Êpul bruă Đảng alŭ mrô 10A mâo êpul bruă Đảng să Ea Kly, kdriêk Krông Pač, čar Daklak ruah jing anôk ngă klei bi hmô “Anôk bruă Đảng 4 klei jăk”. Mơ̆ng anăn êpul bruă Đảng mâo dŭm ênoh čuăn: Bi leh jăk bruă čuăn kđi čar, ngă bruă hŏng klei jăk, thâo bi mguôp, mâo klei bhiăn kjăp, knuă druh jăk, đảng viên jăk. Čiăng dưi bi sĭt klei anei, Trần Ngọc Quang, khua bruă Đăng alŭ mrô 10A brei thâo: Êpul bruă Đảng mkă hŏng klei găl ti alŭ wăl, lehanăn klei dưi mơ̆ng grăp čô đảng viên bi trông, bi tŭ ư jao bruă klam truh kơ grăp čô mnuih mă bruă. Knŏng êdei kơ 3 mlan leh ngă, snăn bruă mơ̆ng êpul nao hlăm klei bhiăn leh, klei thâo săng mơ̆ng phung đảng viên dưi lŏ mđĭ, ƀuh klă klei kiă kriê mâo boh tŭ dưn hlăm klei duh mkra ala ƀuôn ti alŭ wăl.

 “Êpul bruă Đảng ngă bruă mâo dŭm mta bruă ngă msĕ si pla mjing mnga ti dua nah êlan, mjing klei doh siam kơ ƀuôn sang, mtrŭt mkŏ camera pioh răng kriê klei êđăp ênang hlăm alŭ wăl. Mjing kơ mnuih ƀuôn sang mâo klei đăo knang, lehanăn hơĭt ai tiê hlăm klei ngă bruă knuă čiăn mđĭ kyar klei hdĭp mda kơ mnuih ƀuôn sang hlăm alŭ wăl”.

Bruă Đảng să Ea Sin, kdriêk Krông Ƀŭk, čar Daklak mâo 13 êpul bruă Đảng nah gŭ hŏng 150 čô đảng viên. Leh mâo bruă Đảng kdriêk ruah jing anôk mkŏ mjing “Anôk bruă Đảng 4 klei jăk” bruă Đảng să hlŏng ngă mtam hdră êlan mă bruă, mtrŭn klei mtrŭt mjhar mkŏ mjing bruă tui ngă anôk bruă Đảng 4 klei jăk hlăm 4 êpul bruă Đảng mâo:  Êpul bruă Đảng kahan să; êpul bruă Đảng ƀuôn Ea Kăp, Êpul bruă Đảng buôn Ea Kring lehanăn êpul bruă Đảng buôn Ea Sin. Kñăm đru kơ dŭm êpul ngă bi leh jăk bruă čuăn jao, Vũ Văn Tuấn, Khua bruă Đảng să Ea Sin, kdriêk Krông Ƀŭk, čar Daklak brei thâo: Mbĭt hŏng klei jao bruă kơ êpul khua kiă kriê hlăm Đảng đru kăp ksiêm, ktrâo atăt dŭm hdră êlan ngă klei bi hmô, snăn bruă Đảng să ba yua leh computer kăp čih pioh kiă kriê bruă truh hŏng grăp êpul mâo ngă bruă hŏng klei jăk.

 “Bruă Đảng să Ea Sin ba yua leh kdrăp masin mă bruă jăk hlăm klei bi mlih mrô kơ bruă mkŏ mjing êpul bruă đảng. Mơ̆ng klei mă bruă anăn ƀuh mtam klei tŭ dưn pral êdi. Boh nik msĕ si klei hưn mthâo, klei hâo mdah truh kơ gưl bruă Đảng nah dlông, lehanăn jih jang klei kăp kčĕ mơ̆ng nah dlông pral mơh truh hŏng grăp êpul bruă Đảng nah gŭ. Mơ̆ng anăn grăp êpul bruă Đảng mâo ngă bruă jăk truh hŏng grăp čô đảng viên kñăm mđĭ klei tŭ hlăm jih jang dŭm êpul bruă Đảng nah gŭ hlăm klei hlue ngă 4 klei jăk”.

Mơ̆ng klei hluê ngă hdră bihmô “Anôk bruă Đảng 4 klei jăk”, 5/5 êpul bruă Đảng mâo ruah jing anôk ngă klei bi hmô anăn mâo leh êpul bruă Đảng kdriêk Krông Pač, čar Daklak mdưm leh hlăm klei bi ktưn djŏ hŏng bruă hlăm alŭ wăl pô. Trần Quốc Vĩnh, K’iăng khua brŭ Đảng kdriêk Krông Pač, čar Daklak lač, mơ̆ng bruă ngă anei, mjing leh ai êwa bi ktưn hlăm kluôm bruă Đảng kdriêk, lŏ mđĭ hĭn klei thâo kiă kriê, ai ktang klei tăng mblah mơ̆ng êpul bruă đảng lehanăn klei kjăp hlăm êpul knuă druh đảng viên.

 “Lu êpul bruă Đảng mâo ksiêm wĭt leh klei mkŏ mjing hdră êlan jing djŏ hŏng boh sĭt klei dôk găn ti êpul bruă Đảng pô. Tal dua jing mâo bruă klam mơ̆ng grăp čô đảng viên, boh nik phung djă akŏ. Kyuanăn, bi jao bruă klam kơ dŭm čô knuă druh đảng viên klă mngač hĭn hŏng bruă knuă. Mơ̆ng anăn lŏ bi kjăp bruă knuă hŏng klei klă hlăm 4 mta kñăm nao hlăm klei bhiăn, kjăp hĭn”.

Čiăng kơ klei bi ktưn mkŏ mjing “Anôk bruă Đảng 4 klei jăk” mâo ngă nanao hŏng klei klă, hlŏng mjing ai êwa klei bi ktưn hlăm êpul khua kiă kriê bruă Đảng čar Daklak. Mâo 20 êpul kiă kriê bruă đảng ti čar Daklak mâo leh klei kuôl kă ngă klei bi ktưn mkŏ mjing êpul thâo bi hmô kơ êpul bruă Đảng 4 klei jăk wưng thŭn 2023 - 2028. Mơ̆ng anăn, êpul kiă kriê bruă Đảng kdriêk, wăl krah, ƀuôn prŏng mâo mkŏ mjing sơăi hdră êlan ngă bruă hlăm klei bi ktưn ngă klei anăn. Truh jih thŭn mâo klei lŏ ksiêm wĭt lehanăn mă klei hriăm, mâo hdră êlan lŏ bi lar anăp truh kơ klei mkŏ mjing ênoh čuăn jăk kơ dŭm êpul bryuă Đảng nah gŭ. Y- Biêr Niê, K’iăng khua bruă Đảng čar Daklak lač:

 “Mkŏ mjing êpul bruă Đảng hŏng 4 klei jăk, anei knŏng jing knhuang tal êlâo čiăng kơ dŭm êpul bruă đảng nah gŭ lŏ dlăng wĭt bruă pô si srăng lŏ ngă jăk hĭn hlăm thŭn 2024 lehanăn hlăm dŭm thŭn tinăp”

Hŏng boh tŭ dưn lông bi hmô ngă bruă mkŏ mjing êpul bruă Đảng mâo 4 klei jăk, lu alŭ wăl hlăm čar Daklak hlăk ƀrư̆ ƀrư̆ dơ̆ng bi lar truh kơ dŭm êpul bruă đảng mkăn. Yap anei jing hdră yuôn bhăn êdi čiăng kơ dŭm êpul bruă đảng mâo klei bi mlih ktang hlăm klei kiă kriê, ai ktang klei tăng mblah mơ̆ng dŭm êpul bruă Đảng lehanăn klei thâo mơ̆ng grăp čô đảng viên hlăm čar dưi bi kjăp bruă knuă hlăm boh klei ară anei./.