Nai prĭn Trương Thanh Tùng, Khua êpul ksiêm duah kơ mta êa drao mrâo (Anôk bruă ksiêm duah ênuk mrâo Phenikaa), jing nai mtô kơ mta êa drao, sang hră gưl prŏng Phenikaa (Hà Nội), jing pô êdah êdi hlăm êpul phung kreh knhâo mda asei Việt Nam lehanăn hŏng ala tač êngao. Sa hlăm dŭm bruă ñu ksiêm duah kñăm čiăng dưi mkra mjing mta êa drao mrâo hŏng djăp mta klei ruă tưp. Năng mđing hĭn êdi, leh lu thŭn dôk ksiêm duah ti ala tač êngao snăn nai prĭn Trương Thanh Tùng wĭt kơ lăn čar čiăn ghdĭp mda lehanăn ngă bruă. Tui si nai prĭn Trương Thanh Tùng, msĕ si awa Hồ tuôm lač leh: Phung êdam êra jing phung knơ̆ng kơ lăn čar. Kyuanăn, ñu čiăng wĭt kơ lăn čar pô, ba yua jih jang klei pô leh hriăm, lŏ dơ̆ng ksiêm duah, mkra mjing mta êa drao mrâo hrô kơ kháng sinh. Nai prĭn Trương Thanh Tùng, Sang hră gưl prŏng Phenika Hà Nội lač kơ dŭm mta kñăm ksiêm duah dŭm mta êa drao kháng sinh:

“Kâo jing mnuih Việt Nam kơ êdei anăp drei amâo lŏ yua lu đei êa drao kháng sinh ôh. Ăt msĕ hŏng lu klei hrŏng ruah mkăn klei srăng ba yua dŭm mta êa drao mrâo mkra mjing, čiăng kơ asei mlei mnuih ruă amâo mâo bi kdơ̆ng hŏng kháng sinh ôh, dưi dŏng đru kơ mnuih ruă amâo mâo bi kdơ̆ng hŏng êa drao ôh. Klei ksiêm duah tal 2 jing čiăng kơ jih jang ya mta bruă dưi ksiêm duah leh dưi mâo klei tŭ dưn sĭt, boh nik jing hŏng êa drao mdrao klei ruă bŏk brŭ. Tơdah jih jang mta êa drao anei leh mâo mkra mjing srăng đru bi hrŏ klei ruă bŏk brŭ, mdrao klei ruă bŏk brŭ hŏng klei ênưih hĭn, dưi lŏ bi tai klei hdĭp mnuih ruă, lehanăn amâo mâo ba klei jhat kơ asei mlei ôh”.

        Bi hŏng pô mbruă mda asei Nguyễn Thị Ngọc Hà (mâo anăn kreh lŏ iêo jing Hà Myo) mâo nanao klei thâo mjing, bi mguôp kdrăp pĕ tông djuê ana pô hlue hŏng ênhiang Rap lehanăn musik elektronik EDM, ba kdrăp pĕ tông pô jĕ giăm hĭn hŏng hđeh gưl mrâo. Klei Ngọc Hà čang hmăng hĭn jing ba dhar kreh Việt Nam bi hmao hŏng dŭm ala čar dlông rŏng lăn msĕ si klei Awa Hô čang hmăng, čiăng kơ jih jang mnuih thâo kơ Việt Nam mâo klei đĭ kyar ñu kma mbĭt hŏng arăng leh, ƀiădah ăt dôk kriê pioh kjăp snăn dhar kreh djuê ana pô. Blŭ hrăm ti anôk mdah klei mmuiñ xẩm hŏng rap lehanăn muzik elektronik EDM, Nguyễn Thị Ngọc Hà lač:

(2 thŭn hŏng anei leh kâo pioh lu mmông čiăng hriăm dŭm mta ênhiang kưt muiñ djuê ana Việt Nam pô. Hlăm anăn mâo Xẩm, mâo mmuiñ Xoan Phú Thọ, ênhiang klei kưt mmuiñ dhŭng kwar krah, lehanăn lu ênhiang klei kưt mmuiñ mnuih djuê ƀiă ti   Việt Nam. Kâo mơĭt truh leh kơ phung hmư̆, phung dlăng jih jang ênhiang klei kưt mmuiñ anăn, msĕ si kơ klei muiñ Xẩm lehanăn Xoan Phú Thọ snăn lŏ mâo klei mmuiñ “Trò chơi í a trời cho”; mâo wăt ênhiang klei muiñ mnuih djuê ana Mường mâo anăn pia “Đập nàng Khọt”. Klei kâo dôk čang hmăng hĭn jing ba klei kưt mmuiñ ênhiang djuê ana Việt Nam truh hŏng lu mnuih tar rŏng lăn thâo, lehanăn ƀuh mnuih ala tač êngao bi êyŭn bi kdŏ mbĭt mơh tơdah hmư̆ ênhiang klei kưt mmuiñ djuê ana Việt Nam).

          "Ti anôk čiăng tinăn mâo hlăk ai, ya mta bruă dleh dnăn hlăk ai ngă” klei awa Hô mtă mtăn kơ phung hlăk ai jing leh giê knhâo ktrâo êlan kơ Y Xim Ndu, djuê ana M’nông, kdriêk Lắk, čar Đắk Lắk. Leh ruĕ hriăm sang hră gưl prŏng, Y Xim Ndu kut ng nao hlăm bruă hiu čhưn ênguê dlăng kơ lăn mnga êa mơak, tui duah dhar kreh, mnơ̆ng ƀơ̆ng djuê ana pô, bi kriê pioh răng mgang knhuah gru dhar kreh djuê ana pô, boh nik jing dhar kreh čing čhar lăn dap kngư. Ară anei anôk, Y Xim Ndu ngă bruă mâo ba wĭt leh prăk ƀơk h’ĭt nanao kơ 10 čô mnuih mă bruă jing hălk ai hlăm ƀuôn sang pô:

(Kâo čiăng dưn yua jih klei găl mâo hlăm ƀuôn sang pô, kơ čư̆ dliê êa, lehanăn anak mnuih kơ anei. Hŏng klei hmăng hmưi dưi rŭ mjing bruă knuă, srăng mjing klei đăo knang, klei mđĭ ai kơ lu phung mda asei mkăn mđrăm mbĭt bi rŭ mdơ̆ng lăn ala êa djuh pô mâo klei đĭ kyar. Nao ti anôk bi kƀĭn prŏng bruă êdam êra kdlưn hĭn hlue ngă klei awa Hô mtă thŭn 2023, kâo čang hmăng srăng dưi iêo jak jih phung êdam êra mda asei ngă nanao klei ba êlan êlâo, mjuăt bi hriăm pô amâo mâo mdei, boh nik hlăm knhuah dôk dơ̆ng ƀơ̆ng huă, klei thâo săng čiăng hrăm mbĭt mâo klei bi mguôp lehanăn rŭ mdơ̆ng mđĭ kyar ƀuôn sang pô”.

Anei knŏng jing 3 hlăk êbeh 400 čô hlăk ai kdlưn hĭn, mâo dŭm klei thâo bi hmô jăk hlăm klei hriăm mjuăt lehanăn ngă bruă, hlue knhuah mngač Hồ Chí Minh nao ti anôk bi kƀĭn prŏng bruă êdam êra kdlưn hĭn hlue ngă klei Awa Hô mtă tal 7- diñu jing leh phung phung hlăk ai mbruă, mâo klei mĭn knhăk, mâo ai tiê klei čiăng jing prŏng, jhŏng mĭn, jhŏng ngă, jhŏng đua klam, hdĭp mâo ai tiê duh myơr kơ lăn čar./.