Čar An Giang mâo êlan knông lăn dlông giăm 100 km, bi knông hŏng čar Takeo leh anăn Kandal, Cam Pu Chia. Lu thŭn êgao, klei mŭt kbiă soh hŏng hdră bhiăn khăng mâo ba lu klei dleh ktuê dlăng msĕ si čhĭ mnuih, bi mplư phung mă bruă ƀun nao ti nah dih knông lăn čhĭ kơ dŭm êpul bruă kñăm mplư ai mă bruă. Boh nik, dŭm klei mŭt kbiă soh hŏng hdră bhiăn kñăm čhĭ mnia dŭ mdiăng mnơ̆ng dhơ̆ng soh hŏng hdră bhiăn găn knông lăn.

Kñăm hmao thâo ƀuh, gang mkhư̆ dŭm phung mŭt kbiă soh hŏng hdră bhiăn găn knông lăn, boh nik hlăm gưl knhal jih thŭn anei. Dŭm êpul bruă dôk hruê mlam gĭr gang mkhư̆. Êngao kơ êpul răng mgang knông lăn lŏ mâo klei bi hgŭm tliêr kjăp mơ̆ng dŭm êpul msĕ si kahan ksiêm, kahan răng mgang mŭt kbiă ngă bruă klam. Ară anei, dŭm êpul čhĭ mnia mnơ̆ng soh hŏng hdră bhiăn mjhua hŏng yan êa đĭ, mmăt, krĭng mâo mnuih ƀuôn sang dua tĭng knông lăn hdĭp giăm mbĭt… čiăng kƀĭn mnơ̆ng dhơ̆ng soh hŏng hdră bhiăn, dŭ mdiăng hŏng ênoh lu. Mrâo anei, ti krĭng alŭ Vĩnh Xuyên, ƀuôn hgŭm Núi Sam, ƀuôn prŏng Châu Đốc, Êpul mă bruă hlăm êpul kahan ksiêm dlăng bruă duh mkra kahan ksiêm čar bi hgŭm hŏng kahan ksiêm ƀuôn prŏng Châu Đốc thâo ƀuh leh anăn êpul bruă hiu duah, mă 2 čô hŏng mnơ̆ng dhơ̆ng djŏ tuôm mâo: 400 đrông anŭng hruh hăt soh hŏng hdră bhiăn, 1 kanô leh anăn 4 boh êdeh p’phŭt. Thượng tá Nguyễn Đăng Khoa, K’iăng Khua kahan ksiêm bruă duh mkra kahan ksiêm čar An Giang brei thâo: “Êlan čhĭ mnia hăt hla mrâo dưi mă kơ̆ng, boh tŭ mă kơ̆ng knŏng mâo 400 đrông anŭng đuč, ƀiădah hlăm êlan anăn leh anăn hlăk dŭ mdiăng snăn mâo êbeh 1000 đrông anŭng hăt, mnơ̆ng dhơ̆ng snăn amâo ƀiă ôh, ƀiădah kyua alŭ wăl dleh ktuê dlăng, anăn knŏng mâo 4 êtuh đrông, adôk jing lŏ nao phă dih. Ară anei, mjhua hŏng yan êa đĭ, phung čhĭ mnia mnơ̆ng dhơ̆ng soh hŏng hdră bhiăn khăng bi mlih ktuê êlan, alŭ wăl, hdră, krĭng ngă bruă, anăn mnơ̆ng dhơ̆ng mâo hdră bi mlih lu leh anăn đĭ.

Đại tá Lý Kế Tùng, K’iăng Khua Anôk bruă lĭng kahan răng mgang knông lăn An Giang brei thâo, mơ̆ng akŏ thŭn 2022, bi hrŏ leh dŭm Anôk gak răng, răng mgang knông lăn leh anăn gang mkhư̆ klei ruă Covid-19. Ênoh anôk gak răng ƀiă, klei bi kbưoi mơ̆ng dŭm kđông gak kbưi hĭn, anăn phung hiu čhĭ mnơ̆ng sph hŏng hdră bhiăn ăt mjhua kơ klei anei. Phung čhĭ mnơ̆ng soh hŏng hdră bhiăn ƀrư̆ hruê ƀrư̆ mnêč hĭn, ngă djăp hdră čiăng ba čhĭ mnơ̆ng soh hŏng hdră bhiăn: Tơdah dŭ mdiăng  mâo êpul kahan thâo ƀuh, diñu lui mnơ̆ng dhơ̆ng čiăng tlaih asei pô, đa đa bi kngăm mran hlăm êa leh anăn êran đuĕ; čiăng ñĕ kơ klei kčŭt kđi, tơdah arăng mâo mă, diñu amâo klam êgao hnơ̆ng ênoh kčah ôh, boh nik, diñu lŏ mdăp mnơ̆ng dhơ̆ng yuôm msĕ si mah, mnơ̆ng bi msiam hlăm mnơ̆ng dhơ̆ng aguah tlam čiăng mdăp kơ êpul bruă djŏ tuôm hlăm êlan găn ƀăng jang knông lăn… Boh nik, giăm anei mâo leh đa đa klei dŭ mdiăng ma túi, phung anei ba wăt phao. Đại tá Lý Kế Tùng lŏ brei thâo: “Hlăm bruă bi kdơ̆ng hŏng phung ngă soh čhĭ mnơ̆ng soh hŏng hdră bhiăn mâo lu klei dleh dlan: ênoh mnuih mâo arăng mplư hiu čhĭ mnơ̆ng soh hŏng hdră bhiăn đĭ lu; tal dua jing kyua klei bi kpleh prăk mnga lu anăn arăng ăt gĭr hiu čhĭ nia leh anăn răng mgang mnơ̆ng dhơ̆ng pô, ñĕ kơ klei luič liê, arăng bi kmhal, anăn diñu pral snăk, mnêč, lŏ bi kdơ̆ng hŏng êpul kahan gak răng. Êngao anăn, diñu lŏ mjhua bruă ngă hră mơar, phung mdiăng mnơ̆ng đing soh hŏng hdră bhiăn, snăn lŏ mdiăng mnơ̆ng soh hŏng hdră bhiăn mơ̆ng čar mkăn wĭt ti An Giang amâodah mdiăng mnơ̆ng soh hŏng hdră bhiăn găn An Giang. Kahan ksiêm, kahan kriê dlăng mŭt kbiă… thâo ƀuh leh anăn mă leh lu klei mdiăng mnơ̆ng dhơ̆ng mơ̆ng ƀuôn prŏng Hồ Chí Minh leh anăn mơ̆ng Bình Dương hriê tinei”.

Mơ̆ng akŏ thŭn truh ară anei, dŭm êpul bruă djŏ tuôm hlăm čar An Giang ksiêm dlăng, thâo ƀuh mă kơ̆ng êbeh 140 klei, kơ bruă čhĭ mnia, dŭ mdiăntg mnơ̆ng kăm, mnơ̆ng soh hŏng hdră bhiăn, mplư hlăm klei mnia blei leh anăn mnơ̆ng mgưt. Ênoh mnơ̆ng dhơ̆ng giăm 120 êklai prăk.  Ênoh đŭ hŏng prăk leh anăn čhĭ mnơ̆ng dhơ̆ng hrui mă mâo êbeh 6 êklai prăk mkă hŏng thŭn 2021. Êpul bruă djŏ tuôm kčŭt hưn 29/40 klei mâo; kčŭt 31/69 čô; ênoh mnơ̆ng dhơ̆ng arăng kčŭt mâo êbeh 30 êklai prăk.

Čiăng dưi ngă jăk hdră gang mkhư̆ klei mŭt kbiă soh hŏng hdră bhiăn, bi kdơ̆ng mnia blei mnơ̆ng dhơ̆ng soh hŏng hdră bhiăn leh anăn mnơ̆ng mgưt hlăm wưng kơ anăp, An Giang srăng lŏ dơ̆ng mđĭ lar dŭm êpul bruă gang mkhư̆ klei čhĭ mnia soh hlăm knông lăn. Êpul kahan ksiêm, kahan kriê dlăng mŭt kbiă, răng mgang knông lăn, kriê dlăng anôk ba čhĭ…lŏ dơ̆ng mđĭ ktang bruă bi hgŭm hlăm hdră gang mkhư̆ klei čhĭ mnia soh hŏng hdră bhiăn găn knông lăn. Boh nik mđing mlih mrâo, mđĭ bruă hâo hưn mtô mblang, mtô bi hriăm, mtrŭt mjhar mnuih ƀuôn sang ala ƀuôn ti krĭng knông lăn amâo đru kơ phung čhĭ mnia soh hŏng hdră bhiăn, đru kčŭt hưn phung soh, hrăm mbĭt hŏng êpul bruă djŏ tuôm hlăm bruă gang mkhư̆ bi kdư̆ng hŏng klei čhĭ mnia soh hŏng hdră bhiăn leh anăn mnơ̆ng mgưt./.