Jing sa hlăm phung đảng viên dưi mă hră mkiêt mkriêm, Trần Thanh Tâm, Bruă Đảng ƀuôn hgŭm Bình Tân, wăl krah Ƀuôn Hồ brei thâo: sui hŏng 6 thŭn bi drăm hlăm êlan klông, 2 thŭn akŏ dôk sa anôk. Hlăm djăp bruă ñu awăt snăk, djăp mta hlăm klei hdĭp jưh kơ mô̆, anak. Klei mđĭ ai, đru mơ̆ng mnơ̆ng dhơ̆ng truh ai tiê phung hlăm êpul bruă đảng leh anăn găp djuê ƀuôn sang jing boh drŭt jing prŏng đru kơ ñu mâo thiăm ai gĭr hlăm klei ruă tưp, hgao klei dleh dlan mơ̆ng klei hdĭp mda:

“Tơdah mâo klei amâo mâo jăk truh kơ asei mlei ară anei ăt mâo bruă sang čư̆ êa alŭ wăl mđing dlăng, amâodah mđĭ klei suaih pral čiăng gĭr ktưn hgao klei ruă tưp, asei awăt, amâo dưi ngă sa mta bruă ôh, knŏng knang kơ mô̆ anak đuč.”

Ăt tuôm bi drăm hlăm êlan klông leh anăn mâo mă hră mkiêt mkriêm Kmŭt kñĭ, đảng viên Y Mơi Ktla, bruă đảng buôn Dlung 1B, ƀuôn hgŭm Thống Nhất, wăl krah Ƀuôn Hồ, brei thâo, gŏ sang jing gŏ êsei ƀun, knŏng mâo 4 sao lăn hma. Mâo mă ênoh prăk đru 5 êklăk prăk, gŏ sang bi liê kriê dlăng ana pla mjing hŏng klei čang hmăng mđĭ hnơ̆ng, mđĭ prăk hrui wĭt kơ gŏ sang:“Bi mni kơ bruă Đảng ƀuôn hgŭm đru hră mkăp čiăng mđĭ ênoh prăk đru kơ gŏ sang. Hră mkiêt mkriêm anăn mâo ênoh prăk čiăng blei hbâo pruê kriê dlăng kphê leh anăn blei ana mjeh leh anăn blei êa drao mdrao kơ pô”.

Msĕ snăn mơh, hŏng hră mkiêt mkriêm dưi đru, đảng viên H’Môi Buôn Yă, êpul bruă đảng ƀuôn Dlung 1A, ƀuôn hgŭm Thống Nhất mguôp blei sa drei êmô mjeh ba rông:“Mrâo êgao kâo mâo hră mkiêt mkriêm kmŭt kñĭ, khădah amâo lu ôh ƀiădah kâo mơak snăk, đru kâo sa kdrêč čiăng đru kơ klei hdĭp mda gŏ sang pô hlăk anăn.”

Hdră “hră mkiêt mkriêm kmŭt kñĭ” mâo bruă Đảng wăl krah Ƀuôn Hồ pŏk ngă mơ̆ng mlan 3 thŭn 2023. Hlue anăn, grăp čô knuă druh, đảng viên hlăm wăl krah mkiêt mkriêm hŏng lu hdră msĕ si kah prăk mlan hruê mă bruă, rơ̆ng dŭm hdră, kdrêč bruă mjing ênoh bruă duh mkra mjing keh prăk. Hdră kñăm jing grăp thŭn grăp êpul bruă đảng mkiêt mkriêm sa truh kơ dua “Hră mkiêt mkriêm kmŭt ñĭ”, grăp êpul bruă đảng mkiêt mkriêm sa hră mkiêt mkriêm kmŭt kñĭ. Leh 6 mlan pŏk ngă, wăl krah iêô mkrum mâo giăm 400 êklăk prăk, mkŏ mjing 73 hră mkiêt mkriêm, ênoh grăp pŏk hră jing 5 êklăk prăk, mđup brei kơ phung đảng viên mâo klei hdĭp dleh dlan ti alŭ wăl.

Nguyễn Thị Thu Nguyệt,  Khua dlăng bruă Đảng wăl krah Ƀuôn Hồ brei thâo, hdră “Hră mkiêt mkriêm kmŭt kñĭ” jing boh phŭn amâo djŏ mrâo ôh ƀiădah hdră ngă dưi bi mlih ba klei tŭ dưn . Anei jing bruă ngă yuôm bhăn, bi êdah bruă klam klă klơ̆ng mơ̆ng grăp čô knuă druh đảng viên leh anăn grăp êpul bruă nah gŭ Đảng hlăm bruă hriăm leh anăn hlue ngă asăp Awa Hồ. Bruă mkŏ mjing, mđup brei “Hră mkiêt mkriêm kmŭt kñĭ” lŏ đru mkŏ mjing êpul knuă druh bi hmô kơ knhuih hdĭp, jĕ giăm hŏng êpul bruă đảng: “Dưi lač tal êlâo ênoh anei ka lu ôh ƀiădah ăt mjing klei lar bra hlăm bruă mkŏ  mjing Đảng hlăm kluôm wăl krah leh anăn mâo klei mđing dlăng lu snăk mơ̆ng phung đảng viên ti grăp alŭ wăl. Klei yuôm bhăn hĭn, sa klei mĭn kđi čar bi mklă bruă mđup brei hră mkiêt mkriêm kmŭt kñĭ anei jing bruă klam klei thâo săng phung đảng viên hlăm bruă hgŭm hlăm anôk bruă đảng ti alŭ wăl, boh nik êpul bruă đảng ti alŭ wăl čiăng mđĭ hnơ̆ng jăk êpul bruă đảng ară anei.”

Hdră “hră mkiêt mkriêm kmŭt kñĭ” dôk ba klei tŭ dưn klă sĭt, bi êdah klei jăk siam, mâo đảng viên leh anăn mnuih ƀuôn sang ti wăl krah Ƀuôn Hô, Dak Lak bi mni, mjing klei lar bra hlăm ala ƀuôn./.