Trần Thị Bình, ti să knông lăn Ia Dom, kdriêk Đức Cơ, čar Gia Lai djŏ ruah mŭt ngă mnuih mă bruă ksu dôk hlăm êpul mrô 2 knơ̆ng bruă mrô 72, Binh đoàn 15 găn leh êbeh 10 thŭn êgao. Ñu brei thâo, hŏng ênoh hrui wĭt grăp mlan êbeh 7 êklăk prăk, leh lu thŭn êgao, gŏ sang ñu lŏ blei thiăm hma, gĭr ngă bruă leh ruĕ bruă mŏng knơ̆ng bruă, mơ̆ng anăn mâo mnơ̆ng pioh, mnơ̆ng yua, đru kơ anak aneh nao sang hră mơar. Kyuanăn, ñu thâo săng nanao bruă klam mơ̆ng sa čô mnuih ngă bruă bi jăk hŏng sa anôk bruă duh mkra lehanăn răng mgang lăn čar:

“Jing mnuih ngă bruă mơ̆ng sa êpul duh mkra ti alŭ wăl knông lăn, dah mnuih mnuih mơ̆ng êngao nao mŭt hlăm đang war ti alŭ wăl knông lăn, snăn hmei nao hưn mtam hŏng êpul êya kiă kriê, lehanăn phung lĭng kahan čiăng mâo hdră êlan duh mkr apla mjing kjăp ti knông lăn”.

Bi ti knông lăn Čư̆ prông, čar Gialai, kyua mâo iêo mŭt ngă bruă ti êpul mrô 5, trung đoàn 710, snăn klei hdĭp mda gŏ sang Kpuih Kơ̆t mâo leh klei bi mlih kluôm dhuôm. Ñu brei thâo, ung mrâo đuĕ dôk hjăn, lăn ala điêt, lăn amâo lŏ jing, klei hdĭp lĕ nanao hlăm klei dleh dlan. Mơ̆ng akŏ thŭn 2022, jih dua ung mô̆ ñu mâo iêo mŭt ngă bruă đang ksu, snăn klei hdĭp dơ̆ng hơĭt leh:

“Ară anei dua ung mô̆ mdul hĭn leh, hlăk mrâo mŭt ngă bruă, snăn mâo êpul êya đru hlăm djăp mta kơ 2 ŭng mô̆. Ară anei gŏ sang mâo hnơ̆ng hrui wĭt hơĭt, mă klei hriăm mơ̆ng mnuih ngă bruă êlâo, kjăp hlăm klei ngă bruă, čiăng kơ prăk mlan đĭ hĭn mơh”.

Dôk hlăm jih alŭ wăl 3 să knông lăn Ia Pnôn, Ia Nan, Ia Dom sa kdrêč să Ia Kla, lehanăn wăl krah Čư̆ Ty, hlăm kdriêk Đức Cơ, dliê ksu mơ̆ng knơ̆ng bruă mrô 72, hlăm Binh Đoàn 15 hlăk bi mguôp hŏng 18 boh ƀuôn hlăm čar Gialai. Tĭng kơ nah dih knông lăn, knơ̆ng bruă ăt mâo mơh hdră êlan pla mjing ksu ti 7 să hlăm dua kdriêk jing Oyadav lehanăn Bo čar Ratanakiri, ala čar Campuchia. Mbĭt hŏng klei mlih mrâo, mđĭ hĭn boh tŭ dưn mơ̆ng lu bruă yang ƀuôn, bruă mkă dlăng klei suaih pral, mbha êa drao amâo mâo mă prăk ôh, mâo klei mjĕ mjing mnuih ngă bruă djuê lar hŏng mnuih djuê ƀiă, bi đru mđrăm mbĭt mđĭ kyar klei hdĭp mda. Thiếu tá Phan tiến toàn khua knơ̆ng bruă mrô 72, Binh đoàn 15 brei thâo:

 “Jing êpul êya bruă dôk hlăm 3 boh să ti knông lăn, grăp mlan êpul êya tiŏ nao lĭng kahan hgŭm bi răng mgang klei êđăp ênang bruă kđi čar, klei êđăp ênang yang ƀuôn hlăm alŭ wăl, ngă jăk jih jang bruă, lehanăn bi hgŭm ksiêm dlăng klei mnuih êrô êbat, jưh dôk. Grăp mlan mâo êpul čŏng răng kriê bi hgŭm kjăp bruă răn mgang klei êđăp ênang knông lăn, gơ̆ng knông lăn. Dŭm thŭn leh êgao, êpul êya mâo leh êpul bruă Đảng, bruă sang čư̆ êa bi mni”.

Hŏng hdră êlan jing “Binh đoàn bi mguôp kjăp hŏng čar, kdriêk, knơ̆ng bruă bi mguôp hŏng kdriêk, să, êpul duh mkra bi mguôp hŏng ƀuôn sang, gŏ êsei mnuih djuê lar bi mguôp hŏng gŏ êsei mnuih djuê ƀiă”, ară anei Binh Đoàn 15 hlăk ngă bruă duh mkra bi mguôp hŏng bruă răng mgang knông lăn boh taih êbeh 250km ti kơ dưr Lăn Dap kngư, bi knông hŏng dua ala čar Lao lehanăn Campuchia Dŭm thŭn leh êgao mâo nanao klei mđing mjuăt bi hriăm hdră mă bruă, bi hriăm klei rông mnơ̆ng lehanăn pla mjing, đru mjeh mjiêng, prăk duh bi liê... đru kơ mnuih ƀuôn sang mđĭ kyar klei hdĭp mda. Mơ̆ng anăn lu gŏ êsei mnuih djuê ƀiă tlaih leh mơ̆ng klei dleh dlan, kpưn đĭ nao kơ thâo mâo, đru mguôp leh mđrăm mbĭt hŏng bruă sang čư̆ êa alŭ wăl mkŏ mkra krĭng ƀuôn sang mrâo ti alŭ wăl knông lăn.

Thiếu tướng Hoàng Văn Sỹ, k’iăng khua bruă Đảng, khua knơ̆ng kiă kriê kahan Binh đoàn 15 brei thâo, binh đoàn ară ani hlăk mâo êbeh 15 êbâo čô mnuih ngă bruă, lu jing mnuih djuê ƀiă. Thŭn 2022, hnơ̆ng hrui wĭt mơ̆ng grăp čô kah knar jing 8 êklăk prăk/mlan. klei hdĭp mda mnuih ƀuôn sang lehanăn mnuih ngă bruă ti knông lăn mâo klei mđĭ hĭn leh, snăn klei bi muôp bruă duh mkra lehanăn bruă răn mgang klei êđăp ênang knông lăn knư̆ hrue knư̆ mâo hyuă kjăp hĭn:

 “klei thâo bi mguôp plah wah dŭm djuê ana, klei mjĕ mjuk dhar kreh mrâo hlăm yang ƀuôn knư̆ mâo hyuă kjăp hĭn plah wah mnuih ƀuôn sang hŏng knuă druh mnuih ngă bruă mơ̆ng binh đoàn jing tliêr kjăp nanao. Boh nik jing mnuih ƀuôn sang mâo klei thâo săng hĭn leh kơ bruă răng mgang klei êđăp ênang ti knông lăn, răng mgang kjăp klei dưi êngiê kơ lăn čar pô, bi hgŭm hŏng alŭ wăl, lehanăn gưl nah dlông, pral mghaih msir djăp mta bruă mjêč”.

Hŏng dŭm hdră êlan jing djŏ klă, guôp hŏng ai tiê klei mĭn mnuih ƀuôn sang, dŭm đang ksu mtah mda lă lia ktuê knông lăn mjing leh mnư̆ mnang kjăp kơ alŭ wăl lăn dap kngư pô./.