Knăm kjuh, mnuih ƀuôn sang ƀuôn Ia Nueng, să Biển Hồ, ƀuôn prŏng Pleiku bi kƀĭn leh ti sang bi kƀĭn ƀuôn čiăng mâo klei blŭ kơ hdră êlan dăp wĭt êpul êya ngă bruă. Mnuih ƀuôn sang mâo klei blŭ kơ bruă dăp wĭt êpul êya ngă bruă. Ksor Kroyh, 64 thŭn, bi êdah klei sa ai hŏng hdră êlan lŏ pŏk mlar să Biển Hồ hŏng klei bi mŭt dŭm boh să Nghĩa Hưng, să Chư Đang Ya (kdriêk Chư Păh) lehanăn să Hà Bầu (kdriêk Đăk Đoa), lehanăn lui gưl ƀuôn prŏng dôk krah wah jing ƀuôn prŏng Pleiku. Tui si ñu, klei bi mlih anei dưi đru kơ mnuih ƀuôn sang mghaih msir djăp mta hră mơar pral hĭn. Siămdah, leh klei bi mŭt mbĭt, ênoh mnuih djuê ƀiă hlăm să mrâo srăng đĭ lu hĭn dua blư̆, truh 47% kyuanăn mđĭ hĭn ênoh knuă druh jing mnuih djuê ƀiă, boh nik pioh đru kơ bruă hlue ngă dŭm klei bhiăn mơ̆ng knŭk kna hŏng mnuih ƀuôn sang. Ksor Kroyh lač:

 “Jing jăk lui êpul bruă dôk krah wah, ya mta bruă mnuih ƀuôn sang čiăng ngă tinăn yơh, amâo lŏ mâo klei gun kpăk ôh. Lŏ tiŏ nao bi kjăp êpul knuă druh bruă hdră bhiăn. Tơdah jing mnuih Jarai snăn bi thâo săng klei Jarai hĭn, mnuih djuê lar jing kjăp hlăm bruă ngă hra mơar, ƀiădah lĕ kƀah klei thâo săng klei blŭ mnuih djuê ƀiă. Kâo čang hmăng lŏ bi tiŏ nao knuă druh jing mnuih djuê ƀiă”.

Čiăng kơ bruă mă klei blŭ mâo boh tŭ dưn, bruă sang čư̆ êa alŭ wăl lehanăn dŭm êpul êya djŏ tuôm ti să Biển Hồ ngă leh klei hâo hưn hlăm lar ƀar. Hră phŭn lehanăn hră klah čŭn kơ bruă dăp wĭt mâo bi lar hlăm hla pŏk, lehanăn mƀlir ti anôk bruă, ti sang bi kƀĭn ƀuôn… đru kơ mnuih ƀuôn sang thâo săng kơ jih klei anăn hŏng klei klă. R’Com H’Myữ – Khua bruă  Mặt trận să Biển Hồ – brei thâo: jih jang bruă mđung asăp hlăm să, lehanăn jih jang hla pŏk yang ƀuôn, bi hâo hưn sơăi, kơ bruă mă klei blŭ anei:

 “Grăp hrue, hlăk 5 h 30 mnĭt wăt aguah lehanăn tlam, loa bi kčăi asăp mơ̆ng sang să mđung nanao. Hŏng klei hưn bi êdah ti anăp, hlăm zalo lehanăn facebook, snăn bruă mặt trận mâo ngă leh truh hŏng ƀuôn sang kơ hdră êlan dŭm gưl klei bi mŭt čar, ƀuôn prŏng Pleiku, lehanăn dŭm să, ƀuôn hgŭm. Ară anei mnuih ƀuôn sang thâo săng leh sơăi jih jang bruă knuă”.

Ăt ti să Biển Hồ, dŭm êpul êya gưl să hlăm kluôm čar Gia Lai êmuh leh mơh klei mĭn mnuih ƀuôn sang kơ bruă bi mŭt mbĭt dŭm boh să, kơ hdră êlan mă bruă, lehanăn bi êdah klă klei bi kƀĭn hlăm ƀuôn sang, amâodah mbha hră truh hŏng grăp boh sang, hŏng mnuih amâo mâo mmông nao ti anôk bi kƀĭn. Ênoh mnuih ƀuôn sang mâo hrŏng ruah, rơ̆ng bi djăp ênŭm.

Êlâo anăn, ti anôk bi kƀĭn tal 19 êpul kiă kriê bruă Đảng čar Gia Lai gưl 16 pŏk mlar, čar Gia Lai bi tŭ ư leh hdră êlan bi hrŏ mơ̆ng 218 êpul êya bruă gưl să trŭn adôk 77 êpul êya. Leh bi jih bruă mă klei blŭ, Êpul gơ̆ng bruă ƀuôn sang gưl să lehanăn anôk bruă Mặt trận ksiêm dlăng bi mklin ba kơ gưl kdriêk lehanăn gưl čar ksiêm dlăng, bi mklă hlăm dŭm klei bi kƀĭn mơ̆ng êpul gơ̆ng bruă ƀuôn sang djăp gưl. Leh êpul mă bruă mrâo dưi mkŏ mjing srăng ngă mtam dŭm knhuang ti anăp bi leh jih bruă knuă druh, amâo mâo lui lĕ hlăm klei dleh kpăk hlăm klei mă bruă hŏng mnuih ƀuôn sang./.