Mơ̆ng akŏ thŭn truh ară anei, čar Dak Lak čih yap 1.518 čô êngoh bi ƀlĕ êrah ti 14 anôk mâo klei ruă tưp, đĭ 154% mkă hŏng wưng anei thŭn 2025. Năng mđing, knŏngg hlăm hruê kăm êgao mâo leh êbeh 210 čô êngoh bi ƀlĕ êrah brei nao đih mdrao ti dŭm anôk mdrao mgŭn ti alŭ wăl. Dŭm alŭ wăl čih yap lu ênoh mnuih ruă hĭn mâo ƀuôn hgŭm Tuy Hòa, Ƀuôn Ama Thuôt leh anăn dŭm să Phú Hòa, Đồng Xuân, Sông Hinh, Krông Ana, Ea Sup, Ea H’leo...

Aê mdrao Lê Phúc, K’iăng Khua Anôk bruă ksiêm dlăng klei ruă tưp čar Dak Lak (CDC Dak Lak), brei thâo ti anăp ênoh mnuih ruă hlăm dŭm hruê giăm anei đĭ lu, anôk bruă dôk bi hgŭm hŏng êpul bruă mdrao mgŭn nah gŭ ti dŭm să, ƀuôn hgŭm pŏk ngă mđrăm mbĭt dŭm hdră msir gang mkhư̆ , mdrơ̆ng hŏng klei ruă êngoh bi ƀlĕ êrah.

Hlăm anăn, mđing mtrŭt mđĭ hdră mtô mblang, mđĭ klei thâo săng mơ̆ng mnuih ƀuôn sang kơ bruă bi mdoh wăl hdĭp mda, lui hĕ anôk kơ kêč ƀloh kčeh mđai; mbĭt anăn bi hgŭm hŏng dŭm anôk bruă mdrao mgŭn alŭ wăl, anôk mdrao să, ƀuôn hgŭm mkŏ mjing krih êa drao, mdjiê hluăt lŏk ti dŭm anôk mâo klei ruă kñăm mkhư̆ klei ruă tưp lar, hriăm mjuăt êlam kơ êpul mdrao mgŭn ti anôk bruă kơ klei gang mkhư̆ klei ruă êngoh bi ƀlĕ êrah.

“Hmei mđĭ hĭn leh anăn ngă pral bruă gang mkhư̆ , bi kdơ̆ng hŏng véc tơ, jing ksiêm dlăng, msir mgaih kêc̆ ƀloh, hluăt lŏk, kêc̆ kơ êpul bruă mdrao mgŭn nah gŭ ti dŭm Sang êa drao să, ƀuôn hgŭm. Mơ̆ng anăn, mđĭ klei thâo diñu čiăng mkăp djŏ hŏng klei đăo knăl klei huĭ hyưt hlăm grăp alŭ wăl, čiăng ngă jăk bruă đăo tĭng ăt msĕ mơh tŭ dưn hĭn hlăm bruă gang mkhư̆ klei ruă êngoh bi ƀlĕ êrah".

Mơ̆ng akŏ thŭn truh kơ ară anei, kluôm čar Gia Lai mâo leh 1.813 čô ruă/ 1 čô djiê, mkă hŏng wưng anei thŭn 2025, ênoh mnuih ruă đĭ 914 čô, kñăm pral dưi ksiêm dlăng le hanăn gang mkhư̆ klei ruă tưp êngoh bi ƀlĕ êrah đĭ lu, Anôk bruă ksiêm dlăng klei ruă tưp čar mkŏ mjing leh êpul ngă bruă pŏk hdră ktuê dlăng boh klei ruă êngoh bi ƀlĕ êrah, hdră gang mkhư̆ leh anăn msir mghaih anôk mâo klei ruă ti dŭm să phŭn, čih yap mâo lu mnuih ruă hlăm hruê kăm êgao.

Klă klơ̆ng, anôk bruă mrâo pŏk ngă hdră ksiêm dlăng ti să Bình An Êpul mă bruă mă leh bruă hŏng khua gĭt gai Knơ̆ng bruă sang čư̆ êa să, Anôk mdrao mgŭn să Bình An, Anôk bruă Tây Sơn kơ hdră gang mkhư̆ , mdrơ̆ng hŏng klei ruă êngoh bi ƀlĕ êrah ti alŭ wăl, boh klei mnuih ruă êngoh bi ƀlĕ êrah, bruă msir mghaih anôk mâo klei ruă, mdjiê hluăt lŏk kêč ƀloh, krih êa drao; bi hgŭm leh anăn đru kơ alŭ wăl pŏk ngă bruă msir mgaih anôk klei ruă êngoh bi ƀlĕ êrah.

Hluê si Knơ̆ng bruă mdrao mgŭn c̆ar Gialai, c̆iăng kơ hdră gang mkhư̆ , mdrơ̆ng hŏng klei ruă êngoh bi m ƀlĕ êrah tŭ dưn, dŭm alŭ wăl c̆iăng lŏ dơ̆ng pŏk ngă bruă msir mghaih anôk mâo klei ruă; mđing kơ bruă mdjiê hluăt lŏk, bi mdoh pưk sang; mđĭ hdră hưn mthâo gang mkhư̆, mdrơ̆ng hŏng klei ruă êngoh bi ƀlĕ êrah ti dŭm gŏ êsei, ti sang hră leh anăn hlăm kdrăp mđung asăp blŭ ti alŭ wăl; ksiêm dlăng kêc̆ ƀloh leh anăn hluăt lŏk djŏ wưng kc̆ah c̆iăng hmao mâo dŭm hdră msir mghaih djŏ, ñĕ kơ klei bluh mâo lu leh anăn tưp lar.

Truh kơ ară anei, c̆ar Lâm Đồng mâo 1 êbâo 126 c̆ô mnuih djŏ klei ruă êngoh bi ƀlĕ êrah; mâo 48 c̆ô mrâo djŏ hlăm hruê kăm lehanăn 10 anôk dôk mâo klei ruă hlăk dôk ngă bruă, kƀĭn ti dŭm alŭ wăl msĕ si: Dă Huoai, Bảo Lộc, Di Linh, Tánh Linh, Đức Linh leh anăn Bắc Bình.

Hluê si Knơ̆ng bruă mdrao mgŭn čar Lâm Đồng, wăt tơdah ênoh mnuih ruă mâo klei bi êdah hrŏ ƀiă mkă hŏng wưng anei thŭn dih, ƀiădah klei ruă tưp bluh mâo hnưm, lu krĭng huĭ srăng bluh đĭ ktang hlăm wưng ti anăp tơdah mŭt hlăm yan hjan.

Čiăng pral ksiêm dlăng klei ruă tưp, bi hrŏ jih hnơ̆ng ênoh mnuih ruă, mnuih kjham leh anăn djiê mơ̆ng klei ruă êngoh bi ƀlĕ êrah, Knơ̆ng bruă mdrao mgŭn mtă kơ Anôk bruă ksiêm duah kơ klei ruă c̆ar mđĭ hdră ktuê hluê dlăng kman, pral tui ksiêm kjăp boh klei ruă tưp ti alŭ wăl.

Hmao ƀuh hnưm dŭm čô mnuih ruă, anôk mâo klei ruă tưp mrâo čiăng mkŏ mjing hdră msir mghaih jih, amâo lui klei ruă đĭ lar hlăm wưng sui, čŏng pô mkăp djăp êa drao, kdrăp yua, mnơ̆ng yua, êa drao mkăp kơ hdră gang mkhư̆ klei ruă; mkŏ mjing ksiêm dlăng, ktuê dlăng grăp gưl leh anăn mjêč ti dŭm alŭ wăl mâo klei huĭ hyưt mâo klei ruă./.