Sa hlăm dŭm klei êdah êdi mơ̆ng bruă hlue ngă hdră mtrŭn mrô 18 ti Daklak jing dŭm klei bi mŭt dŭm anôk bruă, kñăm mkŏ mjing bi khuăt êpul mnuih mă bruă, ƀiădah bruă knuă mă ăt ba wĭt klei tŭ dưn. Trương Hoài Anh, Khua knơ̆ng bruă hâo hưn čar Daklak brei thâo, kơ bruă bi mŭt Knơ̆ng bruă hâo hưn, mtô mblang hŏng knơ̆ng bruă kreh knhâo mâo ngă leh hŏng klei kluôm ênŭm lehanăn tŭ dưn. Jih dua knơ̆ng bruă mâo mkŏ mjing leh lu klei bi kƀĭn čiăng bi sa hnơ̆ng hdră êlan mă bruă, mkŏ mjing klei mă bruă êlâo kơ hruê 10/1/2025.

 “Knơ̆ng bruă mâo ngă leh kluôm hlăm jih jang mnuih mă bruă hlăm anôk bruă. Hŏng klei bi mŭt dua knơ̆ng bruă hâo hưn, mtô mblang hŏng knơ̆ng bruă kreh knhâo, snăn knơ̆ng bruă sang čư̆ êa čar mâo mkŏ mjing leh sa êpul mă bruă, lehanăn truh ară anei êpul mâo leh klei bi kƀĭn lehanăn dua nah mâo mkŏ mjing leh hdră êlan mă bruă, lehanăn hưn mdah hŏng êpul êlâo kơ hrue 10/1/2025 lehanăn srăng bi kƀĭn pioh bi mklă hdră êlan mă bruă êlâo kơ hrue 15/1 čiăng hâo hưn hŏng knơ̆ng bruă sang čư̆ êa čar, lehanăn bruă Đảng čar tui si mta mtrŭn.”

Ti kdriêk Čư̆ Mgar, Trần Đình Nhuận, Khua bruă Đảng kdriêk, ăt brei thâo klei hlue ngă hdră mtrŭn mrô 18, Čư̆ Mgar ngă leh klei bi mŭt anôk bruă dhar kreh mjuăt asei mlei, hŏng sang mđung asăp, bi mŭt 8 êpul bruă sang hră, bi hrŏ 8 alŭ ƀuôn, lehanăn bi hrŏ truh 10% knuă druh mnuih mă bruă hlăm kluôm kdriêk. Hlăm wưng ti anăp, kdriêk Čư̆ Mgar mâo leh lu hdră êlan bi mŭt mkăn, msĕ si bi mŭt anôk bruă rông mnơ̆ng, pla mjing, bruă răng mgang mnơ̆ng pla mjing, jing sa anôk bruă kơ lŏ hma kdriêk... Jih jang klei bi mlih anei amâo mâo djŏ knŏng bi hrŏ ti knơ̆ng, ƀiădah lŏ đru kơ dŭm anôk bruă êpul êya mă bruă mâo klei tŭ dưn hĭn.

 “Êpul khua kiă kriê bruă Đảng kdriêk mâo bi tuôm leh hŏng phung mâo thŭn mă bruă adôk 5 thŭn srăng wĭt mdei, čiăng hmư̆ si ai tiê klei mĭn, lehanăn mâo klei mđĭ ai, brei digơ̆ wĭt mdei êlâo kơ jih thŭn, dưi mâo klei đru djŏ si mta mtrŭn, truh ară anei sa čô Khua adŭ bruă, lehanăn 5 čô k’iăng anôk bruă, k’iăng adŭ bruă mâo leh hră akâo mdei bruă êlao kơ jih thŭn.”

  Bạch Văn Mạnh, Khua knơ̆ng bruă kiă kriê bruă knuă čar, săt lač, leh 7 thŭn hlue ngă hdră mtrŭn mrô 18, čar Daklak mâo bi hrŏ leh truh 10% ênoh mnuih mă bruă mkă hŏng thŭn  2015, hrŏ 30 adŭ bruă, anôk bruă mơ̆ng dŭm knơ̆ng bruă, lehanăn bi hrŏ truh 40 adŭ bruă, lehanăn êpul êya bruă jing knar mbĭt. Anei jing sa boh tŭ dưn năng čih pioh, amâo mâo knŏng bi êdah klei kut kat bi hrŏ ênoh mnuih mă bruă, ƀiădah lŏ rơ̆ng kơ bruă kiă kriê hŏng klei kjăp, êjai bruă anei nao hlăm klei kiă kriê kjăp mơ̆ng knŭk kna. Hlăm wưng tinăp, Daklak lŏ dơ̆ng ngă dŭm hdră bi mŭt mbĭt dŭm knơ̆ng dhar bruă, kñăm bi hrŏ mơ̆ng anôk knơ̆ng, lehanăn mđĭ hnơ̆ng kjăp bruă kiă kriê.     Bạch Văn Mạnh lač:

 “Hmei dưi bi leh tui si klei bhiăn jih jang klei mkŏ mjing jar mă bruă tal êlâo. Knơ̆ng bruă sang čư̆ êa gĭt gai leh Knơ̆ng bruă kiă kriê bruă knuă, bi mguôp hŏng dŭm knơ̆ng dhar bruă djŏ tuôm mkŏ mjing mâo 8 êpul bi kjăp bruă bi mŭt mbĭt, lehanăn iêo khua knơ̆ng bruă sang čư̆ êa, nao bi mguôp čiăng kơ dŭm êpul bruă bi sa hnơ̆ng hlăm klei mă bruă. Lu êpul mâo leh klei bi kƀĭn čiăng bi tŭ ư hdră êlan mă bruă. Klei mă bruă hŏng klei pral lehanăn khuăt”.

 Knơ̆ng bruă sang čư̆ êa čar Daklak mâo bi mklă leh bruă hlue ngă hdră mtrŭn mrô  18 jing bruă čuăn yuôm bhăn, amâo dôk lŏ bi krư̆i ôh. Nguyễn Đình Trung, Khua bruă Đảng čar, mñă: “Anei jing bruă ngă hŏng klei săn asei mlei kơ bruă bi khuăt êpul mă bruă, knư̆ ngă pral hĭn jing jăk hĭn, mñăm ba wĭt klei tŭ dưn kơ bruă mđĭ kyar lăn čar." Čar Daklak ba yua hdră êlan “Êran êjai, dăp êjai” mđing kơ klei hlue ngă bruă čuăn hŏng klei kut kat prŏng, lehanăn ngă hŏng klei kuôm ênŭm, bi sa hnơ̆ng plah wah dŭm gưl bruă sang čư̆ êa, mơ̆ng gưl dlông hlŏng kơ nah gŭ:

Mlih mrâo, dăp wĭt êpul mă bruă hlăm jih êpul bruă kđi čar hŏng klei khuăt, mă bruă tŭ jing, anăn yơh jing bruă yuôm bhăn, jing klei mă bruă hŏng klei săn asei mlei, kơ klei dăp bi khuăt êpul mă bruă hlăm kđi čar, mbĭt hŏng lu klei dleh dlan,  klei rŭng ênguôt mơh djŏ tuôm kơ klei tŭ dưn mnuih mă bruă hlăm jih bruă kđi čar. Brei mâo klei thâo bi mguôp, bi sa ai, gĭr ba wĭt klei tŭ dưn mbĭt kơ kluôm čar.

Hŏng klei kut kat mơ̆ng jih bruă kđi čar, mơ̆ng čar hlŏng kơ kdriêk lehanăn mâo klei gĭt gai siă suôr mơ̆ng dŭm gưl phung khua kiă kriê, Daklak dôk jih ai tiê hluê ngă hdră mtrŭn mrô 18 hŏng ai tiê “Mlih mrâo, dăp wĭt êpul mă bruă hlăm kđi čar hlăm klei khuăt, mă bruă hŏng klei tŭ jing”. Dŭm boh tŭ dưn leh mâo brei ƀuh hŏng klei jih ai tiê, kut kat bi mă bruă čiăng mâo klei tŭ dưn, amâo mâo uêñ kơ klei dleh dlan, čar Daklak srăng lŏ nao djŏ hdră, lehanăn mjing atur kjăp kơ klei mđĭ kyar mgi dih./.