Jing sa hlăm 8 boh ƀuôn hgŭm, amâo mâo klei bi mŭt mbĭt ôh tui si hdră mtrŭn dăp wĭt êpul êya bruă sang čư̆ êa, Ƀuôn hgŭm Quảng Hoà čar Lâm Đồng mprăp êjai 55 čô mnuih mă bruă. Ƀiădah leh sa mlan mă bruă, ƀuôn hgŭm mâo 32 čô mnuih mă bruă, jing adôk kƀah truh 23 čô mnuih. Hoàng Trung Diện, Khua knơ̆ng bruă sang čư̆ êa ƀuôn hgŭm Quảng Hoà brei thâo, klei anei ngă leh truh kơ anôk huông kduông anôk mă bruă, ngă klei bi klam lu bruă mơ̆ng sa čô mnuih mă bruă:

“Boh nik, hlăm klei dăp mnuih mă bruă jing phung khua kiă kriê dŭm boh adŭn êpul bruă. Adŭ bruă dôk hlăm klei amâo mâo k’iăng adŭ bruă ôh, ka mâo mơh khua adŭ bruă, knŏng mâo mă 2 čô knuă druh truăn kơ bruă hră mơar, jing djă prăk lehanăn mkă tĭng. Knơ̆ng bruă sang čư̆ êa ƀuôn hgŭm lŏ yua dŭm phung knuă druh dôk hlăm êpul bruă Đảng l;ehanăn hlăm êpul gơ̆ng nao đru kơ knơ̆ng bruă sang čư̆ êa hlăm klei mă bruă”.

Leh msĕ hŏng ƀuôn hgŭm Quảng Hòa hlăk kƀah mnuih mă bruă, ƀuôn hgŭm   Krông Knô, čar Lâm Đồng lŏ dleh hlăm klei mă bruă, êjai anăn anôk bruă dhar kreh ƀuôn hgŭm mâo truh 26 čô mnuih mă bruă. Huỳnh Long Quốc, Khua knơ̆ng bruă sang čư̆ êa ƀuôn hgŭm brei thâo, leh ngă bruă bi mŭt mbĭt 3 boh să Dak Drô, Tân Thành lehanăn wăl krah Dak Mâm (kdriêk Krông Knô, čar Daknông hđăp), ƀuôn hgŭm krông Knô mrâo ăt snăn anôk bruă dhar kreh mjuăt asei mlei msĕ si hŏng kdriêk hđăp, ngă truh kơ klei mâo anôk êbeh mnuih lehanăn mâo anôk kƀah mnuih:

“Ară anei bruă knuă jing amâo mâo ôh, ayŏng adei dôk bư̆ ban. Dŭm boh ƀuôn hgŭm mkăn mâo mkŏ mjing anôk bruă ngă hră mơar, ƀiădah amâo mâo bi kah ôh mnuih nao đru bruă knuă truh kơ dŭm boh ƀuôn hgŭm mkăn, êjai ară anei truh 26 amâo mâo bruă knuă mă ôh. Ƀơ̆ng prăk mlan knŭk kna mang, ƀiădah amâo mâo bruă mă, čar bi ksiêm dlăng hdră đru kơ dŭm ƀuôn hgŭm bi ruh mgaih jih jang klei dleh dlan”.

Leh mlan tal êlâo ngă bruă sang čư̆ êa dua gưl, čar Lâm Đồng dôk tal 4 hlăm kluôm ala kơ ênoh ư ai mơ̆ng mnuih ƀuôn sang hlăm klei mă bruă. Siămdah, bruă dăp mbha tiŏ nao mnuih mă bruă ka djŏ hŏng mnuih, hŏng bruă, mâo anôk êbeh mnuih, mâo anôk kƀah mnuih boh nik jing knuă druh truăn kơ bruă, ngă leh kơ dŭm anôk bruă sang čư̆ êa nah gŭ mă bruă ka jăk mâo klei tŭ dưn sĭt êmĭt ôh . Msĕ si hlăm čar mâo jih jang truh 93 boh ƀuôn hgŭm amâo mâo ôh knuă druh truăn hlăm bruă boh nik kơ bruă kdrăp mrâo; 60 boh ƀuôn hgŭm kƀah knuă druh mă bruă kơ bruă ngăn dŏ wăl hdĭp mda; 33 boh ƀuôn hgŭm kƀah knuă druh bruă kiă kriê klei rŭ mdơ̆ng...

Čiăng mghaih msir klei dleh kpăk anăn, car Lâm Đồng lŏ tiŏ nao leh truh 260 čô knuă druh truăn kơ bruă nao hlăm dŭm boh ƀuôn hgŭm. Mbĭt hŏng anăn čar ăt mkŏ mjing leh 12 êpul nao đru bruă hlăm dŭm boh ƀuôn hgŭm đru mghaih msir jih jang klei dleh dlan tal êlâo. Knơ̆ng bruă kiă kriê bruă knuă lehanăn êpul bruă kiă kriê klei bhiăn mă bruă mơ̆gn Êpul gơ̆ng bruă ƀuôn sang čar Lâm Đồng ăt mkŏ mjing leh hdră ba mdah kơ gưl mâo klei dưi lŏ dơ̆ng tiŏ nao knuă druh mă bruă truh kơ dŭm boh ƀuôn hgŭm, bi djăp hŏng klei dôk čiăng kơ mnuih mă bruă mâo djăp klei thâo.

Đỗ Văn Chung, Khua knơ̆ng bruă kiă kriê bruă knuă čar Lâm Đồng brei thâo čar hlăk mđĭ dăp mnuih mă bruă ti dŭm boh ƀuôn hgŭm, čiăng kơ bruă sang čư̆ êa dua gưl mă bruă hŏng klei tŭ dưn:

“Êlâo hĭn ksiêm dlăng ti 124 boh ƀuôn hgŭm, alŭ wăl knơ̆ng mâo dŭm bruă truăn hŏng phung knuă druh mâo tiŏ nao. Čiăng kơ jih jang ƀuôn hgŭm mâo djăp ênŭm knuă druh truăn kơ bruă. Tal dua, dŭm alŭ ƀuôn hgŭm bi mlih nao knuă druh truăn kơ bruă, ƀuôn hgŭm anei đru kơ ƀuôn hgŭm adih, êlâo kơ mâo djăp ênŭm knuă druh truăn kơ bruă.”

Pral dưi thâo ƀuh klei dleh kƀah, đa anôk êbeh mnuih, mâo anôk kƀah mnuih mă bruă ti gưl ƀuôn hgŭm, čar Lâm Đồng hlăk lŏ dơ̆ng mă bruă hŏng jih ai tiê čiăng kơ bruă sang čư̆ êa nah gŭ ƀrư̆ hrue ƀrư̆ bi kjăp, lehanăn dưi mă bruă kơ mnuih ƀuôn sang jăk hĭn./.