngă mơ̆ng mnuih djuê ƀiă, brei kơ digơ̆ gĭr ktưn kpưn đĭ tlaih mơ̆ng klei ƀun ƀin. Bruă bi lar klei bi hmô hluê ngă gru mngač Hồ Chí Minh mơ̆ng Đảng lŏ ngă klei iêo mthưr, lar ƀra boh tŭ dưn, klei yuôm bhăn mơ̆ng bruă hluê ngă gru mngač Awa Hồ ti krĭng mnuih djuê ƀiă čar Kon Tum./.