Đặng Gia Duẩn, Khua bruă Đảng ƀuôn hgŭm Êa Kao, lač mbĭt hŏng bruă bi mklă dŭm wăl hiu čhưn ênguê phŭn, Hdră mtrŭn brei bi mklă thiăm dŭm alŭ wăl jing anôk hiu čhưn ênguê phŭn mơ̆ng čar. Mbĭt anăn, phung bi ala mtă brei čuăl mkă dŭm hdră phŭn, siă suôr hŏng anak mnuih lehanăn krĭng ƀuôn prŏng, hlăm anăn mâo bruă bi mklă hdră pui kmlă ti 14 ƀuôn prŏng, ăt msĕ mơh bruă mtrŭt mđĭ hdră čuăl mkă ba Tač êdeh phiơr Ƀuôn Ama Thuôt jing tač êdah phiơr prŏng. “Kơ anôk bruă nah gŭ snăn hmei mâo 2 klei bi mĭn, tal sa jing kơ krĭng ƀuôn prŏng kyua anăn brei mâo dŭm hdră duh kơ bruă pui kmlă ti dŭm krĭng ƀuôn prŏng mơ̆ng čar. Tal 2 jing tač êdeh phiơr, hŏng kơhưm mơ̆ng čar msĕ ară anei lehanăn drei mâo 2 tač êdeh phiơr, kâo mĭn brei mâo hdră čuăl mkă čiăng ba tač êdeh phiơr Ƀuôn Ama Thuôt jing tač êdeh phiơr prŏng snăn kơh drei srăng dưi đĭ kyar hĭn.

Mơ̆ng kiêng dlăng kơ hdră bi hgŭm krĭng, Lữ Ngọc Tân, Khua dhar bruă kriê dlăng hdră duh mkra Phú Yên, mñă klă kơ klei čiăng duh kơ anôk bruă nah gŭ hlăm hdră pui kmlă čiăng ba yua tŭ dưn hdră mkra pui kmlă doh ti krĭng nah Yŭ, mkăp kơ hdră mđĭ kyar bruă tuh tia mkra mjing krĭng ktuê hang ksĭ. Tân ăt ba mdah hdră ksiêm mđing kơ bruă đoh nhiên liệu mơ̆ng kdrŭn Bãi Gốc nao truh ti Lăn dap kngư ktuê êlan êran pral Ngŏ – Yŭ, kñăm bi hrŏ klei bi liê logistics bruă pui kmlă lehanăn mjing boh kdrŭt bi hgŭm krĭng.

“Phŭn mkăp hdră mkra pui kmlă doh ti nah Yŭ lu êdi, nah Ngŏ lehanăn dŭm krĭng ktuê hang ksĭ čiăng êdi kơ pui kyua anăn anôk bruă nah gŭ hlăm hdră pui kmkă brei mđing duh bi liê kñăm mkăp kơ hdră mđĭ kyar bruă tuh tia mkra mjing yuôm bhăn anei. Êngao kơ nôk bruă nah gŭ snăn brei mđing kơ anôk bruă mkăp kơ hdră nhiên liệu. Tơdah drei bi mguôp čiăng duh kơ êlan anei mơ̆ng nah Ngŏ truh kơ nah Yŭ ktuê êlan êran pral anei snăn ênoh duh bi liê srăng ƀiă. Drei mkŏ sa êlan hŏng boh taih dlông ka truh 150 km. Ênoh bi liê amâo lu ƀiădah boh tŭ dưn jing prŏng snăk.

Ti kiêng mkăn, Huỳnh Ngọc Oánh, Kơiăng khua bruă Đảng ƀuôn hgŭm Tuy Hòa mñă leh mta kñăm đĭ kyar dua blư̆ hnư hrui wĭt kah knar grăp čô mnuih mơ̆ng čar hlăm wưng păn bruă mrâo. Čiăng dưi mâo, hlue si ñu brei duh lu hĭn kơ anôk bruă nah gŭ, boh nik hdră êlan klông, mbĭt anăn mđĭ lar klei găl hlăm bruă dhar kreh – hiu čhưn ênguê: Êa ksĭ nah Ngŏ mguôp hŏng čư̆ dliê nah Yŭ, mjing boh kdrŭt mđĭ kyar bruă duh mkra – ala ƀuôn. Čiăng mđĭ lar klei găl mâo mơ̆ng čar dôk čiăng klei duh kơ anôk bruă nah gŭ plah wah krĭng ksĭ lehanăn dliê. Amâo djŏ knŏng mđĭ kyar kdrăp tuh tia mkra mjing ƀiădah hdră dhar kreh hluê si Hdră mtrŭn kâo mĭn anei jing klei găl mơ̆ng nah Ngŏ, mâo êa ksĭ mguôp hŏng dhar kreh kriê pioh lehanăn bi mguôp hŏng nah Yŭ jing čư̆ dliê prŏng kdrưh, ƀiădah mâo klei gun kpăk ară anei jing anôk bruă nah gŭ, boh nik êlan klông”.

Dŭm klei blŭ anei brei ƀuh ai tiê đua klam, klei čang hmăng lehanăn gĭr mlih mrâo, mđing truh kơ hdră đĭ kyar Dak Lak jing sa krĭng wăl đĭ kyar pral mơ̆ng krĭng Lăn dap kngư lehanăn Ktuê hang ksĭ Dhŭng kwar Krah hlăm wưng mrâo./.