Y-Sim Kƀuôr ti să Hòa Xuân, ƀuôn prŏng Ƀuôn Ama Thuôt, jing mnuih mă bruă hlăm knơ̆ng bruă Msei ASEAN hlăm alŭ wăl duh mkra Hòa Phú mơ̆ng thŭn 2020. Ti anôk mă bruă mâo êpul bruă đảng, ñu jih ai tiê gĭr ktĭr čiăng mâo mŭt hlăm Đảng lehanăn kla klơ̆ng dưi jing đảng viên hlăm mlan 9/2024. Y-Sim Kƀuôr lač, anei jing klei mơak amâo mâo djŏ knŏng kơ asei mlei ñu pô ôh, ƀiă hŏng jih găp djuê:

 “Kâo mŭt mă bruă hlăm knơ̆ng bruă êngao knŭk kna, ƀiădah dưi bi mŭt hlăm Đảng mơh, snăn jih jang mnuih bi kngăr sơăi, lehanăn bŏ hŏng klei mơak. Jing đảng viên snăn pô gĭr yơh bi leh jăk bruă knuă, ngă klei thâo bi hmô”.

Jing mnuih mă bruă hlăm knơ̆ng bruă Msei ASEAN, đảng viên Y-Hoan Ktul mâo klei đăo knang jing khua hlăm êpul kiă kriê bruă Đảng hlăm knơ̆ng bruă mơ̆ng wưng thŭn 2020–2025. Thâo bi hmô hlăm djăp mta bruă, Y-Hoan mâo leh êpul bruă Đảng jao đru dlăng kriê čung ba ayŏng adei mă bruă jăk pioh lŏ bi mŭt hlăm Đảng wưng anăn anei.

 “Kâo mâo nanao klei kăp đru kčĕ kơ ayŏng amai adei hlăm êpul, boh nik jing ayŏng adei hdơ̆ng Ê Đê pô, brei mâo klei thâo gĭr hĭn, hur har hlăm jih bruă knuă mơ̆ng knơ̆ng bruă, ngă bi leh jih bruă jao, mkra mjing bi djăp ênoh msei tui si ênoh kčah. Tơdah gĭr jih ai tiê mâo keli tŭ jing, mâo klei hmăng hmưi, ayŏng adei srăng dưi mŭt Đảng.”

Êpul bruă đảng hlăm knơ̆ng bruă Msei ASEAN mâo mkŏ mjing mơ̆ng thŭn 2017, phŭn tal êlâo knŏng 5 čô đảng viên, truh ară anei đĭ leh truh 25 čô. Trần Trung Tiến – Khua bruă Đảng hlăm knơ̆ng bruă brei thâo, kyua mâo klei khua kiă kriê knơ̆ng bruă mâo klei mđing, snăn bruă kơ Đảng mâo lu klei jăk găl. Dŭm thŭn giăm anei, grăp thŭn êpul bruă Đảng mâo bi mŭt mơ̆ng 3–4 čô đảng viên mrâo, jing kdlưn hŏng ênoh kčah leh. Trần Trung Tiến hưn, êpul bruă Đảng hlăk dôk  gĭr čiăng dưi jing sa êpul bruă Đảng đĭ kyar hlăm thŭn 2026:

 “Hlăm thŭn 2025, êpul bruă Đảng ktưn mâo bi mŭt mơ̆ng 3 - 5 čô đảng viên, tui si ênoh čuăn mơ̆ng êpul bruă Đảng dŭm anôk bruă lehanăn phung duh mkra čar Daklak kčah jao. Hmei mâo mkŏ mjing sa êpul mnuih mă bruă kjăp jăk, ktrâo atăt klei čih hră mơar čih kơ kle ihdĭp, bi mklă hră mơar, lehanăn hlăk dôk guôn bi mklă, lehanăn dôk guôn hrue bi mŭt hlăm 3 mlan akŏ thŭn 2025 dua čô.”

Trần Quang Tân, K’iăng khua bruă Đảng dŭm anôk bruă, lehanăưn phung duh mkra čar Daklak brei thâo, kluôm čar ară anei mâo truh 11 êpul bruă Đảng hlăm dŭm anôk bruă duh mkra êngao knŭk kna, hŏng 537 čô đảng viên. Wưng leh êgao, bruă bi mŭt Đảng hlăm dŭm anôk bruă duh mkra êngao knŭk kna mâo leh dŭm boh tŭ dưn jăk, đru kơ anôk duh mkra mă bruă hơĭt, đru kơ êpul bruă Đảng jĕ giăm hĭn hŏng phung duh mkra. Trần Quang Tân lač:

 “Grăp thŭn, hmei ktưn bi mŭt mâo mơ̆ng 16 čô đảng viên kơ dlông hlăm dŭm anôk duh mkra êngao knŭk kna, hlăm anăn mâo mơ̆ng 1–2 čô đảng viên jing mnuih hlăm êpul khua kiă kriê anôk duh mkra. Truh thŭn 2030, hmei srăng lŏ mkŏ mjing mơ̆ng 2–3 êpul bruă Đảng nah gŭ, lehanăn mơ̆ng 1–2 êpul bruă êdam êra, êpul hgŭm kahan hđăp. Ƀiă êdi 8% anôk bruă duh mkra êngao knŭk kna hlăm čar srăng mâo êpul bruă Đảng, mâo đảng viên jing phung khua kiă kriê, mŭt hlăm êpul khua kiă kriê bruă Đảng.”

Bruă bi mŭt Đảng hlăm anôk bruă duh mkra êngao knŭk kna ti čar Daklak mâo leh dŭm boh tŭ dưn jăk, đru mjing leh anôk bruă hơĭt kjăp, mă bruă hŏng klei tŭ dưn, đru mguôp yuôm bhăn kơ bruă mđĭ kyar kđi čar, klei duh mkra ala ƀuôn hlăm čar Daklak ƀrư̆ hrue ƀrư̆ đĭ kyar./.