Mjing phŭn đảng viên mơ̆ng sang hră

VOV4.Êđê - Dŭm thŭn giăm anei bruă mtô mjuăt, bi hriăm phung hđeh sang hră mâo dŭm gưl bruă Đảng nah gŭ dŭm sang hră gưl tlâo ti kdriêk Ƀuôn Đôn, čar Dak Lak dlăng yuôm bhăn. Khădah ênoh phung hđeh sang hră mŭt Đảng ka lu ôh, biădah hluê anăn đru bi thâo săng klă kơ klei mĭn cách mạng kơ phung hđeh sang hră dưi ksul mbŭ, mjuăt bi hriăm čiăng lŏ dơ̆ng jing mnuih tŭ dưi kơ yang ƀuôn.

Tạ Thị Thuỳ Linh leh anăn Nguyễn Mai Thảo Anh Jing dua đảng viên mrâo mâo klei ktưn hưn dưi mŭt đảng. Jih dua jing hđeh sang hră hriăm thâo 12 thŭn. 3 thŭn hriăm gưl dua, gưl tlâo gĭr hgŭm hlăm djăp hdră bruă mơ̆ng phung êdam êra. Diñu jing K'iăng khua dlăng bruă hriăm hră, jing k'iăng Khua dlăng bruă Đảng hlăm adŭ. Thùy Linh srăng mŭt hriăm sang hră gưl prŏng Gang mkhư̆ truih mdjiê klei pui ƀơ̆ng, bi Thảo Anh srăng mŭt hriăm Sang hră gưl prŏng Hdră Bhiăn, Sang hră Ala čar Hà Nội. Tạ Thị Thuỳ Linh kah mbha ai tiê pô tơdah dưi mŭt Đảng:

"Tơdah mŭt Đảng snăn kâo ƀrư̆ gĭr hlăm djăp mta bruă. Gĭr hriăm nanao bi jăk leh anăn srăng đru mguôp tŭ dưn kơ ala ƀuôn"

Nguyễn Mai Thảo Anh brei thâo:

"Amĭ ama kâo leh anăn phung awa hlăm gŏ sang jing đảng viên anăn kâo mâo klei đăo knang hlăm Đảng. Amĭ ama kâo ăt mkŏ mjing sa kdrêč hlăm klei thâo săng kơ kâo. Amĭ ama kâo nao ai leh anăn đru kơ kâo"

Nai Trần Văn Công, Khua dlăng bruă Đảng 2, Bruă Đảng Sang hră gưl 3 Ƀuôn Đon brei thâo: thŭn hriăm 2020-2021 Sang hră gưl 3 Ƀuôn Đon bi mŭt đảng viên tal êlâo kơ hđeh sang hră. Anei jing sa knhuang êdah êdi mơ̆ng Đảng, kyua hlăk anăn mâo lu phung nai jing đảng viên adôk kĭ kơ̆, bi mĭn lu. Wăt phung amĭ ama phung hđeh sang hră ăt lač: Mŭt Đảng jing hnưm đei mkă hŏng gưl thŭn anei.

"Hŏng phung êdah êdi, čiăng hriăm mbŏ leh anăn mŭt Đảng jing bruă yuôm bhăn snăk. Khădah snăn êngao kơ phung nai dlăng adŭ, hdră mđung hriăm mbŏ kơ phung hđeh snăn hmei khăng blŭ hrăm hŏng gŏ sang čiăng kơ gŏ sang đru thiăm kơ phung hđeh. Čiăng dôk hlăm êpul đảng jing hơ̆it ai tiê leh anăn bi mklă klei mĭn hŏng klei klă mngač čiăng gĭr ktưn hlăm jih klei hdĭp pô"

Nai mtô klei čih Trịnh Thị Dung - pô mâo lu thŭn mtô hlăm adŭ leh anăn jing nai kiă adŭ 18 thŭn lač snei: Bruă hriăm mbŏ kơ phung hđeh sang hră khăp kơ lăn čar leh anăn thâo săng kơ Đảng kơ klei mĭn cach mang, klei mĭn gĭr ktưn mtô mjuăt mơ̆ng pô jing bruă ngă čiăng êdi, boh nik hŏng phung hđeh sang hră adŭ 12.

"Jing sa čô đảng viên ktuê dlăng hưn mthâo kơ phung êdam êra mŭt hlăm êpul đảng viên, ăt msĕ mơh ksiêm dlăng phung diñu snăn kâo mă klei thâo, tal sa tơdah đru kơ phung hđeh sang hră thâo săng kơ klei mĭn mơ̆ng Đảng ăt msĕ mơh klei khăp kơ ala čar snăn kâo ƀuh phung hđeh gĭr ktưn, gĭr hĭn: tal dua jing kjăp hĭn hlăm lu bruă msĕ si hlăm klei hdĭp leh anăn hriăm hră mơar".

Nai Trần Vĩnh Trung, K'iăng Khua dlăng bruă Đảng, K'iăng khua sang hră gưl 3 Ƀuôn Đon bi mklă: bruă hriăm mbŏ leh anăn bi mŭt hđeh sang hră mŭt Đảng mâo gưl bruă Đảng mđing dlăng. Bruă Đảng amâo tui tiŏ klei bi mni, ênoh ƀiădah rơ̆ng nanao hnơ̆ng jăk.

"Bruă Đảng khăng ktuê dlăng nanao phung đảng viên ti sang hră bi mŭt leh, ba anôk bi kƀĭn ti sang hră gưl prŏng, gưl krah hlăm ala čar. Mơ̆ng klei ksiêm dlăng snăn phung anei đĭ kyar jăk klei thâo pô. Gĭr bi hmô hgŭm hlăm bruă ngă ti sang hră gưl prŏng, leh anăn jing sa hlăm dŭm phung đảng viên êdah êdi mơ̆ng hdră bruă phung êdam êra hlăm dŭm sang hră gưl prŏng.”

Kdriêk Ƀuôn Đon mâo 2 sang hră gưl tlâo. Hlăm wưng anei bi mŭt 18 čô Đảng viên jing hđeh sang hră. Hjăn thŭn hriăm 2023-2024 mâo 6 čô dưi ktưn hưn mŭt đảng. Ngô Cự Tâm - Khua Anôk bruă mkŏ mjing bruă Đảng Ƀuôn Đon brei thâo: grăp thŭn Anôk bruă hriăm mbŏ kđi čar mơ̆ng kdriêk bi hgŭm hŏng bruă Đảng 2 bruă Đảng sang hră gưl 3 čiăng pŏk dŭm adŭ hriăm mbŏ klei thâo săng kơ Đảng ti sang hră. Mjing phŭn phung đảng viên mơ̆ng sang hră gưl tlâo, čiăng kơ leh ruĕ hriăm sang hră, mŭt hlăm klei hdĭp, phung hđeh bi mklă klei mĭn leh anăn klei pô čang hmăng.

"Leh hđeh sang hră hriăm jih gưl tlâo wĭt ti alŭ wăl snăn bruă Đảng jih ai tiê mđing dlăng gĭt gai, dŭm bruă đảng hlăm êpul ăt msĕ mơh êpul bruă đảng nah gŭ mđing dlăng, đru. Mjing klei gĭr kơ phung hđeh lŏ dơ̆ng gĭr čiăng mŭt Đảng "./.

Viết bình luận