Hlwm bruă mkŏ mkra krĭng ƀuôn sang mrâo, khua mduôn Pui Duch (să Ia Der, kdriêk Ia Grai, čar Gia Lai) mbĭt hŏng phung knuă druh să ƀuôn ngă jăk bruă hâo hưn, mtrŭt mjhar mnuih ƀuôn sang mkra êlan klông, pla mnơ̆ng ngă mnư̆ mnang, bi ktưn duh ƀơ̆ng  hŏng klei mbruă, mđĭ ai tui duah klei sah mdrŏng hŏng klei ênuah. Hŏng jih jang bruă ngă anăn, ti ƀuôn Jut 2 ñu mâo leh mnuih ƀuôn sang mpŭ lehananăn tui hlue. Ksor Du, mnuih ƀuôn sang ti ƀuôn Jut 2 lač: Thŭn 2017, khua mduôn Pui Duch mâo klei hưn hŏng mnuih ƀuôn sang ƀuôn pô mâo knŭk kna đru truh 1,3 êklai prăk pioh mkra êbeh êbeh 1,3 km êlan. Khua mduôn mtrŭt mjhar leh lu gŏ sang mnuih ƀuôn sang bi myơr lăn, mđrăm mbĭt mkŏ mkra krĭng ƀuôn sang mrâo, asei ñu pô mtam yơh myơr lăn tal êlâo  čiăng mâo mkra hĕ êlan klông bi jăk. Kyua mâo klei sa ai, lehanăn klei gĭr mơ̆ng knuă druh, lehanăn mnuih ƀuôn sang, truh kơ ară anei hlăm ƀuôn maoa leh êlan klông jăk mrâo. Êlan betong kjăp đru leh kơ mnuih ƀuôn sang êrô hiu găl ênưih, boh nik hlăm klei dŭ mdiăng boh mnga mnơ̆ng pla mjing. Ƀuôn Jút 2 amâo mâo djŏ knŏng bi leh dŭm ênoh čuăn mkŏ mkra krĭng ƀuôn sang mrâo , ƀiaư̆dah lŏ mâo ruah jing anôk bi hmô kơ lu ƀuôn mkăn tui hriăm. Ksor Du, lač:

“Lač kơ klei bi hmô ba akŏ mơ̆ng khua mduôn Puih Duch, mnuih ƀuôn sang jih jang mpŭ snăk, Khua mduôn ngă klei bi hmô, mđĭ ai diñu gĭr ktĭr duh ƀơ̆ng mă bruă knuă čiăng kơ klei hdĭp đĭ kyar, kñăm mđĭ kyar klei hdĭp mda knư̆ hrue jăk siam hĭn, mnuih ƀuôn sanh kơ anei jih jang tui gưt klei ñu sơăi, lehanăn djŏ hŏng klei khua mduôn bi hmô leh”.

 Khua mduôn Puih Duch tuôm ngă leh lu bruă hlăm alŭ wăl msĕ si: Khua să Ia Dêr; Khua kahan ksiêm să, khua bruă Đảng lehanăn păn ngă khua bruă mặt trận să, lŏ jing mnuih mâo k’hưm êdi ti ƀuôn Jut 2. Jing sa čô Đảng viên, mduôn Puih Duch mjing nanao kdrông atăt ba hdră êlan mơ̆ng Đảng lehanăn knŭk kna truh hŏng mnuih ƀuôn sang.  Puih Duch yăl dliê:

“Kâo jing msĕ si kdrông kăp mkŏ hŏng mnuih ƀuôn sang mnuih ƀuôn sang jưh knang kơ kâo. Jih jang dŭm hdră êlan, mơ̆ng Đảng lehanăn knŭk kna snăn kâo pral ba mtruh hŏng mnuih ƀuôn sang , čiăng kơ mnuih ƀuôn sang mâo klei hdĭp đĭ kyar hĭn, h’uh mđao hĭn, ƀuôn sang ƀrư̆ brư̆ hrue mâo klei bi mlih. Kdlưn hĭn kơ anăn, mnuih ƀuôn sang amâo mâo duah hmư̆ ôh klei phung ngă soh mplư, ngă luič klei thâo bi mguôp, mbĭt hŏng anăn, mtrŭt mjhar anak aneh nao sang hră mơar djăp ênŭm kñăm bi mâo djăp klei thâo săng, čiăng mơ̆ng anăn ƀuôn sang pô đĭ kyar hĭn”.

 Siu Hnit, K’iăng khua să Ia Der, brei thâo: Hŏng jih ai tiê, lehanăn klei thâo khăp khua mduôn Puih Duch ba êlan êlâo nanao hlăm djăp mta bruă ti ƀuôn, bi hgŭm hŏng jih jang bruă hlăm kđi čar, mđĭ ai mnuih ƀuôn sang ngă jăk jih jang hdră êlan mơ̆ng Đảng, knŭk kna. Hlăm anăn mâo klei tŭ dưn hĭn êdi, jing bruă đru mtrŭt mjhar mnuih ƀuôn sang: “Hdĭp jăk đăo djŏ”, mkŏ mkra krĭng ƀuôn sang mrâo, lăm lui jih klei bi dôk ung mơ̆ng mda, klei bi dôk anak amỉêt awa sa êrah, mđĭ kyar klei hdĭp gŏ sang pô.

“Đảng viên Puih Duch ƀuôn Jut 2 ljing sa čô mnuih mâo k’hưm, mâo nana klei mtă mtăn mtô mblang kơ mnuih ƀuôn sang  dŭm hdră êlan mơ̆ng Đảng knŭk kna. Hlăm dŭm klei bi kƀĭn ñu gĭr čih pioh lehanăn lŏ wĭt hâo hưn mtô mblang mtă mtăn kơ mnuih ƀuôn sang  kơ jih jang bruă duh mkra, bruă mjuăt bi hriăm, bruă răng mgang klei êđăp ênang, jing leh kmeh gơ̆ng kơ să bi leh ênoh čuăn kơ bruă mkŏ mkra krĭng ƀuôn sang mrâo. Ñu jin gleh mnuih jăk, ngă bruă jăk mâo mnuih ƀuôn sang mpŭ snăk”.

Ia Grai jing kdriêk knông lăn, mâo 13 boh să, wă krah hŏng 150 boh ƀuôn, anôk mnuih ƀuôn sang dôk, hlăm anăn mâo 92 boh ƀuôn jing mnuih djuê ƀiă. Hlăm dŭm thŭn leh êgao, phung khua mduôn, khua ƀuôn, lehanăn mnuih mâo k’hưm mâo leh dŭm klei đru mguôp jăk hlăm jih jang bruă duh mkra ala ƀuôn, mkŏ mkra klei hdĭp dhar kreh, răng mgang kjăp klei êđăp ênang yang ƀuôn, kriê kjăp knhuah gru dhar kreh djuê ana, ngă nanao klei thâo bi mguôp jih jang djuê ana, ngă jăk klei kriê pioh knhuah gru dhar kreh djuê ana pô. Trương Thế Vinh, Khua adŭ bruă djuê ana kdriêk Ia Grai, lač:

“Pui Duch jing mnuih thâo bi hmô êdi hlăm jih bruă mặt trận, ñu bi leh jăk nanao bruă mâo kčah jao, boh nik ñu thâo bi hmô jăk snăk, lehanăn mjing kdrông mkŏ pioh kơ bruă hâo hưn mnuih ƀuôn sang hlăm klei mkŏ mkra ala ƀuôn krĭng ƀuôn sang mrâo hlăm mnuih djuê ƀiă, kñăm bi leh bruă lăn čar kñăm mđĭ kyar klei hdĭp mda krĭng mnuih djuê ƀiă, hlăm anăn ăt mđin uên kơ bruă mtô mtă, lehanăn amâo mâo brei ôh klei bi dôk ung mô̆ mơ̆ng mda, kăn brei trei bi anôk anak amiêt awa sa êrah hlăm krĭng mnuih djuê ƀiă, lehanăn nga nanao bruă djuê ana. Hlăm jih jang bruă ngă snăn hmei păn kjăp jih jang bruă klam mơ̆ng ñu hŏng mnuih ƀuôn sang ti alŭ wăl”.

Hŏng klei pô mâo đru mguôp, khua mduôn Puih Duch mâo klei myun tŭ mă leh lu hră bi hmi, klei bi mni mơ̆ng Gưl dlông hlŏng kơ alŭ wăl. Mrâo anei, ti mlan 9/2022, ñu myun dưi mâo khua knơ̆ng bruă sang čư̆ êa čar Gia Lai mđup brei hră mpŭ mni kyua mâo leh bruă tŭ dưn hlăm kleoi bi klin, mkŏ mjing klei bi mguôp jih jang djuê ana ti alŭ wăl anôk dôk./.