Mrâo anei, Klei kƀĭn kluôm tal 4, wưng thŭn 2023 – 2028 mơ̆ng Êpul hgŭm phung aê mdrao mda asei čar Dak Lak bi klă mta kñăm jing: Bi lar dŭm mta bruă čŏng pô kyua klei suaih pral yang ƀuôn, mtrŭt mđĭ dŭm mta bruă mơ̆ng Êpul phung aê mdrao mda asei ti alŭ ƀuôn sang. Hŏng klei blŭ piă ngă bruă “Phung aê mdrao mda asei hluê ngă asăp Awa, čŏng pô kyua klei suaih pral yang ƀuôn”, hlăm wưng mrâo, Êpul hgŭm phung Aê mdrao mda asei čar Dak Lak lŏ dơ̆ng bi lar bruă klam leh anăn ai dưi mơ̆ng phung hgŭm hŏng dŭm hdră hluê hriăm, mjuăt pô mđĭ hĭn ai tiê bruă mdrao mgŭn, bi lar klei mbruă hlăm bruă ksiêm duah klei kreh knhâo leh anăn mtrŭt mđĭ klei čŏng pô kyua klei suaih pral yang ƀuôn. Aê mdrao Phan Thành Trinh, khua kiă kriê Êpul hgŭm phung Aê mdrao mda asei čar Dak Lak gưl tal 4 brei thâo:    

“Êpul hgŭm phung aê mdrao mda asei čar Dak Lak lŏ dŏng hluê ngă dŭm mta phŭn ngă bruă pô hŏng 3 mta phŭn, kñăm kơ dŭm mta bruă phung aê mdrao mda asei kyua klei pral yang ƀuôn, bi lar bruă klam nao êlâo mơ̆ng pô hlăm grăp alŭ wăl. Bruă klam mơ̆ng dŭm gưl phung aê mdrao mda asei ti dŭm kdriêk hlăm wưng kơ anăp srăng ktang hĭn, phung ayŏng amai adei srăng dưi bi lar bruă klam pô ti alŭ wăl pô kriê dlăng”.

Êpul hgŭm phung nai mdrao mda asei čar Dak Lak ară anei mâo 16 anôk bruă hŏng giăm 1.000 čô hgŭm jing phung nai aê mdrao mda asei ti dŭm sang êa drao, anôk bruă mdrao mgŭn mơ̆ng čar truh kơ kdriêk mâo leh lu mta bruă čŏng pô kyua klei suaih pral yang ƀuôn msĕ si: mkŏ mjing 120 gưl mkă dlăng klei ruă, đru kčĕ, hưn mdah klei suaih pral, mbha êa drao amâo mâo mă prăk kơ 86.000 čô mnuih ƀuôn sang hŏng ênoh prăk êbeh 4 êklăk 200 êklăk prăk, mtô kơ dŭm hdră dŏng mdrao kơ dŭm êbâo čô nao ti dŭm sang hră hđeh điêt, sang hră gưl sa hlăm kluôm čar. Mkŏ mjing hruê knăm rao kiê kngan hŏng kƀu, mtô kơ bruă hâo hưn klei suaih pral ƀă k’kiêng anak kơ phung êdam êra, gang mkhư̆ klei ruă tưp kơ dŭm êbâo čô hđeh sang hră, phung hriăm gưl prŏng. Hluê ngă hdră đru ai kơ phung ruă ti 14 sang êa drao hlăm čar. Mbĭt hŏng anăn, Êpul lŏ mkŏ mjing 1 bruă čŏng pô prŏng ti Campuchia kñăm mkă dlăng klei ruă, hưn mdah klei suaih pral leh anăn mbha êa drao amâo mâo mă prăk kơ mnuih ƀuôn sang, mđup brei êdeh wai jơ̆ng kơ phung hđeh sang hră dleh dlan.

Knhal jih thŭn 2023 mrâo êgao, ti ƀuôn prŏng Hà Nội, Êpul hgŭm phung nai mdrao mda asei Việt Nam mkŏ mjing hdră “Mlih mrô kyua klei jăk kơ ksŏ”, mkă dlăng, ksiêm mkă hrŏng klei ruă brŭ ksŏ leh anăn dŭm klei ruă kơ ksŏ. Hdră dưn yua leh kdrăp mrâo mrang mơ̆ng phung aê mdrao mơ̆ng dŭm sang êa drao hluê ngă. Hŏng bruă mkă dlăng kluôm, mă ruo X-quang, siêm âm, điện tim, điện tâm đồ, mkă mta mmih hlăm êrah, ksiêm mkă klei ruă mâo mta mmih hlăm êrah, prăi hlăm êrah, mâo mnuih ƀuôn sang yap yuôm bhăn. Sa čô mnuih ruă lač:

“Kâo dưi mkă hnơ̆ng êrah leh anăn mă êrah mkă dlăng, ară anei dôk guôn mă rup ksŏ, leh anăn lŏ siêu âm, kâo sa ai êdi hŏng hdră anei. Akâo kơ knŭk kna uêñ mĭn kơ mnuih ƀuôn sang”.

Anei jing hdră mkă dlăng amâo mâo mă prăk kñăm hmao ƀuh phung mâo klei ruă brŭ ksŏ leh anăn dŭm mta klei ruă kơ ksŏ, đru mdrao mgŭn, kriê dlăng djŏ hruê mông, bi hrŏ jih hnơ̆ng klei hmăi amâo mâo jăk hŏng klei hdĭp leh anăn klei suaih pral, đru rơ̆ng bi hơĭt klei hdĭp yang ƀuôn, mđĭ hĭn hnơ̆ng tŭ jăk klei hdĭp mnuih ƀuôn sang Việt Nam. Aê mdrao Hà Anh Đức, khua adŭ bruă, Phŭn bruă mdrao mgŭn, khua kiă kriê Êpul hgŭm phung nai mdrao mda asei Việt Nam brei thâo:

“Bruă mkă dlăng hrŏng hnưm, hmao ƀuh hưm, mdrao mgŭn mtam srăng đru kơ mnuih ruă dưi bi kdung kleu hdĭp, klei hdĭp dưi mđĭ hnơ̆ng tŭ jăk leh anăn ăt đru bi mdul ênoh prăk yang ƀuôn srăng gui. Êpul hgŭm phung mda asei hmei čiăng ba kơ năn mâo să hdră djŏ, đru kơ grăp bruă dưi mdul ƀiă prăk bi liê, mâo klei tŭ dưn hĭn, phung ruă mâo klei tŭ dưn leh anăn phung mă bruă mdrao mgŭn ngă djŏ hdră, dưi hmao ƀuh djŏ klei ruă čiăng dưi mdrao mgŭn mtam.”

Hdră mlih mrô kyua klei jăk kơ ksŏ, mkă dlăng klei ruă ksŏ ti 5 čar, ƀuôn prŏng hlăm thŭn 2023 leh anăn 2024. Hdră mdưm mta kñăm mkă dlăng amâo mâo mă prăk kơ klei ruă brŭ ksŏ leh anăn dŭm klei ruă kơ ksŏ mkăn kơ êbeh 50.000 čô mnuih ƀuôn sang. Êlâo kơnăn, hdră dưi mkŏ mjing ti ƀuôn prŏng Hồ Chí Minh, ară anei dưi lŏ dơ̆ng mkŏ mjing ti ƀuôn prŏng Hà Nội, Cần Thơ, Đà Nẵng leh anăn čar Thừa Thiên Huế, hŏng klei nao hgŭm mơ̆ng giăm 1000 čô nai aê mdrao.