Ƀuôn Hàng Làng, să Gung Ré, kdriêk Di Linh, čar Lâm Đồng lu jing mnuih djuê ƀiă hdĭp mda. Dŭm thŭn êgao, bruă mkŏ mjing lehanăn bi mŭt đảng viên, mơ̆ng phung kdlưn hĭn, mâo leh êpul bruă Đảng mđing mjuăt bi hriăm. Khua mduôn K’Keo, Khua bruă Đảng brei thâo kyua mđing hlăm klei bi hriăm   mbŏ, mâo bi mŭt đảng viên mâo klei kjăp hĭn mkă hŏng ênoh, 100% đảng viên hlăm êpul bruă Đảng, boh nik jing phung đảng viên mda asei, dưn yua jăk klei thâo ba anăp, thâo bi hmô hlăm bruă duh ƀơ̆ng lehanăn hdĭp mda:

 “Êlâo dih, êpul bruă Đảng mâo 8 čô đảng viên, truh ară anei đĭ truh 13 čô đảng viên, hlăm anăn lu jing đảng viên mnuih djuê ƀiă. Hlăm thŭn anei, êpul bruă đảng lŏ dơ̆ng ksiêm dlăng, lehanăn bi mŭt dua čô mnuih djuê ƀiă nao hriăm klei bhiăn Đảng, leh ruĕ hriăm snăn êpul bruă Đảng srăng ksiêm bi mklă brei mŭt hlăm Đảng. Snăn êpul bruă Đảng jih ai tiê mđing kơ phung jing kldưn hĭn, mâo mnuih hur har, thâo săn asei mlei, đru hlăm bruă hŏng Đảng snăn hmei mđing kơ klei bi mbŏ kơ klei bi mŭt hlăm Đảng. Leh mâo mŭt hlăm Đảng, jih jang phung đảng viên hur har sơăi, jih ai tiê mâo klei bi hmô jăk, kñăm čiăng kơ mnuih ƀuôn sang tui hlue”.

Msĕ snăn mơh, krĭng mnuih djuê ƀiă ti să Đạ Nhim, kdriêk Lạc Dương, čar Lâm Đồng ăt ngă jăk bruă bi hriăm mbŏ, mjing djăp klei găl čiăng kơ mnuih ƀuôn sang hmei pô thâo bi hmô jăk, mâo klei mđing uêñ dưi bi hriăm, lehanăn brei mŭt hlăm Đảng. Hlăm anăn mâo êbeh 120 čô đảng viên, bi mguôp hlăm 10 bruă Đảng ti să Đạ Nhim snăn êgao mkrah leh jing mnuih djuê ana K’ho. Amai Cil Pam Ka Duyên, đảng viên mda asei hlăm êpul bruă Đảng ƀuôn Đạ Tro, să Đạ Nhim lač, mâo leh mnuih sĭt, bruă sĭt, snăn klei hâo hưn mtô mblang kơ dŭm hdră êlan mơ̆ng Đảng, lehanăn klei bhiăn knŭk kna dưi mâo boh tŭ dưn jăk, mnuih ƀuôn sang thâo ba yua hluê ngă. Kyua anăn, čiăng kơ mnuih ƀuôn sang jưh knang, lehanăn jhŏng bi mlih klei mĭn mă bruă, bi mlih mnơ̆ng pla, mnơ̆ng rông, mđĭ ênoh mâo ba wĭt, snăn grăp čô đảng viên jing nanao mnuih ba êlan êlâo hlăm djăp mta;

 “Leh kâo jing sa čô đảng viên jing lŏ mâo klei găl hĭn čiăng thâo săng kơ hdră êlan mơ̆ng Đảng, klei bhiăn knŭk kna. Mơ̆ng anăn, kâo dưi ngă jăk hĭn bruă čuăn mơ̆ng êpul bruă Đảng jao. Kâo dru leh mnuih ƀuôn sang ƀuôn pô lu hĭn, msĕ si mtrŭt mjhar mnuih ƀuôn sang bi mlih mnơ̆ng pla mjing, gĭr lŏ pla mjing ana ƀiă hruê pioh lŏ mâo mnơ̆ng ba wĭt, mđĭ kyar klei hdĭp mda. Ară anei klei hdĭp mnuih ƀuôn sang mnuih djuê ƀiă mdul leh klei dleh dlan mkă hŏng êlâo”.

Tui si Cil Ha Poh, Khua bruă Đảng să Đạ Long, kdriêk Đam Rông, čar Lâm Đồng, čiăng dưi ngă jăk bruă bi mŭt đảng viên, boh nik phung đảng viên mda asei hlăm mnuih djuê ƀiă, snăn bruă mjuiăt bi hriăm hlăm êpul êdam êra, hlăm dŭm êpul bruă kđi čar, yang ƀuôn, hlăm ƀuôn sang nah gŭ jing bruă ngă tal êlâo. Mơ̆ng anăn, mơ̆ng akŏ wưng păn bruă anei, să Đạ Long mâo bi mŭt leh truh 17 čô đảng viên, hlăm anăn mâo 11 čô đảng viên mâo hnơ̆ng hriăm gưl prŏng, lehanăn 5 čô đảng viên mâo klei thâo ti hnơ̆ng gưl krah. Anăn jing phung đảng viên mda asei, mnuih djuê ƀiă, dưi yap jing mnuih amra lŏ čuê hlăm klei mkŏ mjing lehanăn bi mŭt hlăm đảng wưng tinăp. Cil Ha Poh, brei thâo:

Tui si klei kiă kriê mơ̆ng nah dlông, snăn êpul bruă Đảng să jih ai tiê leh tui duah, lehanăn jao kơ grăp čô phung khua kiă kriê hlăm Đảng kăp ksiêm dlăng, bi hriăm mbŏ, lehanăn ngă jăk bruă kăp kčĕ đru. Mđing hlăm phung êdam êra, lehanăn phung mrâo wĭt mơ̆ng kahan, phung êdam êra hur har hlăm bruă ƀuôn sang, thâo duh ƀơ̆ng, hur har hlăm bruă êdam êra, hlue ngă jăk hlăm bruă bi ktưn thâo khăp kơ lăn čar... Mơ̆ng anăn mjing êpul bi hriăm mbŏ anăp bi mŭt hlăm Đảng. Leh ruĕ hriăm mâo klei thâo săng kơ Đảng, phung đảng viên hlăm êpul bruă Đảng lŏ dơ̆ng kăp ksiêm, mjuăt bi hriăm čiăng mâo klei thâo săng hĭn, lehanăn mâo klei čiăng mŭt hlăm Đảng”.

Phung đảng viên mda asei, phung kdlưn hĭn hlăm mnuih djuê ƀiă ti čar Lâm Đồng hlăk dôk ba anăp, thâo bihmô, čŏng kpưn đĭ hlăm klei duah ƀơ̆ng, lehanăn klei hdĭp mda. Klei anei, bi knăl leh kơ klei ruah djŏ êlan, hŏng klei kjăp ngă bruă mkŏ mjing Đảng mđrĭng hŏng klei mđĭ kyar krĭng mnuih djuê ƀiă hlăm wưng ară anei. Anei dưi yap jing bruă čuăn yuôm bhăn hlăm kđi čar, jing leh hdră êlan kơ čar Lâm Đồng lŏ bi kjăp bruă kđi čar nah gŭ, đru mtrŭt mđĭ klei duh mkra ala ƀuôn, răng mgang kjăp klei êđăp ênang, lehanăn hyuă kjăp hĭn klei thâo bi mguôp jih jang djuê ana hlăm alŭ wăl./.