Y Bhiu Byă, 68 thŭn, jing k’iăng khua dlăng brưa Đảng, khua ƀuôn Tŏng Jŭ, să Ea Kao, ƀuôn prŏng Ƀuôn Ama Thuôt, ăt jing sa čô ngă lŏ hma mâo kơhưm. Ti kdrêč lăn 1,2 ha mŏng gŏ sang, ñu pla 900 ana kphê, mkŏ mjing war êning rông ŭn, mnŭ, grăp thŭn mâo êbeh 4 ton kphê asăr, hŏng 70 truh 80 êklăk mơ̆ng klei čhĭ ŭn, mnŭ. Ƀuh gru hmô bruă duh mkra rông mnơ̆ng, pla mjing mơ̆ng gŏ sang, lu gŏ êsei mnuih ƀuôn sang tui hriăm.  Bruă hâo hưn mtô mblang kơ mnuih ƀuôn sang bi mlih hdră mĭn bruă ngă ăt mơ̆ng anăn mâo klei găl. Y Bhiu Byă brei thâo:

 “Kâo bi mĭn jih thŭn mă bruă wĭt hŏng ƀuôn sang leh anăn mâo ƀuôn sang ruah ngă k’iăng khua dlăng bruă đảng leh anăn khua ƀuôn. Kâo ktrâo lač leh anăn kriê dlăng mnuih ƀuôn sang pô ti ƀuôn Tơng Jŭ anei mâo klei đĭ kyar, boh nik hlăm bruă mđĭ kyar bruă duh mkra, pla mjing, rông mnơ̆ng. Ară anei mâo klei đĭ kyar, boh nik knŭk kna mâo hdră mtrŭn drei hlue ngă hdră krĭng ƀuôn sang dưi mđĭ. Êngao anăn, snăn hmei lŏ ktrâo lač kơ mnuih ƀuôn sang hlue ngă jăk hdră êlan mơ̆ng Đảng, knŭk kna, mñă kơ anak čô drei amâo dưi dôk ung mô̆ mơ̆ng mda leh anăn bi hgŭm hlăm ƀuôn sang, bi hgŭm jih jang djuê ana čiăng mđĭ kyar lklei hdĭp mnuih ƀuôn sang.”

          Đảng viên Y Tuyên B’krông, jing khua ƀuôn Dray Hling, să Hòa Xuân, ƀuôn prŏng Ƀuôn Ama Thuôt. “Lač mbĭt hŏng bruă ngă”, ñu bi hmô mđĭ kyar bruă duh mkra gŏ sang. Mtrŭt mjhar mnuih ƀuôn sang hlăm ƀuôn bi lông mkra mjing, đru mguôp mkŏ mjing krĭng ƀuôn sang mrâo. Hlue si Y Tuyên, hlăm bruă hâo hưn mtô mblang, mtrŭt mjhar mnuih ƀuôn sang ngă hdră êlan mơ̆ng Đảng, knuă druh, đảng viên brei thâo gĭr.

           “Kâo jing sa čô mnuih đảng viên, hlăm bruă hâo hưn mtô mblang kơ mnuih ƀuôn sang, boh nik bruă mkŏ mkra krĭng ƀuôn sang mrâo. Êlâo hĭn jing bruă mkra êlan klông, mâo prăk mơ̆ng gưl dlông đru kơ mnuih ƀuôn sang pô mkra êlan čiăng găl kơ bruă găn êrô. Kâo pô snăn ngă êlâo, kyua kâo jing 1 čô đảng viên, leh anăn snăn dŭm gŏ êsei ăt hlue ngă. Hmei ăt mtrŭt jih jang mguôp prăk čiăng mkra êlan leh anăn diñu ăt mguôp mbĭt djăp ênŭm. Kâo ăt hâo hưn mtô mblang kơ grăp čô mnuih, kyua 1 čô đảng viên, kâo ăt hgŭm bruă ala ƀuôn, mđĭ kyar bruă duh mkra gŏ sang, boh nik hlăm bruă pla mjing, rông mnơ̆ng. Kâo ăt jing pô ba anăp kơ mnuih ƀuôn sang, grăp thŭn mă brei êlâo hbâo pruê kơ mnuih ƀuôn sang, 1 thŭn ăy 20-30 ton. Hŏng bruă jing đảng viên, jing pô ba anăp ăt đru kơ mnuih ƀuôn sang pô.”

Ƀuôn prŏng Ƀuôn Ama Thuôt, čar Dak Lak ară anei mâo 376 êbâo čô mnuih ƀuôn sang, hlăm anăn mâo 15.140 đảng viên. Đảng viên mnuih djuê ƀiă êbeh 1000 čô, hlăm anăn lu jing mnuih Êđê. Lu phung đảng viên Êđê ară anei kƀĭn ti 33 alŭ ƀuôn, hlăm anăn 15 čô jing khua dlăng bruă Đảng, 19 čô jing K’iăng khua bruă đảng, 31 jing hlăm êpul hgŭm.

  Hlue si Trần Vũ Cường -  Khua Anôk bruă mkŏ mjing bruă Đảng ƀuôn prŏng Ƀuôn Ama Thuôt, hlăm dŭm thŭn êgao, bruă klam mơ̆ng phung đảng viên mnuih djuê ƀiă hdĭp mda ti dŭm ƀuôn sang mđĭ lar bruă klam ba anăp bi hmô hlăm grăp bruă ngă. Dŭm đảng viên jing phung hâo hưn mtô mblang êdah êdi, mtrŭt mnuih ƀuôn sang ngă jăk hdră êlan mơ̆ng Đảng, hdră êlan, hdrăb bhiăn mơ̆ng Knŭk kna.  Hlăm anăn, êdah êdi jing dŭm hdră bi lông ktưn mkra mjing, bi hgŭm hŏng bruă alŭ wăl mkŏ mjing klei kuôl kă hlăm bruă mkŏ mjing klei hdĭp dhar kreh ƀuôn sang, klei êđăp ênang, krĭng ƀuôn sang mrâo, răng mgang wăl hdĭp mda.

Trần Vũ Cường brei thâo, hlăm wưng kơ anăp, Ƀuôn prŏng Ƀuôn Ama Thuôt, čar Dak lak brei thâo, kñăm mđĭ lar hĭn bruă klam ba anăp bi hmô mơ̆ng đảng viên mnuih djuê ƀiă, bruă Đảng ƀuôn prŏng srăng lŏ dơ̆ng pŏk ngă hdră kčah hriăm mbŏ gưl bruă Đảng, phung khua dlăng bruă đảng, K’iăng khua bruă Đảng.

 “Bruă Đảng ƀuôn prŏng mđing kơ bruă mtô bi hriăm kđi čar, klei mĭn kơ knuă druh bruă đảng, phung Khua bruă Đảng, K’iăng khua bruă Đảng leh anăn phung đảng viên hlăm dŭm êpul bruă đảng, boh nik dŭm bruă đảng ti krĭng mnuih djuê ƀiă. Grăp gưl, hmei mâo hdră kčah mtô bi hriăm, mđĭ ktang čung ba mnuih ƀuôn sang ngă jăk hdră êlan mơ̆ng Đảng, hdră bhiăn knŭk kna”

Khua gĭt gai Hồ Chí Minh tuôm bi mklă, “Bruă Đảng jing tur knơ̆ng mơ̆ng Đảng, bruă Đảng jăk snăn djăp bruă srăng jăk”. Phung đảng viên hlăm dŭm ƀuôn sang Êđê ti ƀuôn prŏng Ƀuôn Ama Thuôt, čar Dak lak dôk ngă tŭ dưn klei Awa Hồ mtô./.