Hnoh Ea Tuôr yan anei êa đĭ, êa đoh găn wăt dŭm boh tâo nina gam. Ti gŭ ana Knia, Y Wer Knul, khua ƀuôn Tuôr, ƀuôn hgŭm Hoà Phú hơ̆k mơak kyua ƀuôn pô dôk bi mlih hlăm grăp hruê. Mnuih ƀuôn sang hlăm ƀuôn êlâo dih mưng hŏng bruă lŏ hma, kphê, tiu, bi ară anei thâo ngă bruă hiu čhưn ênguê yang ƀuôn jiă kma knhuah mnuih Êđê. Hŏng hdră ngă bruă mrâo, mnuih ƀuôn sang mđĭ kyar bruă duh mkra, djă pioh knhuah dhar kreh djuê ana, čiăng kơ ênai čing, ênhiang mmuñ kwang nanao ti krah čư̆ dliê Lăn Dap Kngư.

" Tal êlâo hĭn lač jăk kơ knŭk kna mkŏ mjing klei găl đru kơ mnuih ƀuôn sang hmei. Bi kơ klei bi mŭt ƀuôn hgŭm, hmăng hmưi hlăm wưng kơ anăp ƀuôn hgŭm, čar uêñ mĭn duh bi liê kơ êlan klông čiăng kơ mnuih ƀuôn sang êrô êbat mâo klei găl, leh anăn rŭ mjing knơ̆ng kdơ̆ng êa čiăng krih kơ ana pla mjing leh anăn mđĭ kyar bruă hiu čhưn ênguê. Mkŏ mjing klei găl kơ mnuih ƀuôn sang dưi mă bruă ti Drai Nur, Drai săp, čiăng hriăm kơ bruă hiu čhưn ênguê. Hmăng hmưi buôn hgŭm đru sa kdrêč ngăn prăk mđĭ kyar bruă hiu čhưn ênguê, čiăng kơ phung tuê dlăng diñu ƀuh ƀuôn sang pô brư̆ hruê brư̆ đĭ kyar mdrŏng siam.”

Êjai gŏ sang khua ƀuôn Y Wer lŏ dôk mdơ̆ng sang krum mơ̆ng ênuk aduôn čiăng ngă anôk drông tuê hiu čhưn ênguê, kbưi hŏng anăn dŭm pluh knhuang jơ̆ng, gŏ sang amai H’Belly Êban ăt pŏk homestay hlăm sang krum. Amai H’Belly Êban brei thâo, homestay sang ñu lu drông phung tuê ala tač êngao. Mphŭn kčưm, amai mĭn ngă bruă hiu čhưn ênguê jing dleh dlan êdi, ƀiădah leh ngă bruă, amai ƀuh hdjul leh anăn jăk êdi:

 “Lač jăk kơ knŭk kna mkŏ mjing klei găl brei hmei drông tuê hlăm lăn čar leh anăn êngao lăn čar. Homstay Kathy čiăng hưn mdah hŏng grăp čô, hưn hŏng grăp čô hlei adôk sang krum drei srăng djă pioh, ngă homestay hưn mdah hŏng phung tuê hiu čhưn ênguê nao čuă dlăng leh anăn thâo kơ dhar kreh mnuih Êđê pô. Čiăng kơ anak čô drei thâo leh anăn djă pioh knhuah gru dhar kreh djuê ana mơ̆ng aduôn aê msĕ si sang krum, pơ̆k mñam, klei blŭ amĭ k’kiêng. Kâo hơ̆k mơak kyua dưi drông tuê mơ̆ng lăn čar tač êngao hriê ti homestay Kathy, diñu hriăm klei Êđê, čŭt hơô ao Êđê drei”.

Ƀuôn hgŭm Hòa Phú dưi mkŏ mjing bi mŭt mbĭt 3 să Hoà Phú, Hoà Khánh, Hoà Xuân,  ênhă êbeh 109 km2, mnuih ƀuôn sang giăm 50.000 êbâo čô, jing anôk dôk mơ̆ng đưm mơ̆ng mnuih Êđê, mâo krông Sêrêpôč leh anăn mâo dŭm hnoh êa găn, mâo klei găl mđĭ kyar bruă hiu čhưn ênguê. Leh bi mŭt mbĭt, lŏ mkŏ dăp anôk bruă knŭk kna, ƀuôn hgŭm bi klă čŏng nao duah mnuih ƀuôn sang, čŏng wĭt ti ƀuôn sang čiăng mđing hmư̆, thâo klei mnuih ƀuôn sang čiăng, hmư̆ klei blŭ mguôp mnuih ƀuôn sang… Hĭn kơnăn jing bi trông kơ hdră mđĭ kyar bruă duh mkra hŏng ai dưi, klei găl mâo. Đỗ Xuân Hiếu, k’iăng khua Bruă sang čư̆ êa ƀuôn hgŭm Hoà Phú brei thâo:

 “Bruă sang čư̆ êa ară anei jing pô ngă bruă đru, hrô kơ dôk guôn mnuih ƀuôn sang, Bruă sang čư̆ êa srăng nao hŏng mnuih ƀuôn sang, knơ̆ng bruă. Čŏng pô thâo klă klei čiăng mơ̆ng mnuih ƀuôn sang, knơ̆ng bruă čiăng pô mâo hdră êlan čiăng bi djăp klei čiăng mơ̆ng mnuih ƀuôn sang”.

Mbĭt hŏng mđĭ kyar bruă hiu čhưn ênguê, hlăm wưng păn bruă anei, Bruă Đảng ƀuôn hgŭm Hoà Phú ăt bi kă mlih pral bruă duh mkra bruă tuh tia – mkŏ mkra čiăng mkŏ mjing bruă mkŏ mkra wăl krah mrâo mrang. Hluê anăn, hnưm tlaih mơ̆ng klei jưh knang kơ bruă lŏ hma msĕ ară anei, leh anăn mkŏ mjing tur knơ̆ng kjăp čiăng jing wăl krah bruă tuh tia hlăm thŭn 2035.

Phạm Tiến Hưng, Khua dlăng bruă Đảng ƀuôn hgŭm Hoà Phú, čar Dak Lak brei thâo, hŏng dŭm hdră tă kơ bruă tuh tia, bruă lŏ hma kdrăp mrâo mrang, ƀuôn hgŭm Hoà Phú gĭr bi hrŏ klei jưh knang kơ ngăn prăk čar, gưl dlông, anăp truh čŏng pô kơ ngăn prăk, jing boh kdrŭt đĭ kyar mơ̆ng čar Dak Lak:

 “Klei dleh hĭn mơ̆ng ƀuôn hgŭm Hoà Phú jing si srăng ngă hlăm 5 thŭn kơ anăp bi mlih kơ bruă mkŏ mkra, klei hdĭp mơ̆ng mnuih ƀuôn sang mâo klei mlih klă sĭt, čiăng bi klă bruă mkŏ mjing Bruă sang čư̆ êa 2 gưl mơ̆ng gưl dlông jing djŏ leh anăn tŭ dưn.”

Mơ̆ng sa ƀuôn hgŭm lŏ hma, Hoà Phú hruê anei dôk mdưm tur knơ̆ng tal êlâo hlăm hdră ngă bruă jing wăl krah bruă tuh ti jiă kma dhar kreh, jing anôk bruă boh kdrŭt Nah Dhŭng mơ̆ng čar Dak Lak. Hdră ngă bruă anăn klă sĭt adôk lu klei dleh dlan, ƀiădah klei hmăng hmưi kpưn đĭ, klei gĭr bruă kđi čar leh anăn klei sa ai mơ̆ng mnuih ƀuôn sang, Hòa Phú dôk kuč mngač klei đăo knang mrâo hlăm boh tŭ dưn mơ̆ng klei bi hmô Bruă sang čư̆ êa alŭ wăl gưl, găl guôp, djŏ hdră kčah leh anăn djŏ ai mnuih ƀuôn sang.