Hlăm adŭ mă asăp mơ̆ng Sang mđung asăp blŭ Việt Nam jưh dôk ti lăn dap kngư, đŏk blŭ mngač jăk mơ̆ng H’Nêč Ênuôl – sa čô đảng viên mda asei, pô ngă bruă mđung asăp, dăp mkra hdră mđung asăp klei Êđê – ăt kwang nanao hlăm grăp hrue. Hŏng hdră mđung asăp, dŭm hdră êlan mơ̆ng Đảng, Knŭk kna truh leh hŏng dŭm boh ƀuôn tai kbưi, anôk ngă bruă mđung asăp jing leh kdrông yuôm bhăn mkŏ klei mnuih ƀuôn sang djăp djuê ana jưh knang hŏng Đảng. H’Nêč lač:

“Hriê kơ prŏng hlăm ƀuôn sang, ƀai hĭn mơh kâo thâo săng klei blŭ mơ̆ng djuê ana pô jing yuôm bhăn snăn. Grăp klei mrâo, klei yăl dliê mâo hmei gĭr blŭ hrăm hŏng klei blŭ ênưih thâo săng, čiăng kơ ênưih thâo săng hŏng hdră êlan mơ̆ng Đảng, Knŭk kna truh hŏng ƀuôn sang. Mơ̆ng hrue mâo mŭt hlăm  Đảng, kâo ƀuh bruă klam mơ̆ng mnuih ngă bruă klei mrâo, ngă bruă mđung asăp blŭ – lehanăn myưng m’ang êdi mâo đru mguôp klei mnuih ƀuôn sang jưh knang kơ Đảng”.

Tơdah klei blŭ jing kdrông mkŏ klei jưh knang, snăn dhar kreh jing phŭn agha kơ klei bi mguôp. Ti ƀuôn hgŭm Čuôr Dăng, čar Daklak, H’Pha Ayŭn – đảng viên mda asei, jing khua bruă êdam êra ƀuôn hgŭm, ară anei jing leh pô truăn hlăm adŭ bruă Đảng ƀuôn hgŭm – mâo nanao ai tiê hur har mtrŭt mjhar phung êdam êra kriê pioh knhuah gru dhar kreh djuê ana pô, lehanăn mguôp mbĭt hŏng bruă mđĭ kyar bruă duh mkra ala ƀuôn. H’Pha brei thâo:

Ƀuôn hgŭm Čuôr Dăng mâo mkŏ mjing leh dua êpul hgŭm tông čing čhar lehanăn klei duê kơ phung êdam êra, čiăng kơ phung êdam êra thâo săng hĭn, čiăng kơ diñu thâo săng hĭn kơ dhar kreh, kơ klei duê djuê ana pô. Jih jang phung êdam êra nao mŭt hlăm êpul hgŭm anei thâo sơăi tông čing, thâo kơ klei duê  djuê. Mơ̆ng anăndah nao hlăm dŭm anôk bi hgŭm, đru bi lar knhuah gru dhar kreh djuê ana, truh hŏng jih jang mah jiăng, êdam êra hlăm čar Daklak.

Mbĭt hŏng bruă kriê pioh knhuah gru dhar kreh, phung mda asei dŭm boh ƀuôn ti Daklak lŏ dơ̆ng mâo êpul ba anăp nao hlăm bruă bi mlih mrô – sa mta bruă phŭn mơ̆ng Đảng, Knŭk kna hlăk dôk ktuh êyuh hlue ngă. Y Lê Pas Tơr – K’iăng khua bruă êdam êra čar Daklak – brei thâo, phung mda asei mnuih djuê ƀiă amâo mâo djŏ thâo jưh knang kơ Đảng ƀiădah lŏ thâo ba anăp hlue ngă bruă čuăn mrâo, msĕ si đru mnuih ƀuôn sang thâo yua bruă ngă hră mơar hŏng online, mkŏ bruă hrui blei boh mnga bruă lŏ hma hŏng hlăm klei bi mnia mblei hŏng điện tử.

“Hmei mkŏ mjing leh dŭm êpul đru kơ bruă sang čư̆ êa dua gưl, ktrâo atăt mnuih ƀuôn mă bruă hŏng mbah online. Dŭm êpul bruă kăp đru hlăm kdrăp mrô ngă leh bruă hŏng klei tŭ dưn ti dŭm krĭng taih kbưi. Mơ̆ng anăn, phung mda asei, mâo đru mguôp leh yuôm bhăn hlăm bruă mkŏ mkra krĭng ƀuôn sang mrâo, ƀuôn prŏng dhar kreh lehanăn mđĭ kyar kjăp”.

Păn kjăp ai tiê, răng kriê kjăp knhuah gru dhar kreh, lehanăn čŏng thâo ñŭ kma, êpul đảng viên mda asei mnuih djuê ƀiă ti Daklak hlăk knư̆ hrue knư̆ bi êdah bruă klam mjing kdrông mkŏ plah wah Đảng lehanăn mnuih ƀuôn sang. Diñu yơh jing mnuih ba hdră mtrŭn mơ̆ng Đảng truh hŏng klei hdĭp ƀuôn sang, đru bi rŭ mdơ̆ng ƀuôn sang mdrŏng sah, kjăp ktang, lehanăn mđĭ kyar kjăp mbĭt hŏng lăn čar./.