Mơ̆ng krah mlan 3 leh êgao, leh Việt Nam lŏ hƀuê wĭt êlan phiơr hŏng ala tač êngao, lehanăn pŏk jih jang bruă hiu čhưn ênguê, čar Quảng Nam mâo drông leh dŭm êbâo gưl čô tue mơ̆ng ala tač êngao. Leh êbeh dua thŭn hmăi amâo mâo jăk mơ̆ng klei ruă tưp Covid 19, aduôn Debbie Baker tue mơ̆ng ala čar Mi lač, jih jang bruă hiu čhưn ênguê mtah mda, hiu lông dlăng, hlăm wưng anei jing jăk êdi: “Kâo ƀuh mơak leh mâo truh kơ Việt Nam lehanăn anak mnuih kơ anei. Hlăm dŭm hrue dôk kơ anei, jing wưng jăk êdi hŏng kâo, boh nik jing mâo nao hlăm dŭm knăm jăk mơak, guôp hŏng lăn adiê kơ anei. Phung ƀuôn sang kơ anei thâo jum tue. Kâo khăp ƀơ̆ng huă mnơ̆ng ƀơ̆ng phung ƀuôn sang mkra tinei”.

Êlâo kơ wưng mâo klei ruă tưp Covid 19 truh, grăp thŭn dŭm kdriêk krĭng čư̆ čhiăng čar Quảng Nam msĕ si Phước Sơn, Tây Giang, Đông Giang... Mâo drông dŭm êtuh êbâo gưl čô tue. Mâo lu anông phung tue hlăm ala čar pô lehanăn mơ̆ng ala tač êngao hmư̆ hing, dưi thâo msĕ si Đỉnh Quế, đang dliê Pmu, ƀuôn hiu čhưn ênguê yang ƀuôn Bhơ Hoong...

Mâo lu blư̆ truh hlăm krĭng dlông Tây Giang, amai Lương Thị Hương, khua adŭ bruă mkŏ mjing Children Of Việt Nam mâo hưn mthâo leh hŏng tue ala tač êngao lông hriê čhưn dlăng kơ klei hdĭp mda ƀuôn sang djuê ana Ktu. Tui si amai Lương Thị Hương, êngao kơ adiê êđăp, anak mnuih kơ anei thâo jum tue hdĭp siă suôr hŏng dliê kmrơ̆ng, ăt adôk djă pioh hrông djưt kmrơ̆ng kơnei anăn yơh jing klei jăk êdi pioh kơ bruă hiu čhưn dlăng lăn mnga êa mơak“Kâo ƀuh jăk êdi mima kơ anei anăn jing kmrơ̆ng ăt adôk rông djưt boh nik jing dliê ana Pmu, diñu bi čih yap ênŭm phŭn kyâo jao kơ phung ƀuôn sang kiă kriê. Lehanăn lĕ dŭm mta knăm mơak mơ̆ng phung ƀuôn sang kơ anei, msĕ si kdŏ Tơ̆ng tŭng da dă jing iêo jak tue jăk êdi, kâo hriê leh lu blư̆, lehanăn hmei hrăm mbĭt kdŏ msĕ”.

Lu thŭn leh êgao, kdriêk Tây Giang mâo drông leh lu tue mơ̆ng ala tač êngao hiu tuor čhưn dhing mơak hlăm ƀuôn sang, lông nao hdĭp mbĭt hŏng phung ƀuôn sang, mđing dlăng kơ dhar kreh djuê ana Ktu. Ayŏng Pơloong Plêñ, knuă druh adŭ bruă dhar kreh hâo hưn kdriêk Tây Giang, jing pô mkŏ, hdră êlan hiu čhưn ênguê yuôm bhăn anei. Hlăm dŭm blư̆ đŭ hiu mbĭt hŏng tue hiu dlăng kyâo Pmu, hlăk ai Ktu anei ba leh kơ tue mâo lu klei bi kngăr, leh ñu blŭ raih kjăp klei Angle hưn mdah kơ knhuah gru dhar kreh djuê ana pô. “Kâo čiăng kơ jih jang klei tŭ dưn dhar kreh jăk siam anei mâo hưn mdah hŏng djăp čar kwar kluôm ala, lehanăn truh hŏng jih jang mah jiăng tar rŏng lăn. Phŭn tal êlâo tuôm hŏng lu klei dleh dlan mơh, kyua amâo mâo thâo blŭ klei tue, lehanăn klei huă ƀơ̆ng mơ̆ng diñu jing mdê mơh hŏng pô, ƀiădah diñu khăp nao truh hlăm war bưn, djă wăng lông klei tlăng, pla djam, lehanăn truh mlam čuh pui dram bi mguôp hŏng pjhung ƀuôn sang”.

Êlâo kơ wưng klei ruă tưp Covid 19 truh, čar Quảng Nam mâo leh hdră pŏk mlar bruă hiu čhưn ênguê, dưn yua jih klei găl hlăm alŭ wăl krĭng čư̆ čhiăng nah Yŭ, hŏng lăn mnga êa siam, mbĭt hŏng djăp mta dhar kreh djuê ana jăk siam. Arât Bluĭ, k’iăng khua knơ̆ng bruă sang čư̆ êa kdriêk Tây Giang, čar Quảng Nam brei thâo, bruă hiu čhưn ênguê krĭng čư̆ čhiăng nah Yŭ čar Quảng Nam năng duh bi liê djŏ hŏng klei găl tinei kñăm dưn yua jih klei yuôm bhăn mâo leh: “Hmei čang hmăng kơ Gưl dlông lehanăn čar Quảng Nam mđing duh bi liê lu hĭn kơ bruă nah gŭ, đru kơ klei êrô êbat găl nưih, mâo dŭm mta bruă prŏng, hdră êlan jăk mđĭ kyar dhar kreh, mjuăt asei lehanăn hiu čhưn ênguê. Bi mđing hĭn kơ dhar kreh ti anăp lehanăn dhar kreh amâo mâo êdah klă kñăm kriê pioh, lehanăn dưi mđĭ bi lar”.

Hlăm klei tă hdră mđĭ kyar čar Quảng Nam, 5 thŭn kơ anăp čar mđing hĭn kơ bruă hiu čhưn ênguê hlăm alŭ wăl čư̆ čhiăng nah yŭ. Lê Trí Thanh, Khua knơ̆ng bruă sang čư̆ êa čar Quảng Nam brei thâo, mđĭ kyar bruă hiu čhưn ênguê krĭng čư̆ čhiăng Quảng Nam, amâo mâo klah đuĕ ôh hŏng bruă lŏ bi kơrŭ lăn mnga êa mơak klei jăk siam mơ̆ng dliê kmrơ̆ng, lehanăn kriê pioh knhuah gru dhar kreh djuê ana. Tơdah thâo kriê pioh, lehanăn mđĭ kyar djŏ hdră, anei jing klei tŭ dưn yuôm bhăn mjing ƀô̆ ală mrâo kơ bruă hiu čhưn ênguê Quảng Nam hlăm wưng kơ anăp. “Lŏ dơ̆ng mđĭ kyar bruă hiu čhưn ênguê ti dŭm alŭ wăl mâo klei thâo dưn yua kơ bnruă hiu čhưn ênguê hlăm lăn mnga êa mơak, hiu čhưn dhing anôk lăn êa huĭ hyưt, lehanăn anôk pioh kơ bruă mdei msăn. Bruă hiu čhưn ênguê kơ lăn mnga êa mơak mguôp mbĭt hŏng hiu čhưn ênguê kơ dhar kreh djuê ana ti alŭ wăl čư̆ čhiăng. Jih jang mta bruă hiu čhưn ênguê prŏng lehanăn điêt srăng bi mguôp mbĭt mjing sa klei jăk mrâo kơ bruă hiu čhưn ênguê krĭng nah yŭ čar Quảng Nam”./.