Dôk hlăm klei bi mguôp hŏng êpul bruă Đảng 4, hlăm êpul bruă Đảng sanh hră gưl 3 Hoàng Hoa Thám, kdriêk Lệ Thủy, čar Quảng Bình jing klă êdi. Pŏk hlăm klei bi kƀĭn, phung Đảng viên bi yăl dliê kơ boh klei Awa Hô. Wưng leh êgao, hlăm klei dôk bi kƀĭn hlăm êpul bruă Đảng, dŭm êpul bruă đảng hlăm sang hră gưl 3 Hoàng Hoa Thám bi yăl dliê kơ dŭm boh hklei kơ Awa Hô pioh tui hriăm lehanăn hlue ngă. Hlăm anăn ktrâo klă ya mta klei adôk awăt hlăm phung knuă druh, đảng viên čiăn lŏ mâo hdră mghaih msir, mkra wĭt lehanăn ngă klei bi hmô, mnuih jăk, bruă jăk. Nai Nguyễn Thị Thương, hlwm êpul bruă đảng mrô 4, hlăm êpul bruă Đảng sang hră gưl 3 Hoàng Hoa Thám, kdriêk Lệ Thủy brei thâo, hlăm grăp blư̆ nao ti anôk bi kƀĭn êpul bruă Đảng, phung đảng viên mprăp klei bi yăl dliê kơ Awa Hô hŏng phung đảng viên hlăm êpul bruă Đảng. Anăn yơh jing klei yăl dliê kơ “Êa hlơr, êa êăt”, yăl dliê kơ “Hrue mmông jing yuôm bhăn snăk”, yăl ldiê kơ “Sa mngan bur mbha mtlâo”, “Sa blah ao mđao”, “Dua ƀĕ kiê kngan”...  Mơ̆ng leh dơ̆ng ngă bruă anei, klei bi mguôp hlăm êpul bruă Đảng mtluk mtlak hĭn.

“Êlâo kơ klei bi mguôp hlăm êpul bruă Đảng, snăn hmei mâo dŭm hdruôm hră, dŭm klei bi yăl dliê kơ dŭm klei pioh tui hriăm lehanăn hlue ngă tui si knhuah mngač Hồ Chí Minh. Mơ̆ng dŭm klei bi yăl dliê anăn, tui mă dŭm klei hriăm kơ grăp čô đảng viên, kơ êpul bruă Đảng. Ăt mơ̆ng anăn mơh mă klei hriăm pioh yua kơ klei hdĭp, kơ yang ƀuôn hlăm klei mă bruă”.

        Êpul bruă Đảng bộ wăl krah đang lŏ hma Lệ Ninh, kdriêk Lệ Thủy, čar Quảng Bình mâo giăm 500 đảng viên bi mguôp ti 12 êpul. Grăp mlan, gưl bruă Đảng mkŏ mjing 1 klei bi trông, ruah dŭm klei yăl dliê jăk kơ Awa bi yăl dliê kơ phung đảng viên mđing hmư̆ hlăm anôk bi kƀĭn grăp wưng. Nguyễn Thanh Hải, Khua bruă Đảng êpul anôk dôk Liên Cư, wăl krah đang lŏ hma Lệ Ninh, kdriêk Lệ Thủy, čar Quảng Bình brei thâo, jih jang mnuih hlăm êpul bruă đảng jing mnuih ngă lŏ hma sơăi, kyuanăn bruă hâo hưn hlue si hdră mtrŭn mrô 05 mơ̆ưng phŭn bruă kđi čar brei bi thâo săng, klă mngač, lehanăn đru kơ phung đảng viên srăng dưi ba yua kơ klei hdĭp, klei ngă bruă. Hlăm klei bi mguôp giăm anei, mâo đa đa đảng viên nao kƀŏn êla, ngă hmăi amâo jăk hŏng klei bi kƀĭn bruă Đảng. Mmông anei, Nguyễn Thanh Hải, khua bruă Đảng yăl dliê kơ Awa Hô: “Hrue mmông jing yuôm bhăn êdi -10 mnĭt ăt jing hnui leh”. Mơ̆ng klei bi yăl dliê anăn, dŭm gưl bruă Đảng čiăng kơ phung đảng viên čŏng bi ksiêm wĭt, thâo yua hrue mmông mơ̆ng grăp čô, mnuih lehanăn thâo mpŭ kơ hrue mmông mnuih mkăn.

“Đảng viên ngă bruă hlăm grăp mlan, grăp gưl grăp thŭn lehanăn knhal jih thŭn mâo klei bi mguôp, lehanăn ksiêm wĭt ba yua hlăm klei hdhnơ̆ng tŭ dơ̆ng mơ̆ng grăp čô đảng viên. Čiăng ngă jăk klei yăl dliê kơ Awa lehanăn pioh ba yua kơ klei hdĭp, hlăm mnuih ƀuôn sang tal êlâo jing mơ̆ng phung đảng viên mơ̆ng klei bi mguôpp hlăm êpul bruă đảng, ruah dŭm mta klei yăl dliê kơ jăk mơ̆ng awa, ngă mnơ̆ng pioh tui hriăm lehanăn hluê ngă, mơ̆ng anăn ktrâo klă ti jing klei djŏ, ti jing klei soh hlăm phung knuă druh, đảng viên. Klei hmei mĭn jing mơ̆ng bruă điêt, ba yua hlăm klei hdĭp mơ̆ng grăp čô đảng viên, thâo săng mơ̆ng bruă điêt mtam”.

        Bruă Đảng kdriêk Lệ Thủy, čar Quảng Bình mâo truh 38 êpul bruă Đảng knơ̆ng hlăm anăn mâo 19 êpul bruă đảng bi mguôp điêt mơ̆ng 11.800 čô đảng viên. Hlue ngă asăp mtrŭn mrô 05 kơ klei hriăm lehanăn hlue ngă knhuah mngač Hồ Chí Minh, truh ară anei 100% êpul bruă đảng hlăm alŭ wăl tui ngă klei yăl dliê kơ awa, klei bi hmô mnuih jăk, bruă jăk hlăm anôk bi kƀĭn êpul bruă đảng. Lê Vĩnh Thế, khua bruă Đảng kdriêk Lệ Thủy, čar Quảng Bình brei thâo, klei yăl dliê kơ awa Hồ mâo leh klei bi mlih hlăm klei bimguôp êpul bruă Đảng, mơ̆ng anăn mjing klei bi mlih jăk hlăm grăp čô knuă druh,  đảng viên lehanăn mnuih ƀuôn sang. Jih jang klei yăl dliê kơ Awa mâo leh klei lar đĭ, čiăng kơ đảng viên, mnuih ƀuôn sang tui hriăm, bi êdah bruă klam pô hlăm bruă knuă lehanăn knhuah hdĭp:

“Hmei ba klei hriăm, lehanăn tui ngă hlue si knhuah mngač Hồ Chí Minh hlăm hdră mtrŭn mơ̆ng klei bi kƀĭn prŏng Đảng dŭm gưl lehanăn bi mguôp hŏng dŭm bruă kđi čar ti alŭ wăl msĕ si hlăm: Bruă msir klei ư̆ êpa, bi hrŏ klei ƀun knap, bruă ruh mgaih anôk ala, bruă mkŏ mkra krĭng ƀuôn sang mrâo. Lệ Thủy ăt mkŏ mjing 5 ênoh čuăn bi djŏ hŏng knhuah mngač Hồ Chí Minh, mdưm hlăm êpul bruă Đảng, čiăng kơ grăp čô đảng viên tui hriăm. Mbĭt hŏng bruă klam hlăm klei thâo bi hmô mơ̆ng pô djă akŏ, snăn đảng viên thâo bi hmô, hŏng mta kñăm jing đảng viên nao êlâo, mnuih ƀuôn sang tui tluôn, mđĭ bi lar ai ktang mơ̆ng mnuih ƀuôn sang hlăm alŭ wăl”./.