Ayŏng Y-Quân Hđơ̆k, mnuih Êđê ti ƀuôn Alê A, ƀuôn hgŭm Ea Tam, ƀuôn prŏng Ƀuôn Ama Thuôt, čar Dak Lak mrâo dưi bi mŭt Đảng mlan 1/2025. Ñu yăl dliê, ƀuh phung đảng viên hlăm ƀuôn jing phung thâo bi hmô, mâo mnuih ƀuôn sang đăo knang, kyuanăn ñu gĭr jing sa čô đảng viên. Mbĭt hŏng bruă ngă jăk bruă klam hlăm êpul kdŏ mmuñ djuê ana ti Dak Lak, ayŏng Y-Quân lŏ hur har nao hgŭm hlăm dŭm mta bruă alŭ wăl. Ñu mbĭt hŏng phung hlăk ai hlăm ƀuôn kreh mkŏ mjing dŭm mta bruă dhar kreh, klei kdŏ mmuñ, mtrŭt mjhar mnuih ƀuôn sang bi lar knhuah gru djuê ana pô. Y-Quân brei thâo:

 “Kâo pô ktưn hư dưi bi mŭt hlăm Đảng Cộng sản Việt Nam. Kâo srăng gĭr hriăm, bi mjuăt pô čiăng năng jing sa čo đảng viên”.

Lê Văn Nhuần, khua bruă đảng nah gŭ ƀuôn Alê A, ƀuôn hgŭm Ea Tam, ƀuôn prŏng Ƀuôn Ama Thuôt, čar Dak Lak brei thâo: bruă mđĭ kyar đảng viên jing bruă kđi čar mđing tal êlâo. Kyua alŭ wăl mâo êbeh 90% jing mnuih Êđê, lu mnuih nao mă bruă kbưi kyuanăn bruă mđĭ kyar đảng viên tuôm hŏng lu klei dleh dlan. Khădah sơnăn, anôk bruă ăt dưi bi mŭt 2 čô đảng viên mrâo. Lê Văn Nhuần brei thâo, hlăm anôk bruă đảng mao leh 76 čô đảng viên, bi lar bruă klam pô, boh nik hlăm klei hâo hưn, mtrŭt mjhar mnuih ƀuôn sang mđĭ kyar klei hdĭp mda, răng mgang klei êđăp ênang leh anăn mkŏ mjing bruă kđi čar nah gŭ.

Wăt phung đảng viên dôk bi kƀĭn tinei, amâodah phung mơ̆ng anôk mkăn nao hgŭm jăk dŭm hdră bruă bi lông ktưn mơ̆ng alŭ wăl. Phung nik diñu đru mguôp lu hlăm mnơ̆ng dhơ̆ng, ai tiê leh anăn blŭ mguôp mkŏ mjing alŭ wăl. Kyua anăn yơh alŭ wăl hmei grăp thŭn mâo gưl nah dlông pah mni, boh nik hlăm dŭm hdră bruă mnuih ƀuôn sang.

Hŏng dŭm alŭ wăl mâo lu mnuih djuê ƀiă hdĭp mda, bruă mđĭ kyar đảng viên amâo djŏ knŏng ruah phung êdah êdi, ƀiădah lŏ jing klei mtô mjuăt, mđĭ klei thâo săng leh anăn bi râo klei găl mơ̆ng êpul êya, Msĕ si ti să Yang Tao, kdriêk Lăk, čar Dak Lak, anôk mâo êbeh 95% jing mnuih djuê ƀiă, ƀiădah hŏng klei gĭr mkŏ mjing, mđĭ kyar anôk bruă nah gŭ kjăp ktang, grăp êpul bruă đảng nah gŭ mkŏ mjing leh hdră êlan, ba mdah dŭm hdră mtrŭn kơ hnơ̆ng čuăn mđĭ kyar đảng viên grăp thŭn. Mbĭt hŏng anăn, phung đảng viên hlăm grăp anôk bruă, hur har bi hmô nao êlâo, mjing klei lông dlăng jing klei găl hlăm klei mđĭ kyar bruă duh mkra ala ƀuôn ti alŭ wăl. Y Wu Sruk, k’iăng khua Bruă sang čư̆ êa să Yang Tao, kdriêk Lăk brei thâo:

 “Pô thâo knhuah gru tinei, boh nik jing klei blŭ ênưih kah mbha hŏng mnuih ƀuôn sang. Leh anăn thâo knhuah hdĭp, pô thâo klei dleh dlan mơ̆ng mnuih ƀuôn sang. Hŏng klei thâo anăn pô dưn ua, ba dŭm hdră êlan mơ̆ng Đảng, klei bhiăn lăn čar truh hŏng mnuih ƀuôn sang čiăng diñu thâo leh anăn dưn yua hlăm klei hdĭp”.

Ƀuh klă klei yuôm mơ̆ng bruă mđĭ kyar Đảng viên, khua Bruă sang čư̆ êa čar Dak Lak ngă leh lu hdră êlan mkŏ ming klei găl kơ phung đảng viên, boh nik jing mnuih djuê ƀiă dưi mŭt hlăm đảng. Mbĭt hŏng dŭm hdră êlan đru mtô mjuăt, mkŏ mjing klei găl kơ klei bi kƀĭn krĭng taih kbưi dưi đru mđĭ boh tŭ dưn klei kriê dlăng leh anăn gĭt gai mơ̆ng Bruă sang čư̆ êa. Lê Nam Cao, k’iăng khua êpul mkŏ mjing knuă druh čar Dak Lak brei thâo:

 “Bruă đảng nah gŭ dŭm gưl ruah phung anak čô jing mnuih djuê ƀiă čiăng ba hriăm ti sang hră gưl 3 Knŭk Kna rông ba gưl kdriêk leh anăn gưl čar. Tal dua jing ngă hdră êlan tiŏ nao hŏng phung anak čô mnuih djuê ƀiă ti dŭm anôk bruă. Mơ̆ng dŭm bruă dăp anei srăng jing ai dưi yuôm bhăn čiăng čuăk mkă êpul khua kiă kriê dŭm gưl”.

Hŏng boh sĭt bruă duh mkra ala ƀuôn, boh sĭt mnuih ƀuôn sang mơ̆ng Dak Lak, bruă mđĭ kyar đảng viên hlăm krĭng mnuih djuê ƀiă amâo djŏ knŏng mâo boh tŭ dưn kđi čar ƀiădah lŏ đru bi mlih kluôm alŭ wăl. Kyuadah phung đảng viên mnuih djuê ƀiă dôk jing kdrông mkŏ ba dŭm hdră êlan mơ̆ng Đảng truh hŏng mnuih ƀuôn sang, ksul mbŭ klei đăo knang mơ̆ng mnuih ƀuôn sang hŏng Đảng, jing klei kă kjăp klei bi mguôp dŭm djuê ana, mkŏ mjing knhuah hdĭp mrâo mrang, đru kơ mnuih ƀuôn sang mđĭ kyar bruă duh mkra, hluê ngă dŭm mta kñăm mđĭ kyar bruă duh mkra ala ƀuôn, mđĭ ai kdơ̆ng mblah, mkŏ mjing êpul bruă đảng, bruă kđi čar ƀrư̆ hruê ƀrư̆ kpă ênuah, kjăp ktang.