Hruê mbruê 5/10, ti Hà Nội, mphŭn pŏk kdrưh kơăm Klei bi kƀĭn tal pă Anôk kriê dlăng bruă Đảng gưl dlông tal XIV. Blŭ mphŭn pŏk Klei bi kƀĭn, Khua gĭt gai Đảng, Khua lăn čar Tô Lâm mtă kơ Gưl dlông mđing bi trông, brei klei blŭ kơ dŭm bruă yuôm bhăn, mâo hnơ̆ng trah dlăng kơ klei đĭ kyar mơ̆ng lăn čar hlăm wưng mrâo. Klei bi kƀĭn mkŏ mjing hlăm wưng boh klei dlông rŏng lăn lŏ dơ̆ng mâo lu klei bi mlih, klei bi ktưn hdră êlan, klei bi blah, klei bi mnia mblei leh anăn dŭm klei bi mlih pral kơ klei kreh knhâo, kdrăp mrâo ba dŭm klei čiăng mrâo hŏng Việt Nam.

Khua gĭt gai Đảng, Khua lăn čar Tô Lâm mtă kơ gưl dlông mđing kơ 4 êpul bruă prŏng, mâo lŏ dơ̆ng mđĭ klei dưi kiă kriê, gĭt gai leh anăn ai ktang mơ̆ng Đảng; mlih mrâo hdră kiă kriê, mđĭ klei tŭ dưn bruă ngă mơ̆ng bruă kđi čar; mkŏ mjing êpul knuă druh, mđĭ kyar leh anăn yua mnuih thâo; mbĭt anăn bi mklă djŏ dŭm klei mđing, iêo mkrum leh anăn yua tŭ dưn dŭm ai dưi kơ klei đĭ kyar pral, hơĭt kjăp. Khua gĭt gai Đảng, Khua lăn čar mtă kơ dŭm hdră mtrŭn brei djŏ hŏng boh sĭt, ruh mgaih dŭm klei kpăk, bi klă bruă klam leh anăn mkŏ mjing hluê ngă ktang phĭt, tŭ dưn, mkăp djŏ hŏng klei čiăng mđĭ kyar lăn čar hlăm ênuk mrâo.