Boh sang gŏ êsei aduôn H’Er, ƀuôn Ting Wel Đơm, să Dak Nia, bŏ hŏng klei hơ̆k m’ak hlăk jih jang mnuih hlăm gŏ sang bi kuh kŭm ênŭm ênap. Djă đĭng kpiê čeh jak iêu phung tuê, ñu brei thâo, kpiê čeh amâo djŏ knŏng yua hlăm dŭm knăm m’ak mơ̆ng gŏ sang, ƀuôn sang, ƀiădah lŏ jing mta mnơ̆ng mkăp kơ tuê hiu čhưn ênguê.

Kâo mtô anak kâo tŭk knă kpiê čeh lehanăn kâo mtô kơ mtâo mniê kâo. Êdei anei tơdah kâo mduôn khua amâo dah amâo lŏ dôk hdĭp snăn mtâo mniê kâo srăng bi hrô kâo knă kpiê čeh.

Giăm wăl krah ƀuôn prŏng Gia Nghĩa, să Dak Nia mâo čar Dak Nông mkŏ mkra jing anôk hiu čhưn ênguê êpul êya mơ̆ng mnuih djuê ana Mông Mạ. Mbĭt hŏng bruă mtrŭt mjhar mnuih ƀuôn sang krơ̆ng kjăp, mđĭ lar dhar kreh djuê ana mơ̆ng đưm msĕ si tông čing čhar, krŭ wĭt knăm m’ak, mkra ƀuôn bruă, să mkŏ mjing leh 10 êpul bruă pơ̆k mñam lehanăn 1 êpul hgŭm tŭk knă kpiê čeh, mjing dŭm mta mnơ̆ng jăk êdi mđĭ hnư hrui wĭt kơ mnuih ƀuôn sang.

Hŏng dŭm klei bi mlih pral, thŭn 2018, Dak Nia jing să tal êlâo ti ƀuôn prŏng Gia Nghĩa bi leh hdră mkŏ mkra krĭng ƀuôn sang mrâo. Să lŏ mkra gru hmô mơ̆ng čar hlăm hdră êpul êya hgŭm kngan răng mgang wăl hdĭp mda ti ƀuôn Phai Kol Pru Đăng, lar bra hdră bi mdoh krĭng ƀuôn sang dôk, mđing truh kơ hdră mkŏ mkra krĭng ƀuôn sang mrâo kdlưn hĭn. Ayŏng Y Brôn, khua anôk bruă mặt trận ƀuôn Phai Kol Pru Đăng, hơ̆k kdơ̆k brei thâo:

Bi mlih êlâo hĭn jing mâo êlan siam, êdeh êdâo găn êrô, mâo pui kmlă, mâo êa doh, hriăm hră truh anih, snag hră prŏng siam, ruă dua mâo sang êa drao gŭn. Kơ hdră duh mkra ăt bi mlih mơh, mkra kphê ksu hluê hdră mrâo. Lehanăn mă bruă djuê ana mơ̆ng đưm čiăng lŏ mâo thiăm hnư hrui wĭt.

K’Srai, Khua anôk bruă mặt trận să Dak Nia brei thâo, kluôm să mâo 12 alŭ, ƀuôn, hŏng 14 djuê ana ayŏng adei hdĭp mda. Ênoh mnuih djuê ƀiă mâo 40% ênoh mnuih. Mnuih ƀuôn sang djuê ana ƀiă mâo klei hgŭm mguôp hrăm mbĭt mđĭ kyar bruă duh mkra – ala ƀuôn, klei hdĭp trei mđao hĭn. Bruă Đảng, sang čư̆ êa, mnuih ƀuôn sang dôk mđĭ kyar bruă duh mkra gĭr mđĭ hnư hrui wĭt kah knar grăp čô mâo êbeh 60 êklăk prăk lehanăn truh thŭn 2025 să amâo lŏ dôk gŏ êsei giăm ƀun. K’Srai, brei thâo:

Mnuih ƀuôn sang thâo bi đru hlăm klei hdĭp, bruă mă, bi hgŭm mguôp mđĭ kyar bruă duh mkra – ala ƀuôn. Kâo m’ak êdi kyua klei hdĭp ƀrư̆ hruê ƀrư̆ đĭ kyar.

Klei gĭr mơ̆ng mnuih ƀuôn sang dŭm djuê ana ti Dak Nia đru mguôp mbĭt hŏng dŭm alŭ wăl mkăn mkŏ mkra ƀuôn prŏng Gia Nghĩa bi leh hdră mkŏ mkra krĭng ƀuôn sang mrâo hlăm thŭn 2022. Têt truh yan mnga hriê, ti ktuê êlan đĭ kyar, mnuih ƀuôn sang Dak Nia ƀrư̆ hruê ƀrư̆ hơ̆k kdơ̆k sa ai mkŏ mkra klei hdĭp jăk siam hĭn./.