Gŏ sang ayŏng Điểu Đên jing sa hlăm 60 gŏ sang mnuih djuê ƀiă ti ƀuôn Bu Lum, să Quảng Trực, čar Lâm Đồng dôk hlăm wăl sang mrâo mơ̆ng knŭk kna rŭ mdơ̆ng. Klei mơak mơ̆ng ayŏng mbĭt hŏng mnuih ƀuôn sang dưi bi mđrĭng hŏng dua tơdah sang mrâo mbĭt anôk bruă pui kmlă, sang hră djăp ênŭm.

Ayŏng Điểu Đên yăl dliê, pui kmlă hlăm sang mrâo ktang leh anăn hơĭt kjăp, ƀiă snăk tuôm hŏng luč pui kmlă kyuanăn ayŏng yua 2 êklăk prăk mâo knŭk kna mđup brei čiăng blei gŏ êsei êran hŏng pui kmlă, gŏ drông êa hlơr hŏng pui kmlă. Ară anei ung mô̆ ayŏng srăng mkiêt mkriêm prăk čiăng blei thiăm huôm êăt, âmly leh anăn ñu hmăng hmưi dŭm krĭng mnuih djuê ƀiă mkăn ti să mkăn ăt dưi mâo msĕ sơnei. Ayŏng Điểu Đên brei thâo:

"Kâo ƀuh Đảng, Knŭk kna mđing dlăng kơ mnuih ƀuôn sang ti knông lăn lu êdi, hlăm ƀuôn anei mnuih buôn sang hơ̆k mơak êdi, mnuih lui jih sang dôk kbưi brei wĭt dôk tinei kyua tinei jăk siam hĭn, mâo pui kmlă găl hĭn. Kâo čang hmăng knŭk kna ksiêm dlăng, mđing tal êlâo kơ dŭm ƀuôn mkăn, dŭm gŏ êsei ka mâo pui kmlă čiăng kơ digơ̆ ăt dưi dưn pui kmlă msĕ si tinei mơh".

Ti djiêu bon Bu Lum jing bon Bu Dắr. Mơ̆ng leh mâo pui kmlă ala čar, lu boh sang čŏng mdưm ăngpul pui leh anăn camera mđing kơ nah êlan, mrâo mtrang mngač kơ klei êrô êbat tơdah mlam adiê hjan hlĭm, angĭn êbŭ, ăt hmao đru kơ mnuih găn êrô tơdah mâo klei truh leh anăn wăt gang mkhư̆ klei tlĕ dăp Bruă kriê dlăng ƀuôn mơ̆ng Khua ƀuôn Bu Dắr- Vũ Minh Tiến kyua anăn ƀiădah ăt găl ênưih, tŭ dưn hĭn êdi:

"Pui kmlă truh snăn mlih mrâo lu kơ krĭng knông lăn, mnuih ƀuôn sang hơ̆k kdơ̆k. Hlăm ƀuôn anei hlăm brô 2/3 boh sang yua sa ai-tơ pioh krih êa sĭt truh yan kyua pui kmlă 3 mtlai yua găl hĭn mkă hŏng yua êa pui. Pui kmlă mtrang mngač đru bi hrŏ klei bi drăm hlăm êlan klông, lu gŏ êsei lŏ dưm camera čiăng gang mkhư̆ klei tlĕ dăp".

Bruă anôk bruă pui kmlă ala čar dưi duh bi liê truh ti krĭng knông lăn mjing leh klei jăk găl čiăng kơ êpul hluê ngă tŭ dưn bruă klam kriê dlăng, răng mgang klei dưi kiă kriê, klei êđăp ênang knông lăn ala čar. Hluê si Thượng tá Phan Văn Khá, Pô ngă bruă kđi čar Kđông kahan răng mgang ƀăng jang knông lăn Bu P’Răng, kdrăp pui kmlă dưi mkra mđĭ, bi kjăp lehanăn krơ̆ng kjăp hdră mă bruă hơĭt kjăp mkăp leh boh tŭ kơ hdră gĭt gai, ktrâo lač, rơ̆ng klei hâo hưn mtô mblang hlăm klei hluê ngă bruă klam. Thượng tá Phan Văn Khá lŏ brei thâo.

"Klei ktŭng ba pui kmlă kơ krĭng taih kbưi đru mđĭ kyar leh bruă duh mkra lehanăn răng mgang klei êđăp ênang. Hŏng mnuih ƀuôn sang, tơdah mâo pui kmlă snăn mâo klei găl ba yua dŭm kdrăp mnơ̆ng, klei kreh knhâo čiăng mđĭ kyar bruă duh mkra, bi hơĭt klei hdĭp. Hŏng knuă druh lĭng kahan anôk bruă, pui kmlă đru hluê ngă jăk bruă klam bruă răng mgang ala čar, knông lăn, mtrŭt mđĭ klei mlih mrô hlăm klei ngă bruă.”

Trần Minh Huy, khua kiă kriê anôk bruă pui kmlă Tuy Đức, knơ̆ng bruă êa săng, êa pui Lâm Đồng (knơ̆ng êa săng êa pui krĭng kwar Dhŭng), brei thâo ti alŭ wăl knông lăn, krĭng taih kbưi, krĭng knông lăn. bruă mkăp pui kmlă hŏng klei êđăp ênang lehanăn nanao amâo mâo djŏ knŏng pioh kơ bruă mđĭ kyar klei duh mkra ala ƀuôn, ƀiădah lŏ đru mbĭt hŏng bruă sang čư̆ êa, lehanăn êpul bruă djŏ tuôm păn kjăp klei răng mgang lăn čar, klei êdăp ênang, rŭ mdơ̆ng alŭ wăl knông lăn hơĭt kjăp.

"Tuy Đức jing alŭ wăl knông lăn anăn anôk bruă pui kmlă dleh dlan êdi ƀiădah kyua mâo klei uêñ mĭn duh bi liê anăn truh kơ ară anei dưi krơ̆ng kjăp phŭn pui kmlă, 99% alŭ wăl mâo pui kmlă. Dŭm hdră bruă bi hơĭt klei hdĭp mnuih ƀuôn sang ti knông lăn jing hdră bruă phŭn mơ̆ng Knŭk kna leh anăn tơdah pŏk ngă snăn mâo anôk bruă pui kmlă, brei rơ̆ng mkăp pui kmlă kơ mnuih ti krĭng knông lăn, rơ̆ng dưi mkăp pui kmlă kơ bruă răng mgang klei êđăp lăn čar”.

Msĕ snăn mơh, pui kmlă klă sĭt đru leh sa kdrêč hlăm klei mđĭ kyar bruă duh mkra, bi hơĭt klei hdĭp mda, rơ̆ng kjăp klei êđăp ênang krĭng taih kbưi, krĭng knông lăn să Dak Wil, čar Lâm Đồng. Dŭm thŭn êgao, pui kmlă ala čar jing leh boh kdrŭt yuôm bhăn mtrŭt mđĭ kyar bruă duh mkra ti alŭ wăl. Phŭn mkăp pui kmlă hơĭt kjăp đru kơ mnuih ƀuôn sang jhŏng duh bi liê masin, kdrăp krih êa mkiêt mkriêm, ba yua klei kreh knhâo hdră mnêč hlăm bruă mkra mjing, mđĭ hnơ̆ng boh mnga leh anăn hnư jăk dŭm mta ana pla mjing phŭn msĕ si kphê, tiu, durian leh anăn lu mta ana ƀơ̆ng boh. Khua Bruă sang čư̆ êa să Dak Wil Hoàng Văn Tám bi klă:

"Alŭ wăl bi myuôm klei đru mguôp mơ̆ng bruă pui kmlă hlăm bruă duh bi liê mkra mđĭ kdrăp pui kmlă ti să knông lăn Dak Wil, bi hrŏ êwang kpleh plah wah krĭng ƀuôn sang să hŏng dŭm alŭ wăl mkăn. Pui kmlă rơ̆ng phŭn mkăp pui kmlă hơĭt kjăp kơ bruă duh mkra hdĭp mda, bi mlih klei jing krĭng ƀuôn sang, mjing klei găl kơ alŭ wăl ngă kdrăp mtrang mngač, mnuih ƀuôn êrô êbat găl ênưih, rơ̆ng klei êđăp ênang êlan klông, răng mgang klei êđăp ênang, gang mkhư̆ phunug ngă soh.”

Kdrăp pui kmlă amâo djŏ knŏng mkăp kơ klei hdĭp mda, bruă duh mkra mơ̆ng mnuih ƀuôn sang, ƀiădah lŏ rơ̆ng phŭn mkăp pui kmlă kơ dŭm anôk dôk mklin sa anôk, dŭm kđông kahan răng mgang knông lăn lehanăn êpul êya dôk hruê mlam ngă bruă klam răng mgang krĭng knông lăn. Boh nik, dŭm hdră bruă bi hơĭt klei hdĭp mda ala ƀuôn krĭng knông lăn jing hdră êlan prŏng mơ̆ng Knŭk kna; hlăm anăn, anôk bruă pui kmlă dưi bi mklă jing sa hlăm dŭm klei găl phŭn čiăng kơ mnuih ƀuôn sang dôk êđăp ênang, mđĭ kyar bruă duh mkra.