Ktrâo kơ pruê̆ mnga ñu pla hlăk dôk čuh blang ti dua anah êlan ƀuôn Buôr, să Hòa Xuân, ƀuôn prŏng Ƀuôn Ama Thuôt, H’Lep Niê kreh iêo jing Amĭ Khiết brei thâo, mâo êlan mnga anei jing ai tiê prŏng prĭn k’iăng khua bruă Đảng, khua ƀuôn Ama Tháp:

“Ti buôn Buôr, să Hòa Xuân anei, hlăm grăp blư̆ bi kƀĭn ƀuôn, khua ƀuôn mâo nanao klei mtă mtăn kơ mnuih ƀuôn sang, jing jang mnuih, grăp boh sang thâo bi msiam êlan klông, pla mnga, pla rơ̆k, kyua anăn mnuih ƀuôn sang mơak snăk. Kâo jing sa čô mnuih ƀuôn sang mơh, hmư̆ klei khua ƀuôn mtô msĕ snăn kâo tui gưt, pla mnga čiăng bi msiam”.

 Amâo mâo djŏ knŏng mtrŭt mjhar mnuih ƀuôn sang bi pla mnga čiăng bi msiam ƀuôn sang, Khua ƀuôn Ama Tháp lŏ ba akŏ hlăm bruă bi mlih mnơ̆ng pla mjing, hŏng hdră pla tiu, boh durian hlăm war kphê. Leh jih jang bruă ngă mâo klei tŭ dưn, snăn khua ƀuôn Ama Tháp jih ai tiê mtrŭt mjar mnuih ƀuôn sang hriăm ba yua klei kreh knhâo hlăm bruă pla mjing lehanăn rông mnơ̆ng, lehanăn nao hlăm hdră êlan mđĭ kyar klei hdĭp mda, ñu mâo nanao klei thâo mđing uêñ, čuă êmuh mđĭ ai dŭm gŏ êsei ƀun, gŏ êsei knŭk kna dlăng ba, phung dôk hlăm klei amâo mâo anôk jưh knang hlăp hlăm klei dleh dlan... Mơ̆ng anăn dŭm hdră đru hŏng klei sĭt êmĭt.  Y Sol Ƀuôn Dap, ti buôn Buôr lač:

“Ti ƀuôn anei Ama Tháp jing khua ƀuôn ñu đru kơ mnuih ƀuôn sang ngă djăp mta hră mơar, ktrâo tăt mnuih ƀuôn sang duh mkra pla mjing, đru ngă hră mơar ti sang să, đru kơ mnuih ƀuôn sang hdră duh ƀơ̆ng, đru kơ mnuih ƀuôn sang mđĭ hĭn klei hdĭp”.

Lŏ bi hdơr hlăk wưng mâo bruă sang čư̆ êa alŭ wăl, lehanăn mnuih ƀuôn sang alŭ wăl đăo knang ruah mdưm ngă k’iăng khua ƀuôn, lehanăn hlŏng truh kơ jing khua ƀuôn    Ama Tháp mâo klei thâo bi đru lu snăk, thŭn 2011, hlăm ƀuôn tăm mâo hĕ phung ngă klei amâo mâo djŏ hriê ktŭk ba mčŭt mčhur, snăn asei Ama Tháp pô mơh tal êlâo ăt kdjăt mơh. Ƀiădah leh lŏ ksiêm hĕ bi nik ti jing klei soh lehanăn klei djŏ, snăn Ama Tháp mbĭt hŏng bruă sang čư̆ êa nao truh hŏng grăp boh sang hlăm ƀuôn mtă mtăn kơ jih jang mnuih brei thâo săng, lehanăn mnuih ƀuôn sang đăo knang kơ jih klei diñu mtă mtăn tui si klei jing mơ̆ng ñu tal êlâo k’iăng khua ƀuôn, lehanăn truh kơ ñu jing khua ƀuôn, snăn   Ama Tháp mâo klei gĭr hĭn, mâo klei bi hmô jăk čiăng bi năng hŏng klei mnuih ƀuôn sang đăo knang:

 “Kâo lač hŏng mnuih ƀuôn sang brei dlăng kơ klei kâo mă bruă, đăm duah hmư̆ klei arăng mčŭt mčhur ôh, bruă sang čư̆ êa amâo mâo klei bi kah ôh hŏng phung ƀuôn sang pô. Brei drei mĭn kơ klei hdĭp pô jing tal êlâo hĭn, bi mâo klei hdĭp jăk yâo, sang pưk jăk siam, duh ƀơ̆ng mđĭ kyar klei hdĭp mda, bi mâo djăp êsei huă djam ƀơ̆ng Ară anei mnuih ƀuôn sang ƀuh leh mơh knŭk kna duh bi liê mkra knơ̆ng kdơ̆ng êa mđoh ba kơ lŏ, krih mnơ̆ng pla mjing, mkra êlan klông jăk siam, knŭk kna amâo mâo lui mnuih ƀuôn sang drei ôh, snăn mnuih ƀuôn sang đăo knang kơ klei anăn”.

    Dlăng wĭt kơ bruă klam mơ̆ng k’iăng khua bruă Đảng, khua ƀuôn Buôr Ama Tháp, Nguyễn Đức Thuận, khua bruă Đảng să Hòa Xuân lač:

“Ama Tháp dôk mda asei, pral kdal lehanăn mbruă, ñu mâo ai tiê sĭt suôr hŏng mnuih ƀuôn sang, mơ̆ng ñu mâo klei bi mlih êdi hlăm bruă mkŏ mkra krĭng ƀuôn sang mrâo. Ƀuôn Buôr êlâo dih ăt jing sa boh ƀuôn ngă klei bi hmô mơh, ară anei phung êdam êra grăp thŭn bi nao ngă bruă čuăn hŏng lĭng kahan, mâo ênoh nao mŭt kahan kdlưn hĭn, lehanăn ngă leh lu bruă bi ktưn hlăm ƀuôn jăk snăk”.

Jih jang bruă mơ̆ng Ama Tháp, k’iăng khua bruă Đảng, khua ƀuôn Buôr wưng leh êgao amâo mâo djŏ knŏng đru leh hlăm bruă bi mlih klei hdĭp mnuih ƀuôn sang đuič ôh, ƀiădah ñu lŏ bi kjăp klei mnuih ƀuôn sang thâo jưh knang kơ Đảng, knŭk kna, jing leh anôk jưh knang sĭt, jing leh kdrông plah wah êpul bruă Đảng, bruă sang čư̆ êa, hŏng mnuih ƀuôn sang hlăm klei mkŏ mjing bruă kđi čar, mjing boh kdrŭt jăk kơ bruă mđĭ kyar klei hdĭp mda ti ƀuôn sang./.