Hluê si Lương Bạch Vân, khua kiă kriê êpul gơ̆ng bruă hŏng tač êngao leh anăn mnuih Việt Nam ti ala tač êngao – dhar bruă mặt trận ƀuôn prŏng Hồ Chí Minh, grăp hdră êlan prŏng nao mbĭt hŏng klei găl leh anăn klei lông dlăng leh anăn yuôm bhăn hĭn jing srăng mkŏ mjing wăl mtrŭt mjhar knuă druh mbruă, jhŏng mĭn, jhŏng ngă.

Ñu lač, hlăm klei mkŏ dăp, bi khuăt mnuih mă bruă ară anei knŏng mrâo bi hrŏ, êjai anăn kmeh gơ̆ng jing bi mlih klei mĭn, hdră mă bruă, čiăng kơ grăp čô knuă druh čŏng pô mjing klei hmăng hmưi jing klei sĭt.

“Ară anei dôk dleh dlan, knuă druh mă bruă lu hĭn, êjai klei găl êrô êƀat, êlan klông…adôk dleh dlan, čiăng găn hgao. Jih jang dŭm klei hmăng hmưi dôk jao kơ êpul bruă mrâo, čiăng kơ knuă druh thâo, thơ̆ng kơ bruă. Drei hmăng hmưi, čiăng hmăng, mjing klei anăn jing klei sĭt, čiăng kơ grăp čô srăng kpưn đĭ, gĭr ktưn lu sơnăk. Srăng tla hŏng dŭm bruă anăn kơh dưi kpưn đĭ. Kâo đăo knang drei srăng dưi ngă”.

Luật sư Trương Thị Hòa, K’iăng khua anôk bruă ksiêm dlăng klei mnia mblei ƀuôn prŏng Hồ Chí Minh brei thâo, čiăng kơ knuă druh jhŏng mĭn, jhŏng ngă, bruă klam pô ba anăp jing kmeh gơ̆ng.

“Hdră êlan ară anei khădah adôk mâo lu klei blŭ mdê mdê, ƀiădah lu mnuih dôk hêñ ƀiădah kâo mĭn hlei pô jhŏng ngă srăng ngă, thâo klă srăng jhŏng ngă. Ngă djŏ amâo dih nei ôh. Klă sĭt ƀiădah yuôm bhan jing hdră bhiăn srăng klă mngač. Kyuanăn dŭm hdră mtrŭn mơ̆ng Đảng srăng găl guôp, jing hdră bhiăn. Đảng mâo hdră êlan mbruă, nao êlâo…jih jang ktang ƀiădah hdră bhiăn ka hmao tiŏ jing pap kơ knuă druh mă bruă knŭk kna”.

Răng mgang knuă druh jhŏng ngă amâo djŏ răng mgang kơ klei ngă soh, ƀiădah jing răng mgang klei mbruă kyua boh tŭ dưn mbĭt. Phạm Thị Quyên, k’iăng khua êpul hgŭm mnuih ma brua čar Tây Ninh mñă ktang, hŏng grăp knuă druh công đoàn, ai tiê jhŏng mĭn, jhŏng mă, jhŏng đua klam srăng nao mbĭt hŏng bruă răng mgang boh tŭ dưn kơ mnuih mă bruă.

“ Dŭm hdră êlan anăn srăng jing hdră bhiăn. Ară anei, drei mâo leh hdră bhiăn công đoàn, hlăm anăn bi klă kơ klei dưi, bruă klam mơ̆ng knuă druh công đoàn. Êngao kơnăn ăt mâo dŭm mta răng mgang knuă druh công đoàn êjai ngă bruă klam pô, boh nik hlăm klei bi ala, răng mgang klei dưi leh anăn boh tŭ djŏ hdră bhiăn mơ̆ng mnuih mă bruă. Kyuanăn, anăn jing sa klei găl yuôm bhăn knuă druh công đoàn ară anei mâo.

Mơ̆ng sa čô mă bruă lu thŭn hlăm bruă mặt trận, Nguyễn Hoàng Năng, khua hdăp dhar bruă mặt trận ƀuôn prŏng Hồ Chí Minh lač, hdră êlan anei ăt djŏ leh anăn čiăng êdi, ƀiădah čiăng klă sĭt čiăng mâo klei hrăm mbĭt mơ̆ng dlông truh kơ gŭ.

“Kâo mĭn jing hlăm klei kƀĭn kluôm bruă Đảng srăng bi êdah sa hdră êlan kluôm dhuôm hĭn, čiăng đru kơ knuă druh ngă bruă jhŏng hĭn. Boh nik ară anei knŏng adôk mă Bruă sang čư̆ êa alŭ wăl dua gưl, si srăng ngă bi giăm ƀiădah kăn ênưih giăm lei. Sitôhmô êlâo dih, ƀuôn hgŭm truh kơ kdriêk čar ƀiădah ară anei mơ̆ng ƀuôn hgŭm truh kơ ƀuôn prŏng knŏng jĕ đuč ƀiădah klei găl kăn ênưih lei. Hmăng hmưi hlăm wưng kơ anăp phung bi ala srăng đru kčĕ hŏng Đảng čiăng mâo hdră êlan kluôm dhuôm hĭn.”

Klă sĭt brei ƀuh, khădah mâo leh hdră mtrŭn mrô 73/2023/NĐ-CP kơ bruă răng mgang knuă druh mbruă, ƀiădah ăt adôk mâo klei bi dêč, mplĕ kơ pô mkăn kyua knuă druh hŭi kơ soh, hŭi kơ đua klam. Hdră mtrŭn mrâo mơ̆ng Phŭn bruă kiă kriê bruă knuă kơ ƀuah mkra knuă druh, phung mă bru knŭk kna mâo klei čuăn amâo mâo ƀuah mkra knuă druh ngă djŏ hdră êlan, amâo mâo ƀơ̆ng kơ pô ƀiădah tuôm hŏng klei amâo djŏ jing bruă yuôm bhăn, čiăng bi klă ai tiê răng mgang mnuih jhŏng mĭn, jhŏng ngă, mkŏ mjing klei đăo knang hdră bhiăn čiăng kơ knuă druh hơĭt ai tiê ngă bruă kyua boh tŭ dưn mbĭt../.